Tobit 10 - Bible en Guidar

Rafayel amilik də Tobiyas gəm Sarah, yaŋ akol hara daŋgar Tobit ( 10:1—11:19 ) Mekret mãy Tobit det Anna tay gbawgbaw

¹ Aza əvoŋ pak na, Tobit tay əŋɗan pay nadda a Rages may nawmilye. Pay nan nak toŋgu, wətən van dimil ɓa'a.

² Anah a makran na: «Wasan mətakni adaka. Awaniɓa Gabayel amtəka, ɗəf tay napsin koɓeɗ ɓa.»

³ Tobit atəŋgək əɗɗumo.

⁴ Anna, guluk nan tənahək na: «Wətu amtəka! Tay aret ɗiy mederet əmpa ɓa!» Tətəŋgək əhəma may əɓuh mat aka batam wətət dawnəh na:

⁵ «Əray akawa, wətuwa, in nəpok əmbata, istə harawa!»

⁶ Yaŋ Tobit anah sət na: «Aɓətə, kədakrap kiyuk ɓa məlmuwa, tay zayə; sessel ətap atepet adaka, vi ɗəf an dəlhan a malaka van ɗəf məs nədassel akani, taka səret milmiŋgiɗmi. Kədaɗɗum aka wən nan ɓa, məlmuwa, wamil abe siɗikke aŋka.»

⁷ Yaŋ Anna təzlan sən na: «Kədawpel su əmpa ɓa! Appan əmbəɗawa! Wətu amtəka!» Aza pay pak, ndət əgilyet pum əzi harat dəka tive an wətət agili, vi ɗəf tay məs tədawtaf əpel nan əmpa ɓa. An pay abətka, ndət ətoŋ eŋgil vi kaɓuh mata gəm kawhəm kimi məza ndət ərəh əleŋ ɓa.

Tobiyas aka əmilyen eŋgili

⁸ Səza əvoŋ kəlaw kiyən poɗo nawpeɗ məs Raguwel asway naɗɗa viyət wətən nak atoŋgoŋgu, Tobiyas pay ənah sən na: Appaw nəmbatə, vi nəsənək na afu dət maw tay əɗɗumoŋ na awluwən na ɗah əmpa ɓa. Vini, in tat əkkomoko, əbba, appaw nəmbat nəmil ana əbba da; nəboton sukuk səkay va nəplani.

⁹ Yaŋ Raguwel azlan sən Tobiyas na: «Asoko wətuwa, asok anawda. Anəslin ɗiy aza afuk Tobit. Wanah sənən wən noko.» Tobiyas aɓsən na: «O'oho, kamə appaw nəmdaw ana əbba da.»

¹⁰ Yaŋ Raguwel apsənət Sara, guluk nan ləŋgə, mãy pəɗak na arya nani: belemɗe mezeŋgleket dit məguluŋgiti, wasliɗe dit timiŋgiɗi, korɗe dit zlogomeɗi, zəgeɗ na ma gulo, koɓeɗi dit zəgeɗ paŋpaŋ diyɗa.

¹¹ Raguwel apletik əmbat zit neki. Alhanək Tobiyas dawnəh na: «Anzi zayə, wətuwa, agəɗ malaka moggoni! Kəta Daya dəlhokumgəni, is dət guluk nok Sara! In tat əŋgla kəta nulegin kirtikum tak nədamta.»

¹² Dərɓagan na anah sətək sət Sara wətən na: «Dok ana duhuk da. Gəgaŋ na, migil ziluk wassoŋ azok va mənam məs məwuko. Dok zayə, wətuwa! Nəŋgələk əprəm wən moggon akok aka in tat madarawəŋka.» Siskiŋ na asɗetike, apletik əmbataŋgə.

¹³ Edna tam tənah sənək Tobiyas na: «Wətuwa, məlmu na makrawa, kəta Daya dəmilguko! Kəta dəplaw ənziya diyɗa ka nulegin kirtuko gəm kirtit wətu Sara tak nəɓəl əmta ɓa! Aba Maŋgəlva in tat əplatsukət wətu avoko. Kədawzəmgət ɗa sahã addəv ənziya nok ɓa. Wətuwa, dok də zəzaya! Təŋ gəgaŋ na, intə moko, Sara məlmuktə. In tat əŋgla kəta məsamgən pak zay pay pak məs taka addəv enziya namə.» Siskiŋ na, Edna tətəwəɗək vat awlet sulegiti, təpletik əmbataŋ də enneke.

¹⁴ Vaski Tobiyas ambat səna Raguwel da addəv zazaya gəm ənneke, də əɗɗa soko sən Daya na disiŋ də na dəlva, məlĩ na dəlva, vi aɗɗasənək malaka təstəsə. Raguwel aɓsən Tobiyas əmpa na: «Kəta Daya dəpsuk ənnek nawɓe'sit migiluk pay pak addəv ənziya neti!»