Tobit 7 - Bible en Guidar

Raguwel tay əpsənət wətən sən Tobiyas

¹ Gala agapaŋ a Ekbatan, Tobiyas anahək na: «Azariya, məlmuwa, aku turro ana məlməm Raguwel da.» Maslay akak ana Raguwel da kana. Arəhənək tay tuŋgo a maddambani. Tobiyas də maslay asɗanənek daabəŋ. Raguwel azlan sitik na: «Nəsɗokumko milmiŋgiɗwa in uɗɗumon na zay kənanaŋgə!» May atoŋgitik ananda.

² Anah sətək guluk nan Edna na: «Gawla vanəŋ agilik siɗek va məlmu Tobit.»

³ Edna təttoketik na: «Səŋga kəzzoŋ di milmiŋgiɗwa?» Azlanənək na: «Səret zev Neftali da məs misimgit a Niniwe.»

⁴ Təssohetik na: «kəsənnənək Tobit məlməm sa?» Azlan sətənək na: «Ha'aw, məsənəka.»

⁵ Tənah sitik na: «Tay zay sa?» Azlanaŋ sətənək na: «Tay zayə, tay hã kakaŋ egge.» Yaŋ Tobiyas anah əmpa na: «Afuwi!»

⁶ Raguwel asilik folu, aslakatək van awlan də əŋgluwən, ndən təŋ əhəma. Siske na ndən peli, anah sən na: «Kəta əzaɓ dəsan akoko wətuwa! Afuk ɗəf moggoni. Mə əray mi na, ɗəf təstəs məzuvəl na ndən kpaŋ tip daŋgarə!» Raguwel amsakək əslakat van awla Tobiyas məlməni, ndən təŋ əhəma.

⁷ Guluk nan Edna dət wətit Sara ahəmaŋgəka'e daɗɗum aka Tobit.

⁸ Siskkiŋ na, Raguwel afotək time sə gazlaŋ ananda, atefik də zən nek diyɗa.

⁹ Səza askoɓnən təlti gəm aslslayaŋgə, assoŋguk kawzəma, Tobiyas anah sənək Rafayel na: «Azariya, məlmuwa, anah sən Raguwel dəpsuwətgən Sara məlmu ka guluk nawa.»

¹⁰ Raguwel aprəmək əpeliska, aɓsən gawla nak na: «Azəmə, asə tagayə, dəfəɗ dəsan suk moggoni. Məlmuwa, səbbəruk na, ɗəf tay nawɗiyət wətu Sara ɓa, ya naw van tamə, nəɓap na əpsənət sən ɗəf mbərən an istə ɓa ɓa. Adan istə gu'o azawa. Ya də as pak na wətuwa, wanəpel suk gegesiŋ.

¹¹ Nəpsittək sit zel buhul səkkayə, səweleŋgit milmiŋgiɗmə, beymet amtaŋgək dəfəɗ an adaddoŋ azata. Ya kakaŋ na wətuwa, azəmə asə, Maŋgəlva wakə wən ammbokum.»

¹² Yaŋ Tobiyas azlan na: «O'oho, nəzəm na mãy nəsə na zəga an wən nan dəskoɓ ɓa ɓa.» Raguwel aɓsən na: «An vaski na, wanəɗɗa, adan maheŋziŋ na Moyis anah napsukta, Maŋgəlva yi diynan wən nan napsukta. Atafət məlmuk kana. Təŋ səza kakaŋka, məlmət kənani, məlmuktə. Məpsukti təŋ səza dəpaŋka hã faɗə. Daya na disiŋ waɗɗa dəfɗəŋ dəsan sukumgən moggoni wətuwa. Dərban sukum ulasahã nani gəm zazay nani!»

¹³ Raguwel ayətək Sara wətən kana, ndət pay azani. Armak vata, apsəntək sən Tobiyas dawnəh na: «Maheŋziŋ na Moyis gəm an miynan addəv ɗerewel na Moyis, dədapsukət ka gulku, atafta. Agəmət azoko may akət ana afuk da. Kəta Maŋgəlva na disiŋ dəkukum zayə!»

¹⁴ Sissiŋ na Raguwel da əyət mat Sara, anah sət təkigən zəga nawvere. Aver iynama nawpeɗe. Narban na: «Raguwel apsəntək Sara sən Tobiyas ka guluk nan va maheŋziŋ na Moyis aynani.» Dərɓaga as na, atəŋgənək əzəma gəm əsa.

Dəfəɗ maddaabəŋ nawsap na gawla dət ɗak nani

¹⁵ Raguwel da əyət guluk nan Edna. Anah sət na: «Məlmuwa azaɓan gəla mbərən, akət Sara addəvən.»

¹⁶ Edna tek əzaɓan zəga nawvoŋ addəv giziŋ va zələt anah səta. Təkətək wətət addəv gəla vanəska, ndət təŋ əhəm daɗɗum akata. Siske na, ndət sin sərat pəpay əppeyti, təɓsət na:

¹⁷ «Asok zuko, wətuwa! Kəta Daya na disiŋ dəkkpaŋgan əzəmsãhã nok ka ənneke! Asok zuko, wətuwa!» Ndət viti.