Va'Atəŋ 28 - Bible en Guidar

¹ Isak, ayak Yakob aɓuh sənək ma. Anah sən na: «Kədawkay guluk sə weleŋgit kirin muguluŋgit na Kana'an ɓa.

² Asili! Dok də təki məpəlayya na Paddan-Aram, ana Betuwel da, dəhuk afət moko. Kəgəmgən səret kirtin gəmsuk Laban taka sədaka.

³ Maŋgəlva Məzuɓappak dəɗɗa əzaɓ nan akoko, duwan suk kiyuk kuɗiskuɗis vi kəsokgən wəsap net ɗiy!

⁴ Dəpsuk wəzaɓ na Abraham, suko, gəm sən mazlalwõko, vi dələv kəsok addəvənəŋ dəsangən ka noko, dələv məs Maŋgəlva apsən Abraham əŋka.»

⁵ Isak aslənək Yakob də təki məpəlayya na Paddan-Aram aza Laban, wətən Betuwel mə Aram, məlmət Rebeka, met may Yakob də Esaw.

⁶ Esaw awlak na, Isak aɓuh sənək ma sən Yakob, aslənək də təki məpəlayya na Paddan-Aram dəgəmgən guluk sədaka, də wəɓuh sən ma aɗi sən wən nani amna: «Kədawgəm waŋ səret kirin muguluŋgit na Kana'an ɓa.»

⁷ Yakob aprəmək ma afən dət mani, ambatək də təki məpəlayya na Paddan-Aram.

⁸ Esaw awlak na, kirin muguluŋgit na Kana'an mbəreytiŋ aza Isak, afəni,

⁹ Esaw ambatək aza Ismayel, agəmtək Mahalat wətən Ismayel wətən Abraham, məlmən Nebayot ka gulkun sap azet gil nani.

Wissine na Yakob

¹⁰ Yakob agilik sə Ber-seba, ambat a Haran.

¹¹ Agap a təki an avoŋgu vi pay abətəka. Agəmək gərəm taka səret gərmeŋge na təki nani, aɗi ka antoŋ ammba kini, avoŋ adaka.

¹² Assinke: wəlaŋ-maha yaŋ mətukun səfuŋ ŋgbusl a disiŋ; maslayɗe na Maŋgəlva tahəŋ əprikeŋgi, tahəŋ əpeŋgeŋ dəkani.

¹³ Yawe yaŋ ziwwe a disiŋ kini amna: «Intə Yawe Maŋgəlva na afuk Abraham, Maŋgəlva na Isak. Dəlvafuŋ kəvoŋ akanəŋka, wanəpsuk də mazlalwõko.

¹⁴ Mazlalwõk wasan va burɗuk na dəlvafuŋ. Wakəzləɗan zuk ammba pay na moskoyo, gəm ammba pay nampum, də gazga də dohoŋ; ɗiy na dələv pak, warahaŋ əzaɓ ammboko, gəm ammbet kirtuko.

¹⁵ Ya awle! In tat də isi, wanəguk də təki kədaddok pakə, wanəmilguk aka dələvəŋka, vi nəzgok na firik ɓa, hã gap in grak əgrak an nənah suko.»

¹⁶ Yakob afɗah səket sin nani, amna: «Gesiŋgi Yawe yi aŋka, naw nəsən ɓa!»

¹⁷ Ageslne'ike, amna: «Təkiyəŋ nawgeslne' səni! Zəga tay lah, an gəla na Maŋgəlva yi ɓa ɓa, maddamba na disiŋgi.»

¹⁸ Yakob asilik pumu, agəmək gərəm məs aɗi kiyən akan naka, ampak va sereki, aman mẽl akani.

¹⁹ Alvan təki nan na Betel ya mbara na Luz adawyanən walaŋgəla-metiŋ van far.

²⁰ Yakob aynanək man dawnəh na: «An Maŋgəlva tay də iyna, an aguwək aka tive na malaka nawa, an avayək peŋ də lukut nawgulo,

²¹ an nəmilik zeŋgleŋge ana əbba da, Yawe wasan ka Maŋgəlva nawa

²² gərməŋ nəmpə ka serek əŋka, wasan Gəla na Maŋgəlva, səddəv an kədawvay pak, wanəpsuk makəlawani.»