Tobit 8 - Bible en Guidar

¹ Səza agrakən əzəm də əsa na, pay nawvoŋ agapka. Məkani gawla addəv gəla naka, mətoŋgəni a giziŋ vani.

² Tobiyas aɗɗumonək əpel na Rafayel naka: ndən dadawa gəm memɗeke kilif kar əgdahən səddəv gabal nani, azi aka slayoffo naddəv zəga nawzla tursan.

³ Məŋgən kilif arɓahək tuya, anzanək addəv səmyã kəla Eziptə. Rafayel azbanək aka dələv vanəska, armaka aɓrukuk ləŋgə.

⁴ Migilit agilyoŋguk sə giziŋ, amsanənək maddamba. Tobiyas le' səka zəga nawvoŋgo aɓsət Sara na: Asili, məlmuwa. Akkam səmə gəm məɓuh səm mam sən Daya nam dərban səmgən ulasahã nani gəm əkõh nani.

⁵ Sara le'i, atəŋgənək əkkama gəm əɓuh met vi dərahaŋgən əkõho. Tay ənah na: «Soko sən Maŋgəlva net efiŋgiɗmə! Sayit ɗiy nazzan pak dəɗiyən ki iya noko! Kəta disiŋ də an kəzəməɗ pak dəgagdakokun pay pakə!

⁶ Istə kəzəməɗ Adam, istə kəɗət sənət Hawwa guluk nan ka nabbah səni gəm ka məziwe, səzet sulegiti mahay ɗəf titir agili. Istə kənah na: Dədah ɗəf mizilin dəsangən matakərgən ɓa, məgəɗ səm sən məbbahaŋgək nan vit sədek va ndəni.

⁷ Gəgaŋ kan na, əŋgla məza də tiveni ɓa dədaɗɗu nədawgəmət Sara məlmukəŋ ka ɗak naw ɓa, əɗɗum na gegesiŋgi. Aɗi wən nan, ulasahã dəsangən akata gəm akawa, məgalgən matakə.»

⁸ Siske anahaŋgək aka ma taka na: «Dəsan vaska! Dəsan vaska!»

⁹ Siskiŋ na avoŋgoŋguk addəv dəfɗəska.

¹⁰ Ənziya siɗikke na, Raguwel le'i, akkelet gewleɗ nani. Addoŋ əso' magamasə. Vi Raguwel tay ənah na: «Kuzuŋ gawla van wamtə, ɗiy wamasaŋ akamə mãy karamə.»

¹¹ Səza abaynən ma əso' magamasə, Raguwel buriyok eŋgili, ayət ɗak nani.

¹² Anah sət na: «Aslən taka səret belemɗe nok a giziŋ, ulan na madarani sa: vasna, an amtəka, waməɓap əndəkən məza ɗəf əsənən ɓa.»

¹³ Akiytənək balamkə, asɗanənək zəler, akolənək maddamba. Balamək nak toŋgu, tirihik məleŋgit matak palala.

¹⁴ Təgil ənah sit na: «Tay madarani! Zəga tay dəgəɗ ɓa!»

¹⁵ Ndəni agagdakanən Maŋgəlva də ənah na: «Aw Maŋgəlva kəslək ɗiy məs mekret salala pak dəgagdakokungəni! Kəta dəgagdakokun va sayit ɗiy amə' pakə!

¹⁶ Soko sən kəknahwək də ənneke! Vi an məs nədaɗɗumon na dəgəɗ ɓa. Kəgəɗ səmək va aza memetiŋ na ulasahã noko.

¹⁷ Soko vi kulak səsãhit kirtəm sula karmalayɗeski! Mərbəzəga, arban sit ulasahã gəm əkõh noko, aɗɗa ka ənziya net dəsangən addəv ənneke gəm addəv mbəmlembəle'i!»

¹⁸ Yaŋ aɗi wən nan sit gewleɗ nan dəndəkəngən vov tak təki əddaŋga.

Wəzləra nawpeɗe

¹⁹ Raguwel anah sətək gon tədəgən way diyɗa. Siske, ndən toŋ a gazlaŋ, aki wasliɗe sula dit ndergeyẽɗ poɗo, məfotti. Mətəŋni əda way na əzləra.

²⁰ Raguwel ayak Tobiyas, aɓsən na: «Kədder na səŋ ɓa gap əvoŋ kəlaw kiyən poɗo, kəsokgən aŋ əzəma gəm əsa anawda, kəffetengən makrat wətuwa, ndət məs təzəmsãhã diyɗa lahəŋka.

²¹ Wanəpsuk pəɗak na arya nawa, wakəmndok zay aza afuko. Pəɗak na arya an dəmbər wasan sukum an məmtəka, ɗak nawa gəm iyna. Asok zuko wətuwa, afuk nənani, Edna na, moktə. Mənam tat amaŋgovoko gəm amaŋgavat məlmuko, təŋ kakaŋka hã faɗə, asok zuko wətuwa!»