Tobit 2 - Bible en Guidar

Tobit atipik daŋgar

¹ Gala əzəm məlĩ na Asarhadon, nəmdawək a nawda a Niniwe, məmndeget suwi mãy Anna ɗak nawa gəm Tobiyas wətuwa. Mədəsuwi way nenek aka pay na Paŋtekot əzləra nam məs mədaɗɗa lumu buhul sə dərɓaga Pak. Nəsawək aman kawzəmni,

² məkisuwi ma wayɗe diyɗa nenekɗe a təki nawzəma. Yaŋ nənah sən wətu Tobiyas na: wətuwa, abbal a Niniwe kəragən məssahã taka səret milmiŋgiɗim məs misimgiti, dəppan kiyən aka Daya də makran taka, akiya vi nuɗakangən way naw dəndəni; wətuwa wanəga hã an kəmilke.

³ Tobiyas mbat əkay məssahã səret milmiŋgiɗmə, yaŋ amili amna: «əbba!» Nənah sənək na «Mi dəgəɗ di wətuwa?» Azlansəwək na «Əbba, ɗəf na Israyel tay məbayni, ɗəf arrəslək wəlani yaŋ məzgan a təki məs ɗiy pak adawlanəni. Tay adak hã kakaŋka'e.»

⁴ Nəplanək way naw məza ərəŋgən ɓa, nənzawək kakara əgəm kigəbayən. Nəɗiyək ambra genzeki dawga pay ətəpa kawndəkni.

⁵ Gala nəmdaw eŋgili, nəslslayək vi kabbur zuwa, yaŋ nəzəm way naw də əɗəka.

⁶ Nəɗɗumonək əpel na məskəleŋ Amos məs apel aka Betel na: «Wəzləreɗ nokum wakkpaŋgaŋ ka gəlabaya, gəlyeɗe nokum pak wakkpaŋgaŋ gəlyeɗe na gəlabaya. Yaŋ nətəŋ əhəma.»

⁷ Siske na, səza pay atəpə, nələk əso' vovu yaŋ nəndəka.

⁸ Meggeŋgiɗu tay əmasaŋ akaw dawnah su na: geslne awda Tobit ɓa! Məkayani kawbayni aka wən zev vaska, yaŋ anzani, ya yaŋ əmpa əndik ɗiy mimtiti.

⁹ Dəfəɗ vanəska, nəslslayək vi kabbur zuwa. Nəgilik a daŋgla nawda, nəvoŋ aba zlava na daŋgla. Nəsərət kiyu ɓa sən təki kakahã.

¹⁰ Nəsən na gəla net biŋgeɗ tay aka zlava disiŋ kiywa ɓa; pilwit abətək arawa, offo azan duroɓduroɓu, yaŋ aɗɗa haraw forro. Nəmbatək ənzaɗ zu azet zloktorɗe, an tay əɗɗaŋ suwən mihã, haraw əray də metiŋgin ətipe, in kpaŋ daŋgarə. Nəsawək daŋgar zəga na əzva poɗo. Milmiŋgiɗu pak attapaŋgək aka wən nawa, Ahikar dədazga sləma akaw əɗɗa su wərayu addəv əzva sula, tak əmbat nan a Elimayis.

¹¹ Aka pay vanəski, guluk naw Anna tətəŋ wəza nawhõ gabaga.

¹² Ndət əki zəgeɗ en ɗiy attokoŋ avata, ndəɗaŋ əfaɗ sətən iya nata. Də əvoŋ buhul na təla Distros na, təgrakək əhõ gabaga taka, təki sit ɗiy dəttokotən naka, afaɗ sətən iya nata, aɗɗaŋ sətən əsoko dət hãwkə.

¹³ Dawtoŋ eŋgil na, hãw nak atəŋgək əhəma. Nəyətək ɗak nawa, nənah sət na: «Səŋga wət hãwəs ade di? An dəhãl məhãlni. Aka sit migilni. Mənam tat də tive nawzəm zəga məhãlən ɓa.»

¹⁴ Guluk naw təzlansuwək na: «əsoko məgəɗ suwa sap ama hanza nawa!» Nətaf an tənah su ɓa, nənah sətək təmndan sitgin migilni. Gədəvu adək akat sən aska. Təzlan suwək na: Ŋgay əvəl nok temtem sit məssehẽŋɗeŋ di? Ŋgahəŋ wəzaɗe mogget nok kəgəɗəŋ di? An dədawrəhuk pak arbək ta'ə!