Tobit 9 - Bible en Guidar

Rafayel tay əmbat a Rages

¹ Yaŋ Tobiyas aya Rafayel aɓsən na:

² «Azariya, məlmuwa, agəm gewleɗ poɗo dit zlogomeɗ sula. Dok a Rages ana Gabayel da. Apsən ɗerewel net koɓeɗ an məɗi va ɗəf akan naka kətefigin koɓeɗ veti. Siske na, amil də Gabayel vi kaɗɗa əzləra nawpeɗe.

³ Ya kəsənək təstəs na afu tay haran sekke aka tive əga əmilye nawa. An nəliyək pay taka na, wanədan sən gədəvni.

⁴ Əmpa na, kəsənək na, Raguwel aswayək na appaw na əmbat ɓa, ya nəɓap na əggar ki əsway nan ɓa.»

⁵ Rafayel mbat kan a Rages na Medi, dindit gewleɗ poɗo gəm zlogomeɗ sula. Avoŋgoŋguk ana Gabayel da. Rafayel apsənək ɗerewel net koɓeɗ an məɗi va ɗəf akan naka. Sə dərɓagan na, anah sənək na Tobiyas, wətən Tobit agəmək gulku, mãy ayak akki na əzləra nawpeɗe. Gabayel aŋɗet sinik taɓakɗe net koɓeɗ ləŋ də tampoŋ an mətip met ngoosa-ngoosa, yaŋ asletin aket zlogomeɗi.

⁶ Vit mazayən pum də pummo na addoŋguk matak akki nawpeɗe. Atoŋgoŋguk ana Raguwel da, arəhənək Tobiyas əzəma. Tobiyas asilik follu yaŋ asɗan Gabayel. Gabayel atəŋgək əhəma yaŋ aɗɗa sən əzaɓ aka Tobiyas dawnəh na: «Wiyən moggon də afən pakə, təstəs may makran zayə! Kəta Daya na disiŋ dəɗɗa əzaɓ nan akoko! Akat ɗak noko, aka afəta mãy akat mata! Soko sən Maŋgəlva, vi dawluk na, in tat ula hara pakam naw Tobit zək nani.»