Tobit 11 - Bible en Guidar

Əmbla na Tobit

¹ Adan agapaŋ aza walaŋgəla na Kaserine, məs haran sek aka Niniwe. Rafayel aɓsən Tobiyas na:

² «Kəsənək va afuk asan aka məplani.

³ Məndam daabəŋ kiyət guluk noko vi kawzaɓan gəla tak tədazzat dit ɗiy membirti.»

⁴ Ambataŋgək sulegit pak matakə. Rafayel aɓsən Tobiyas na: «Agəm məhhiya na kilif avoko.» Kəra na Tobiyas tay əzbeti.

⁵ Das na, Anna, ma Tobiyas tat tuŋgo aba tive. Tat səŋgəŋga ula dəka tive məs wətət adazzani.

⁶ Yaŋ tula ləŋ əzzani, təɓsən afən na: «Wətuk yandak əzzan də ɗəf an dəlhani!»

⁷ Taksən Tobiyas əgap aza afəni, Rafayel aɓsən na: «Nəsənək na hara afuk wakolu.

⁸ Atəɗok sən məhhiya na kilif arani. Miha van wagəɗ wəza aza haran forro naka, wahhiyə. Səbbərən na, afuk wasan daŋgar əmpa ɓa, wawla əkeɗeɗe'e.»

⁹ Anna ɓak vat awla wətət təwəɗə. Təɓsən na: «Nəmsawək uluko wətuwa, gəgaŋ na anəɓap əmta kana.» Ndət ɗəh əhuma.

¹⁰ Tobit le'i, təraktərak əgilyen də meŋgle.

¹¹ Tobiyas alək ələmsəni, məhhiya na kilif ambra vani. Afu' sən arani, arma lewlew aɓsən na: «Asok zuko əbba!» Aɗɗa sən mihã nak arani, ndən kaw ərmani.

¹² Sə dəbərən na, ndən zəga forro naka haran afən nak van sula sula hokhok sə maŋgava harani.

¹³ Ndəni Tobit atəwəɗ van awlani, ndən təŋ əhəm dawnah sən na: «Nəmsakək uluko wətuwa, istə harawa.»

¹⁴ Yaŋ amna: «Soko sən Maŋgəlva! Soko sən iya nan metiŋgini! Soko sit maslayɗe salala nani! Kəta iya na Maŋgəlva dəsan akamə! Soko net maslayɗe nan pak hã faɗə! Vi Daya apəkwəka, ya gəgaŋ na, in tat əmsak ula wətu Tobiyas!»

¹⁵ Tobiyas toŋ eŋgil zən neki, əgagdakan Maŋgəlva wəlan koɓo'koɓo'u. Aboton sənək afən na malaka nan atoŋguk moggoni, akiyik koɓeɗ neki gəm agəmtək Sara wətən Raguwel ka goni; anah əmpa na: «Yaŋ tat əzzata, tat go'o nawtoŋ a Niniwe.»

¹⁶ Tobit agəɗək soko sən Maŋgəlva zən neki, ndən mbat ələm sət atəni də metive na Niniwe. Səza ɗiy na Niniwe awlanən ədawa mãy əbbal petpeti, məza ɗəf aban ɓa, aggətaŋka. Tobit atələk ma abet na, Maŋgəlva awələk sãhã akani, akoluk harani.

¹⁷ Ndən gap azat Sara, ga Tobit wətəni, asɗat vaŋka: «Soko dazza, wətuwa! Soko sən Maŋgəlva nok məs dəkiyuk a namda, wətuwa! Soko sən afuko! Soko sən Tobiyas wətuwa! Soko noko, wətuwa! Atoŋ eŋgil anokda, soko dazza, əzaɓ də ənnek dəsan suko, atoŋgu wətuwa!»

¹⁸ Pay dəpas na, mə Yudeɗ na Niniwe pak annekeŋke.

¹⁹ Ahikar də Nadab gimsiŋgiɗin Tobit, azzoŋguk ananda miknihit də ənneke.