Tobit 3 - Bible en Guidar

Uɓuma na Tobit

¹ Sãh məsəsãhwã, nətəŋgək ənɗəsa gəm əhəma. Nətəŋgək əkkam də ənɗəsa:

² «Ha'aw təstəs kənani Daya, wəzaɗe nok pak təstəsəŋgə. Əɗɗa zəga nok pak də əŋgla mãy mokrok taka yi ammbamə. Istə mətawwən aka dələv gboŋgu.

³ Vasna, Daya, aɗɗum akawa. Azi horok akawa. Kədawzəmgu sahã viyit mambrayɗe naw ɓa, awaniɓa viyit əzlzlaɓɗe en nəgəɗsuko, mãy an efiŋgiɗu aɗɗaŋ abok ɓa.

⁴ Vi dəɓe'eŋ sitin mahenziŋɗe nok ɓa, vini kəplam dəppohoməngəni, dəsimgəməngəni gəm dəbayməngəni, mbagəm ka zəga na mambamamba, zəga nawmas akani, ka zəga na əra net ɗiy-ɗar məs kətrayam aret pakə.

⁵ Ha'aw, ətawwən nok pak na tətəsi an is tat əgəɗ su va aza mambray nawa mãy va aza an net efiŋgiɗiwa, vi məzbet mahenziŋɗe nok ɓa mãy mədaw addəv gegesiŋ abok ɓa.

⁶ Ya gəgaŋ na, agəɗ an kəŋgəl dənduwa. Amndak əgəm zeŋgilewa! Nəzəgən səka dəlvafuŋ kamsak əkkpaŋ dəlafuŋ! Daɗah su əmta ki əssa madarawa, vi nəprəmək əraɗe en dəslaŋ ɓa. Əzəmsãhã atəwəɗək akawa, Daya akõhgu səma əzəmsãhãska, appaw nəmbat a təki naffet an faɗə, kədakkpaŋgan horok səkaw ɓa Daya. Dəɗah su əmta ki əzəmsãhã vas ənziya egge naw gərakə gəm əprəm ərawəni.»

Balamək nat Sara təratəka

⁷ Dəpas vanə'e, addəv walaŋgəla-metiŋ na Ekbatan a Medi, Sara wətən Raguwel təmprəmət taka net belemɗe na afət ərata.

⁸ Vas na, Sara təɗiyək zil təl buhul. Ya pay pak, əmpəs mbərayən an adawyaŋ na Asmode əbay zilət taksən dəsap dəndət ɓa, va an dəslə nawgəɗ sət guluk ɓa. Balamək vat tənah sətək Sara kan na: «Istə kədawbey zilŋgiɗko! Yaŋ na kəɗiyək zel buhul səkay ya tay taka səret məyuk də iya nan ɓa.

⁹ Vimi kədawzəmgəm sãhã dawnəh na zilŋgiɗuk amtaŋka di? Azbeti, adawlaŋ wətuk mizilin mãy muguluŋgut ɗah ɓa!»

¹⁰ Dəpas van na, Sara tat sãh məsəsãhta. Tətəŋgək əhəma mãy təteŋgək addəv gəla na afət an na disiŋ də əɗɗum nawlaw zəta, ya təɗɗumuk dawnəh na: Kuzuŋ ɗiy waranən əbba dawnəh na wətuk taka tə kaka na mokroko, ya yaŋ təlawək zət vi tatwãhɗe nata! Tatwãh məs nədawgəɗsən əbba's waka ama əmta. Ki in əbay zu na, dəɗah nəkkaman Maŋgəlva dəgəmgən zeŋgilew vi nədaprəm ərawən addəv ənziya naw ɓa.

Əkkam nat Sara

¹¹ Ndət ləŋ vat təl dəza təki məppan foŋgo, təkkam vaŋka: In tat əgagdokoko Maŋgəlva məgəɗ moggoni. Gagdak noki pay pakə! Kəta an kəzəməɗ pak dəgagdokok pay pakə!

¹² Gəgaŋ na, in tat əsilgin haraw kəlazoko, in tat əzi haraw akoko.

¹³ Agəmu səka dəlvəŋka, nədaprəm ɗiy ərawən ɗah əmpa ɓa.

¹⁴ Daya, kəsənəka, salala nənani. Dəf təttaka tay dərəŋgu ɓa.

¹⁵ Nərnokon iya naw mãy iya na afu aka dələv məs məsimgu adakəŋ ɓa. Taka nan ava əbba, tay də wətən maɓɓan nawzəmgəla nan ɓa; məlmən tay azan ɓa, mãy həlfən nawgəmu ka gon ɓa. Zilŋgiɗu buhul dəmtaŋ səkayə: Vimi əssaw madaraw əmpa di? Ya an əbayu tay lew azok ɓa, asna Daya apak sləmok ammba əra adawrawəni.

Məzlani ama əkkam neti ( 3:16—11:19 ) Maŋgəlva atafək əkkam na Tobit gəm nat Sara 3:16-17

¹⁶ Aka pay as vani Maŋgəlva afən gagdak aprəm əɓuhma na Tobit də an nat Sara.

¹⁷ Maŋgəlva aslənək maslay Rafayel əmbilgit sulegiti, na Tobit na, də əkdah zəga bəbar sərani vi dəmsakgən ula əkeɗeɗe na Maŋgəlva də harani; nat Sara wətən Raguwel tamə, də əpsənət sən Tobiyas wətən Tobit ka goni, gəm də əgilgin Asmode tuya mbərayən səzata, vi Tobiyas iyi dəslə nawɗiyət daabəŋ kiyit ɗiy meɓɓet vetiŋ kəta. Aka Tobit asil sə meŋgle ka kawtoŋ eŋgili, Sara wətən Raguwel tam tat əpriket səddəv gəla an na disiŋ.