Va'Atəŋ 17 - Bible en Guidar

Iya na Abram akkpaŋgək Abraham

¹ Wəzva na Abram agəɗək kaklaw vaytak kiyən vaytak, gala Yawe arban zən aza Abram anah sən na: «Intə Maŋgəlva Məzuɓappak. Adaw abawa, asok təstəs-gərakə.

² Wənmiyna naw də is na, wanənzlərguk dərwadərwa.»

³ Abram atəkək kiyən afuŋ, Maŋgəlva apel dəndən apsən na:

⁴ «Naw na, wənmiyna naw də is yaŋka: wakəkkpaŋ afit ɗiy fakay fakayə.

⁵ Kawyukiy də iya na Abram əmpa ɓa, iya nok wasan Abraham, vi wanəkkpaŋgok afit ɗiy diyɗa

⁶ wanəkkpaŋgok ka məzuwa dərwadərwa: wanəɗɗuk kəwetgən ɗiy na dələv temtem diyɗa, milyeŋge səzok adawgilyoŋgu.

⁷ Wənmiyna naw də isi, gəm sayit ɗiy dədazzoŋ dərɓogoko; wənmiyna faɗəs waɗiyu ka Maŋgəlva noko, gəm ka net kirtuk dədazzoŋ dərɓogoko.

⁸ Dələv məs kəsim akanəŋka wanəpsuk ka nok faɗə gəm sit kirtuk dərɓogoko, dələv na Kana'an dəwənnani. Wanəsaw Maŋgəlva neti.»

⁹ Maŋgəlva apsən Abraham na: «Noko, kərmagən wənmiyna nawa, gəm dərɓogok əmpa na, sayit kirtuk en dədazzoŋgu.

¹⁰ Wənmiyna naw an kədarmaŋ aka walaŋgəm yaŋka, va wənəh na kirtuk dərɓogoko: zel nokum pak dəskəlaŋgən awra:

¹¹ Əskəlkum awra yi, zəga narban wənmiyna a walaŋgu də mənokum.

¹² Kirtukum mezeŋgleket va sayit agap pak, kaskilit awra aka əvoŋ dodopoɗo səza muweti, vaska'e belemɗe muwet anokumda, awaniɓa məlbahit dəlbəh də təbəz babar səka dələv mbərən awandi pak, məs mahəlfa nokuŋ ɓa.

¹³ Balam muwan eŋgili, may məlbəhən dit deleɗ pak əskələn awra. Wənmiyna naw dəsangən aka gəɓa zukum wənmiyna faɗə,

¹⁴ məs dəskəlawra ɓa hara na, kawgilginiy səret ɗiy nani. Vi aŋzluwək wənmiyna nawa.»

¹⁵ Maŋgəlva apsən Abraham na: «Kədawyət ɗak nok Saray əmpa ɓa, iya nat dəsan na Sara.

¹⁶ Wanəɗɗa əzaɓ akata, wanəpsuk wiyin dəndəta. Wanəzaɓata, watəwə ɗiy diyɗa; milyeŋge net ɗiy wagulyoŋ səzata.»

¹⁷ Abraham ampak kiyən afuŋ, ndən əmasa: ndən əpel də makran na: «Ɗəf wəzva səkat na dəwəgən muzliya? Wəzva nat sara agəɗək kaklaw vaytak, watəwə?»

¹⁸ Abraham anah sən Maŋgəlva: «Kamə, kəta Ismayel dəsan madaran ammba voko!»

¹⁹ Maŋgəlva apsən na: «Awwo! Ɗak nok Sara watəwə suk wiyina, kəlvangən na Isak. Wənmiyna naw wasan dəndən ka wənmiyna an faɗ sit kirtin dərɓagani.

²⁰ An dəwəlsən Ismayel na, nəprəm sukuko. Awle, wanəɗɗa əzaɓ akani, wanuwan, kuɗiskuɗisi; wawə ɗiy gugriɗ kəlaw kiyit sula, wanəgilgit dəlveŋge diyɗa sə kəlazani.

²¹ Wənmiyna naw wasan də Isak hara, məs Sara tədawə suk dukki va kakaŋkəŋka.»

²² Adan Maŋgəlva aggrak əpel səni, apeŋgək səza Abraham.

²³ Abraham agəmək Ismayel wətəni, belemɗe muwet ananda pakə awaniɓa en məlbəhit dit koɓeɗi, ɗiy mezeŋgleket neŋgil ananda pakə; ataw magimnit aka pay Maŋgəlva apel dəndəni.

²⁴ Abraham tay də wəzva kaklaw vaytak kiyən vaytak, pay ataw magimniti,

²⁵ Ismayel tay də wəzva kəlaw kiyən hoku gala məskələn awra.

²⁶ Pay taka yi, Abraham də Ismayel wətən askəlaŋ awra.

²⁷ Gəla nan dəwənnan pakə, belemɗe muwet eŋgili, awaniɓa məlbəhit səka guw dit koɓeɗi, askəlaŋgək awra dəndəni.