Tobit 6 - Bible en Guidar

Kilif metiŋgini

¹ Gawla ambatək də maslay. Kəra pak alək dəndəɗaŋ. Addoŋguk matak sulegiti, dəfəɗ madaabəŋ na, ampanənək dibirgidik net ama məlpa adawyaŋ na Balgam.

² Tobiyas prik a məlpa Balgam nak kaskoɓ təlni. Yaŋ kilif metiŋgin azlah səret iŋkile appaka, kasɗək tələn taka. Tobiyas aŋgəslək vaŋvəla.

³ Maslay anah sənək na: «Arma kilif vani, kədapplan ɓa!» Tobiyas armak kilif naka agdahək appaka.

⁴ Maslay anah sən na: «Aɓara, agdah məhhiya, dadawani gəm memɗekeni. Aɗi də maŋgava gəm azget herɗe. Vi, məhhiya, dadawani gəm memɗeken na də ətərəŋgə va miha.»

⁵ Gawla aɓarək kilfi, agdahək məhhiya, dadawani gəm memɗeke. Arɗək slu kilif van siɗikke apsaka, ampərka, aɗiyək madambərgən ara bətu əzaɓani.

⁶ Sə dəbərən na, Tobiyas də maslay azbanənək tive net hã gap aka met meŋge na Medi.

⁷ Yaŋ wiyən nak attokon ma maslay kan na: «Azariya, məlmuwa, məhhiya, dadawani gəm memɗeke kilif na mihã na miyəŋgə kan di?»

⁸ Maslay aɓsən na: «Awzlanən dadawa kilfi gəm memɗeken aba ɗəf mizilin awaniɓa abat guluk məs tuya arəmə awaniɓa əmpəs mbərayəŋ. Enene net arɓahnən tuya, ɗiy vet wambəlaŋ ka faɗə.

⁹ Na məhhiya na, appay sənən hara ɗəf məs forro, kawfu' səmya aka haran forro naka asna ndən ərah əmbla.»

Rafayel tay əsəɓsən Tobiyas dəgəmtəgən Sara

¹⁰ Rafayel də Tobiyas agapaŋgək a Medi. Aka adawgapaŋ go'o də Ekbatan na,

¹¹ Rafayel aɓsən Tobiyas na: «Tobiyas, məlmuwa!» Tobiyas azlan sənək na: «Mi dəgəɗ di?» Maslay amndakək ənah na: «Ana Raguwel da mədawvoŋ dəfɗəŋka, həlfuki. Wətən tat adawyaŋ na Sara.

¹² Abbər kiyət Sara na, wətən mizilin dət mugulŋgut tahəŋ ɓa. Istə gugo day azat Sara. Istat də tive nawgəmət ka guluk noko mãy nawzəmgəla aza arya na afəta. Waŋ goruk də maɗɗula tə, də əɓəsa gəm moggota, afət na, ɗəf məɗi kini yi.

¹³ Anahək əmpa na, is tat də tive nawgəmət ka guluk noko. Aprəmwa məlmuwa: təŋ səza moskoyəŋka, wanəpelsən wən nat waŋ goruk vat sən afəta, ka kəbastəgəni. Ya pay mədawmilyem sə Rages na, aməɗɗa əpeɗe, Raguwel aɓoŋ na dapsukut ɓa, apsənət na ɗəf maɓɓan ɓa, nəsənək təstəsə. An aɗɗak vaska, karmani kawbayni va maheŋziŋ na Moyis aynani, adan asənək na is tat də tive nawgəmət wətən daabəŋ ki dəf pakə. Vas kan na, aprəmwa məlmuwa: Təŋ səza moskoy dəpaŋ na, Raguwel də iyna, aməzəm meŋ akat waŋ goruk vatə, wanəssohot sukut kəɗiytəgəni. An məmilik sə Rages na, waməgəməta, waməkət avam eŋgil anokda.»

¹⁴ Tobiyas azlan sənək Rafayel na: «Azariya, məlmuwa, nəprəmək na: Sara təgəmək zel gap buhul, mãy ziliŋgiɗit pak amtaŋgək addəv gəla nawpeɗe. Dəfəɗ an tay iddereŋ azat na, ndəɗaŋ əmtaŋgə. Mənah suwi na tuya məzubeyti.

¹⁵ Vini geslne adawduwa, tuya aɗɗa mbərayən sət waŋ goruk vat ɓa, ya an ɗəf mizilin tay idder azata tuya van əbayni. Karmalay ava əbba nənani. An nəmtək na, afu dət maw wamtaŋ na sãhã aka batamwa. Wətit tay mbərən nawndikit ɓa.»

¹⁶ Rafayel aɓsən na: «kəsgətək ki an afuk anah sa? Va aɗi suk wən nan nawgəm guluk səddəv mahəlfa nok tusso sa? Damə, aprəmwa, məlmuwa, kədawgəgrəŋgan maɗɗulok vi wən na tuyas ɓa, agəmta. Nəsənək na, moskoyəŋka, kapsukti ka ɗak noko.

¹⁷ Pay kədawtoŋ addəv gəla nawpeɗ na, arɗə dadawa kilif naka gəm memɗeken siɗikke. Azi aka holi offo nawzla tursan, məŋgənən wappasə. Tuya waffoko, wanzani. Kawlani ɗa amaŋgavat ɓa.

¹⁸ Taksən kədawsok dəndət na, misil sulogukum pak tagayə, məkkamə gəm məɓuh mokum sən Maŋgəlva na disiŋ dərban sukumgən ulasahã nani gəm əkõh nani. Kəgeslne' ɓa, vi suktə məɗiyət farfarə, istə nawkõhgəta. Watəzboko, wakərah kirin dəndət məs nassoŋ sukun ka milmiŋgiɗko. Kədawgəgrəŋgan kiyuk ɓa.»

¹⁹ Səza Tobiyas aprəm əpel na Rafayel gəm asən na Sara sə daŋgla mãy səddəv mahəlfa na afən tə, aŋglutək sawɓa, makran asanək akat gərakə.