Va'Atəŋ 31 - Bible en Guidar

¹ Yaŋ aprəm kirtin Laban mezeŋgleket ənahaŋ na: «Yakob amõhuk zəgeɗ na afəm pakə, aka hara arya na afəmiy akkpaŋ məs aryaŋka.»

² Yakob asəŋgləkan hara Laban na, wəlet awdaw va lahəŋ ɓa.

³ Yawe anah sən Yakob na: «Amil aka dələv net efiŋgiɗko, eret ɗiy noko: wanəsaw də isi.»

⁴ Yakob ayek may Rakel dət Le'a awra a təki asan dit gilew nani.

⁵ Aɓsit na: «In tat ula hara afukum akaw tay va məsam lahəŋ ɓa; Maŋgəlva na afuw asanək də iyna.

⁶ Kəsənənək mənokum sən kiykum va nəgəɗ sən wəza sən afukum maw homtok homtoku.

⁷ Afukum asmayãwka, addəɗanək əfaɗ naw gap təl kəlawə, də as pak, Maŋgəlva dəpəl sən tive nawgəɗ su mbərayən ɓa.

⁸ An anahək na: Timeŋgiɗ nzefnzefiŋ dədassoŋ ka wəfaɗ noko, timeŋgiɗ pak uwaŋ nzefnzefi; an anahək na: vəlẽh vəlẽhəŋ ka nawfaɗ suko, ndəɗaŋ uwaŋ zit vəlẽh vəlẽh.

⁹ Maŋgəlva dəgəm gazlaŋ na afukum, apsuwa.

¹⁰ Aka pay ərka net gilewi, addəv əssine in haraw le'gən na: in ule ndargenyeɗi, porsokɗe vəlẽh vəlẽhi, nzefnzefi, gəm borzlozleɗ kaka'ə.

¹¹ Maslay na Maŋgəlva anah su addəv issine na: Yakob. Nəzlan sən na: In yakəŋkə.

¹² Yas amna: Aslan horoko, awle porsokɗe məzərka'an sit gilew pak vəlẽh vəlẽh, nzefnzef gəm borzlozloɗiŋgə, vi nulak an Laban adawgəɗ suk pakə.

¹³ Intə Maŋgəlva məs dərban zən azok a Betel, a təki kəpesl serek, a təki kiynan mok su naka. Kakaŋ na, asili, agil səka dəlvəŋka amndok aka dələv net migilko.»

¹⁴ May Rakel dət Le'a, azlan sənəni: «Haran nam tay addəv əzəmgəla na afəm əmpa sa?

¹⁵ Va molhõyẽɗ adawɗiyim azan ɓa sa? Adan avəlməka, azəm koɓeɗ namə.

¹⁶ Vi arya məs Maŋgəlva amõh səva afəməŋ pak nami dit kirtəmə. Agəɗ va Maŋgəlva anah suk pakə.»

¹⁷ Yakob asilik andek kirtin dit gil nan apeŋgit aket zlogomeɗi.

¹⁸ Akak gazlaŋ nan də arya nani, gazlaŋ arah sə təki məpəlayya na Paddan-Aram, kamndan ana Isak, afənda aka dələv na Kana'an.

¹⁹ Laban ambatək əfiw timeŋgiɗ nan, gala Rakel təhẽl meŋgilveɗ Terafim na afəta.

²⁰ Yakob abayək hara Laban mə Aram, ambat məza ənah sən ɓa.

²¹ Anzanək dit zəgeɗ nan pakə, ndən le', aggar ki məlpa na Efrat, haran ta' kəlaket gərmeɗe na Galad.

²² Aka wəvoŋ mohoko'ən məprəman sən Laban na, Yakob anzanəka.

²³ Laban andek milmiŋgiɗin, azbanək gap əsɓəta buhulu, ambat ərufun aket gərmeŋɗe na Galad.

²⁴ Maŋgəlva ade wərəh Laban mə Aram addəv wissine də dəfɗa, aɓsən na: «Asla zuko, vi kədawpel də Yakob moggon ɓa, mbərayən ɓa.»

²⁵ Laban aruf Yakob na aherik gizlirke nan aka gərəm na Galad; Laban dit milmiŋgiɗin aherninik an net tamə.

²⁶ Laban aɓsən Yakob na: «Miy kəgəɗəŋ di! Kəbayək haraw, is mah əkiy kirtu va məfərsəneɗ mərmet səma əgaya.

²⁷ Vimi kəɗam su is ɓak ənzok, mbo' əzaw məza ənah su ɓa di? Wanəppok əmbat kəta, dit gəlyeɗe nanneke, də dəgla gəm gəzləŋtəndəŋ ɓa sa!

²⁸ Kəppaw əsɗet dəhiŋgiɗu dit kirtu muguluŋgit də wəllamit a makraw ɓa. Eske na, kəgəɗək zəga na dərwa.

²⁹ Wanəgəɗ suk mbərayən kəta. Ya Maŋgəlva net migiluk anah su na dəfəɗəŋ na: “Asla zuko, vi kədawpel də Yakob moggon ɓa, mbərayən ɓa!”

³⁰ Yaŋ na, kəmbat na vi mok aka gəla na afuki yi, ya vimi kəhẽl su meŋgilveɗ naw di?»

