Tobit 5 - Bible en Guidar

Tobiyas tay əddan malaka də Rafayel a Medi ( 5:1—7:12 )

¹ Tobiyas azlan sən Tobit afən na: «əbba, anəɗɗa an məs kəɗi su wən nan pakə.

² Ya mbarmbar nədawtaf koɓeɗis adan məsən zəm ɓaŋ di? Mi nədaɗɗa dəsənwəgən mãy dətafgən əmndeget su koɓeɗis di? Nəsən tive nadda a Medi lah ɓa.»

³ Tobit azlan sən Tobiyas wətən na: «Gabayel də in na, məɗiyək vam aka ɗerewel də əswaya. Nuɗakanək sek sula, naway pak armak haran nan avani. Nəɗiyək an nan sap dit koɓeɗ nani. Əzva kaklaw sula yaŋ səza nəɗi koɓeɗ vet avani. Gəgaŋ na, wətuwa, akay ɗəf məs kədessel akani dəlhõkgən a Medi. Aməfaɗsən iya nan an kimilik sədaka. Dok ətaf koɓeɗis səva Gabayel kana.»

⁴ Tobiyas agilik kan əkay ɗəf məs dəsən tive nalhan a Medi. Arahək maslay Rafayel appaka ziwwe abani, ya dəsən akan na maslay na Maŋgəlvay ɓa.

⁵ Tobiyas anah sən na: «səŋga kəde di baynawa?» Maslay azlan sən na: «Mə Israyel nani, taka səret milmiŋgiɗko, wəza nəze əkay aŋka.» Tobiyas aɓsən na: «kəsənək tive nawmbat a Medi sa?»

⁶ Rafayel azlan sən na: «Ha'aw naddaw adak ɗayɗayə, nəsinik tiveɗ vet pak də kiwa. Təl ɓəɓay nədaddaw a Medi, in əteh ana Gabayel məlməm da məs dəsan də gəla a Rages na Medi. Kawmbat sə Ekbatan a Rages na, kaɗɗayi əvoŋ sula aka ədawa. Vi walaŋgəleɗe vet sulegit pak aggərməŋgə.»

⁷ Tobiyas anah sən na: «Aguwa baynawa, nəmbat əprəman sən əbba tagay. Nəŋgələk kəlhawgəni, wanəfaɗ suk iya noko.»

⁸ Maslay anah sən na: «Lewi. In tat əguko, ya agəm zuko.»

⁹ Tobiyas amndanək eŋgil əprəman sən afəni. Anah sən na: «Nərahək ɗəfa. Məlməmi, mə Israyel.» Tobit anah sən na: «Aya suwa, nəsəngən na məlma net mãy nawaydi mahəlfa awani di, an kawɓapi əɗi əɗɗum nam akan dəlhokgəni wətuwa.»

¹⁰ Tobiyas vit əya Rafayel, anah sən na: «Əbba tay əyuko bayna.» Maslay toŋ eŋgili, Tobit asɗanək daabəŋ. Maslay azlanək na: «Zəzay dəsan suk diyɗa.» Tobit azlanək na: «Zəzay mawan nədawɓap ərah əmpa di? Daŋgar nənani, nawla əkeɗeɗe na pay əmpa ɓa, in tat ɓulohho ara guzli va ɗiy mimtiti awlaŋ əkeɗeɗe əmpa ɓa. Madaraw nənani ya aret ɗiy mimtit nənani, in tat əprəm wəlet ɗiyi ya nawlet ɓa.» Maslay azlan sən na: «Asok zuko! Maŋgəlva wali əmbəlguk ɓa, asok zuko.» Tobit anah sən na: «Wətu Tobiyas man aka əddan a Medi. Wakəɓap əlhan mãy karbansən tive sa? Anəfaɗsuk hanza noko məlmuwa.» Maslay anah sən na: «Anəɓap əlhani. Nəsinik tiveɗ gərakə, vi nawmbat ɗayɗay a Medi, Nəbbeletik təki məpəlayyaɗe dit mossorgoɗe nəsinik tiveɗ nadak pakə.»

¹¹ Tobit attokon na: «Məlma na naw kənani gəm mahəlfa awan kənan di? Anah suwa məlmuwa va akəŋgeri.»

¹² Maslay azlan sən na: «Mi nok də mahəlfa naw di?» Tobit aɓsən na: «Maw aka əsənən kpakə, wət nawa kənan di? Mbari iya nok di?»

¹³ Maslay Rafayel azlan sən na: «Iya naw na Azariya, wətən Ananiyas Metiŋ, taka naret milmiŋgiɗko.»

¹⁴ Tobit aɓsən na: «Soko nok dəzza, məlmuwa. Kədawda gədəv akaw ɓa, məlmuwa, vi nədaŋgla gesiŋ aka mahəlfa nok ɓa. Mbaraka məlmu kənani səddəv mahəlfa tektek kənani. Nəsinik mãy Ananiyas də Natan lewlewi, sulegit pak kirtin Semeliyas Metiŋ əŋgə. Lahəŋ na maddam a Yerusalem əkkam adak matakə. Dəzlaɓaŋ səka tive ɓa. Milmiŋgiɗuk, ɗiy moggetiŋ, səddəv mahəlfa moggon kəgili. Soko nok dəzza!»

¹⁵ Tobit amndanək ənah na: «Wanəfaɗsuk hanza nok təstəsə, suley taka aza əsɓəta. Wanəzgə sləma aka ərmuk məstaka va nədarma wətuwa.

¹⁶ Asna alhan wətu kana, wanəsləroɓ suk aka əfaɗ suko.»

¹⁷ Maslay aɓsən na: «Ha'aw wanəlhani, kəgeslne' ɓa. Zəga pak wasan səm moggoni dawmbata mãy dawmilye naw azoko, vi tive daryawi ɓa.» Tobit aɓsən na: «kəta Maŋgəlva dipprigin əzaɓ nan akoko, məlmuwa!» Siske na, ayak wətəni, aɓsən na: «Wətuwa azaɓan an dəslə suk naddok malaka, dok də məlmuk Azariya. Kəta Maŋgəlva na disiŋ dətaɗkum adaka, dəmilgikumgən azaw zayə! Kəta maslay nan dədaw dəndukum dətaɗkum, wətuwa!» Tobiyas vit kawgəm tive, atuwəɗ van awla afən dət mani. Yaŋ Tobit aɓsən na «Dok zayə.»

¹⁸ Man ɗəh əhəma yaŋ təɓsən Tobit na: «Vimi kəppan wətu əmbat di? Namna ndəni mikke namə, namna ndən dədatatrak akam ɓa sa?

¹⁹ Mə dəray əkkot gbas ammba dala di? Deleɗ zəga tay agapaŋ aza zeŋgile wətəm ɓa.

²⁰ An Daya apsəm avam məkgəmi yi!»

²¹ Tobit aɓsət gon na: «Kədakrap kiyuk ɓa, zəga pak wagəɗ də tiveni. Wətəm wamil zay va ambatə. Horok wawla pay dawmilyen azok zayə.

²² Kədakrap kiyuk ɓa, geslne adawduk agilet ɓa məlmuwa. Maslay moggon walhani, malaka nan wassan moggoni, wamil zayə.»

²³ Ndəni təppan gabba əhəma.