Tobit 4 - Bible en Guidar

Tobit tay əsəɓsən Tobiyas wətəni ( 4:1-21 )

¹ Pay dəpaska'e na, Tobit aɗɗumon na aɗiyək koɓeɗ ana Gabayel da, a walaŋgəla na Rages a Medi.

² Yas anah dəddəvən na: Yaŋ na nəssohuk əmta; lewi an niyak wətu Tobiyas kawpelsən wən net koɓeɗ vanəs taksən nədamta.

³ Ayak Tobiyas wəten amaŋgavani yaŋ anah sən na: Andəku va an dəslə. Agagdakat moko. Ənziya egge nat gərak kədappat firik ɓa, agəɗsət an nannek zəta. Kədawdan sət gədəvət ɓa.

⁴ Wətuwa, kədazgət ɗa ki sahã an təzəm də is gala kəsok addəvət ɓa. Pay tədamta na andəkət amaŋgavawa, addəv magamas taka.

⁵ Wətuwa, əɗɗum nok dəsan aka Daya ənziya egge nok gərakə, kədawŋger əɗɗa mbərayən ɓa mãy əkkat ki mahenziŋɗe nan ɓa. Agəɗ an dəsan təstəs ənziya nok gərakə, kədazban tive na mambray ɓa.

⁶ Vi ɗiy məɗɗaŋ an dəslə na, an adaɗɗaŋ pak wahhar ammbeti.

⁷ Agəɗ sit əvəl səka ərəh nok sit məɗɗaŋ an dəslə pakə. Kədawɗi marava də əɗɗa əvəl ɓa. Kədaktu ɗah gəɓok sən məssahã ɓa as na Maŋgəlva aktu na gəɓan suk ɓa.

⁸ Agəɗ əvəl va aza an navoko, dəsan diyɗa awaniɓa siɗikke. An zəga siɗikkey avoko kədawgeslne daɗɗa əvəl va aza siɗikke navok ɓa.

⁹ Əzaɓ lelewi kədawzaɓ ammba kizuk vi pay na əzəmsãhã.

¹⁰ Vi əvəl awkõhgən ɗəf səma əmta gəm awtak ɗəf dawtoŋ ara guzliyo;

¹¹ vi ɗiy məzəɗɗaŋ əvəl pak na, əvəl lewi ama hara Məsəɗəɗə.

¹² Asla zuk səza əɗi gəla məza də tiven ɓa wətuwa. Daabəŋ nan na awel guluk na mahəlfa noko. Kədawɗi guluk səddəv mahəlfa mbərən ɓa, mahəlfa məza na afuki ɓa ɓa. Vi kirtit məskəleŋɗe mənani. Wətuwa, aɗɗumet may Nowe, Abraham, Isak gəm Yakob, efiŋgiɗmə. Maddaabəŋ nan na, pakgit aɗiyaŋgək gil na mahəlfa neti, Maŋgəlva aprikginək əzaɓ nan aket dapsit kirni. Mãy aynanək man sit kirtit gəm sit kirtit kirtit na dələv wassan ka neti.

¹³ Vas kan na wətuwa, aŋgliw milmiŋgiɗuk na Israyel. Kədawɓaygən ki zuk abet milmiŋgiɗuk ɓa, abet ɗiy na mahəlfa nok mezeŋgleketi mãy məguluŋgit ɓa, kədawzelen əgəm guluk səret ɓa, vi addəv əɓaygən kiya na əza gəm əttap tay, əmpa na tampəl na slalwãy sãhay gəm əzəmsãhã metiŋgini, vi tampəl na ma mãyi.

¹⁴ Kədawga pay mbərən kawfaɗsən ki wəza na gawla nok ɓa, afaɗsən də pay nanəs ləŋgə. An kawgəɗ sən wəza sən Maŋgəlva na, wafaɗsuk kini. Asla zuk aza əɗɗa zəga nok pakə wətuwa, arban addəv ədaw nok na kəsəɓka.

¹⁵ An məs kəzel na kədaɗɗa sən ɗəf ɓa. Kədawsa mbazla day ki zuk gap əbayuk ɓa. Kədawgəm ənziya mbəraynəs ɓa.

¹⁶ Awɗakan way nok dit məs mãy adawda, mãy lukutɗe nok dit məs zit mepeleŋ. Avəl sit məssehẽŋɗe də an məs dəday avoko. An kawvəl na, kədawɗi marava nan ɓa.

¹⁷ Akə way a gəlabay na ɗəf an təstəsə, ya kədawka a gəlabay na ɗəf məs mambray ɓa.

¹⁸ «Attok əsəɓ ama məs maɗɗula, kədawzelet əsəɓ an moggon ɓa.

¹⁹ Addəv zəga pak agəɗ sən soko sən Daya Maŋgəlva noko, akkaman dəkkpaŋgetgin tiveɗ nok sarra, ka dəɗɗagən ədaw noko gəm an kərəm naɗɗa dəgrakgən moggoni. Vi, zeŋvit ɗiy tay məs əsən asan net ka'ka ɓa, ya Daya zək nan dədapsən ərəh pak sən ɗəfa, tay əɓe'gen ɗəf an aŋgəl hã a təki namta.» Kakaŋ na, wətuwa, arme əyakɗeski, adeddereŋ sə mokrok ɓa!

²⁰ Gəgaŋ na, wətuwa, aslək nərban sukgən na lahəŋ na nəɗiyək koɓeɗ səkat hoku na təbəz babar ana Gabayel wətən Gabri da, a Rages a Medi.

²¹ Wətuwa, kədawgeslne' an məkkpaŋgək məssehẽŋɗe ɓa, ya an istat əgeslne' sən Maŋgəlva na istat də arya metiŋgini, an istat əzar səza mambray zev awandi pakə gəm an istat əɗɗa an dəslə ama hara Daya Maŋgəlva noko.