³¹ Yakob azlan sən Laban na: «Geslne dəduwa, azaw na wakəmõh su kirtuko.

³² Ɗəf məs kəreh meŋgilveɗ nok avani, nan wamtə. Daret milmiŋgiɗmə, asən zəga nok navaw pakə, amsak agəma.» Yakob dəsən na, Rakel təhẽlke ɓa.

³³ Səza Laban atoŋ a gizlirke na Yakob, a gizlirke nat Le'a, gəm a gizlirke net belemɗe sulegit pak na, zəga tay arah ɓa. Ndən vit sə gizlirke nat Le'a, toŋ a gizlirke nat Rakel.

³⁴ Rakel tənde meŋgilveɗ Terafim təziy addəv mazaŋga na zlogomo. Ndət ɗew akan, yaŋ Laban aŋgbanyan gədəv gizlirke pakə, zəga tay arah ɓa.

³⁵ Yaŋ tənah sən afət na: «Kamə, kədawda gədəv akaw an nəsil abok ɓa ɓa daya nawa, vi in tat əzələha.» Aŋgbanyanəka, dərih meŋgilveɗ Terafim nek ɓa.

³⁶ Gədəv Yakob adək diyɗa, awaksən Laban; amna: «Heslepe naw miy kandi? Mbərayən naw miy nəgəɗ, kəzbawəŋ di?

³⁷ Kəŋgbenyet zəgeɗ naw pakəŋ na, zəga nok tay kərah təttaka anawda kan sa? Arban a maheret milmiŋgiɗu dit milmiŋgiɗukəŋki, dətawan səmən sulagəmə!

³⁸ Agəɗək wəzva kaklaw sula in tat də isi, tay səret timeŋgiɗ nok, awaniɓa səret gilew nok dəlot ɗah ɓa! Nəzəm ɗah ndergeyẽɗ naret timeŋgiɗ nok ɓa.

³⁹ Nəkiy suk time məbakan sura ɗah ɓa, in tat əslan wən nan akawa; zəga mamayãn an məhãlən də kapaya, də dəfɗa, is tat əssohõn amawa!

⁴⁰ Pay azləwək də kapaya, də dəfɗa, səmyã, sin səraw təray!

⁴¹ Agəɗək wəzva kakalaw sula, in tat eŋgil anokda, nəgəɗ sukuk wəza wəzva kəlaw kiyən poɗo aket kirtuk muguluŋgiti, wəzva sləre, a met gilew noko! Kəddəɗanək uwrək naw gap təl kəlawə!

⁴² Va Maŋgəlva na afu, Maŋgəlva na Abraham məgeslne'gən Isak tay də in ɓa, vaw halay halay kədappaw əmbat kakaŋ kəta. Maŋgəlva awlak əzəmsahã naw də iya na vawa; atawək wən nan na dəfɗəŋka.»

⁴³ Laban azlan sən Yakob amna: «Kirin muguluŋgitiŋki kirtuwəŋgə, kirtitiŋki kirtuwəŋgə, timeŋgiɗiŋki nawəŋge'e, an kədawlaŋ pak nawi yi. Miy nədawgəɗ sit kirtu muguluŋgitiŋ dit kirtit en awaŋ dəpaŋkəŋ di?

⁴⁴ Damə, əɗɗa wənmiyna a walaŋmə, dəsangən ka miziwe namə.»

⁴⁵ Yakob agəmək gərəm ampa ka sereki.

⁴⁶ Yakob anah sit milmiŋgiɗin na: «Məndə gərmeŋɗe», andaŋgək gərmeŋɗe akkeletinik kpewi. Azəmaŋ peŋ a maŋgavet adaka.

⁴⁷ Laban aya na, Yegar Sahaduta, na Yakob aya na Gale'et.

⁴⁸ Laban amna: «Gərmeŋge kpewiŋki, məziwey aka walaŋgəm də is dəpaŋka.» Va wənəh na kpew na məziwe.

⁴⁹ Iya nan Mispa yi'e, vi anahək na: «Kəta Yawe dəsivumə, pay mədawtəpa sə mahara zəmə.

⁵⁰ An kəzəmgitik sahã net kirtuwa, may an kəkayək gil meɓɓet aketi, asən na, ɗəf tay də mənam ɓa dayday na, Maŋgəlva yi məziwe aka walaŋgəm də isi.»

⁵¹ Laban aɓsən Yakob na: «Gərmeŋɗe kpew nəndol a walaŋgəm də isiŋ yeŋki, serekəŋ yaŋka.

⁵² Gərmeŋɗe kpewiŋki, məziweŋ, serekəŋ pak məziwey. Naw, in tat əsway na, nəggar na kiyit gərmeŋɗe kpewiŋ kəlazok ɓa, nok pak asway na, kəggar na kiyit gərmeŋɗe kpewiŋ də serekeŋ kəlazaw naɗɗa mbərayən ɓa.

⁵³ Maŋgəlva na Abraham də Maŋgəlva na Nahor dətawan wən nam də isi.» Ndəni yi Maŋgəlva na afiti. Yakob aswayək də məgeslne'gən Isak, afəni.

⁵⁴ Yakob azaɓək-Maŋgəlva aggərma. Ayek milmiŋgiɗin aka peŋ; azəmənək peŋ, ndəɗaŋ kim aggərəm adaka.