Tobit 1 - Bible en Guidar

Əzəmsahã gəm əkkam na Tobit a Niniwe gəm nat Sara a Mediya ( 1:1—3:15 )

¹ Alabara na Tobit yaŋka, wətən Tobiyel, wətən wətən Ananiyel, wətən Aduwel, wətən Gabayel, wətən Rafayel, wətən Raguwel, pakgit zev Asiyel, mahəlfa na Neftali.

² Asanək də gəla aka dələv na Neftali kəla disiŋ ki Galile, aka dələv na Tisbe, a walaŋ Kades də disiŋ, Hasor dəmmbra pay na moskoyo gəm Fogor də mbana. Sədaki məkan aka balam aka dələv na Asiri gala pay Salmanasar asan məlĩ na delvəska.

Tobit addəv əgeslne' sən Maŋgəlva

³ In Tobit ənziya egge naw pak, nəsawək addəv gegesiŋ gəm nəgəɗək an moggoni. Nəpsitik zəga diyɗa sit milmiŋgiɗwa gəm sit ɗiy-ɗar məs məkiyit də in aka balam a Niniwe aka dələv na Asiri.

⁴ Aka gawlawa, aka nəssaw aka dələv naw na Israyel tagay, mahəlfa na dəhu Neftali pak awɗakək də zev Davit gəm də Yerusalem. Mbaraka walaŋgəla-metiŋ vanəski takərgən məs Maŋgəlva awel addəv Israyel ka mahəlfaɗe pak dəzzoŋgən adak əzaɓ-Maŋgəlva temtemi. Adaki mərka gəla na Maŋgəlva, təki nassa nani, məɗiyən ta' vi sayit ɗiy an nabe pakə.

⁵ Eket mossorgoɗe na Galile pakə, mahəlfa nawa, gebbet ɗiy na dəhu Neftali adawzaɓaŋ-Maŋgəlva sən wət wasli na meleŋge məs Yerobo'am, məlĩ na Israyel azaɓ məɗiyən ama tuya a Dan.

⁶ Naw na, ɗayɗay nədawrəh zu takərgu əmbat a Yerusalem aka pay na əzləra temtemi, va miynan a Israyel də mahenziŋ an nassa faɗə. Ɗə makraw taka, nawki uwa na zəga na mabardaw naw məs maddaabəŋ adaka, məs muwan maddaabəŋ sə gazlaŋ nawa, makəlaw net zəgeɗ memeyẽɗ nawa gəm zenze an maddaabəŋ net timeŋgiɗ nawa

⁷ in əpsit sit məsdəlveŋge kirtin Aron ka nawzaɓ-Maŋgəlva. Nəpsitik taka səddəv kəlaw na haykəmari'e, na mbazla, net heremeɗi, net tonzokɗe, na sukoyo mãy na uwa net wəleŋɗe mbirit napsit mə Levi məzəɗɗaŋ wəza a Yerusalem. Taka səddəv kəlaw masula'ən na, in əvələn, in əddaw əbayən aza əzva pak a Yerusalem.

⁸ Taka səddəv kəlaw mohoko'ən na, in əpsit mitiweɗi, gil net gəbayɗe gəm sit molhõyeɗ dəssoŋ də gəla aret mə Israyelɗe; in əkiyən gəm əpsit va aza əzva hoku amə' pakə, mənam əzəmən va aza an məɗiyən aka wən nan addəv mahenziŋ na Moyis gəm an məs Debora ma Ananiyel afəm təɗi wən nani vi əbba amtəka, appaw mitiwe.

⁹ Səza nəgap mattəŋgu na, nəgəmək guluk səddəv mahəlfa nawa. Təwəsuwək wiyna, nəlvan na Tobiyas.

¹⁰ Səza misimgim a Asiri, vi naw van misimgiwi'e, in pay a Niniwe. Milmiŋgiɗu dit ɗiy na mahəlfa naw pak tay əzəmaŋ way net ɗiy məs dəsənnən Maŋgəlva ɓa.

¹¹ Ya naw na, narma ki zu səza əzəm way net ɗiy məs dəsənnən Maŋgəlva ɓa.

¹² Adan nəɗiyək kiyu aka Maŋgəlva naw də makraw taka,

¹³ Məsəɗəɗə avayək kinenek ama hara Salmanasar. In nədalbah sən an məs man asan akan pakə.

¹⁴ Hã gap əmta nani in nədaddaw əlbasən zəga sə Medi. Vaski kan nəɗi koɓeɗ na təbəz babar kilo səkat hoku ana Gabayel məlmən Gabri aka dələv na Medi.

¹⁵ Səza Salmanasar amtə, Senakerib wətən dəzəm məlĩ a gəlani. Məvoŋgoŋ tive tahəŋ aket tiveɗ na Medi kpaŋ nawmbat aka dəlvəs əmpa ɓa.

¹⁶ Aka pay na Salmanasar, nəvələk diyɗa sit milmiŋgiɗu na mahəlfa nawa.

¹⁷ Nawɗakan way naw dit en məs mãy adawda, napsit zəga nawgul sit en zit mekeleŋ. An nawla kigəbay na taka səret milmiŋgiɗu mə Yudeɗ məzgan ki zlava na Niniwe na, nawndəkni.

¹⁸ Nawndik en məs Senakerib abay səza məska wəlan amil sə Yude, aka pay Maŋgəlva azgasən aka wən na əra məs aran pakə, intə nədawndikti vi abayək mə Israyelɗe diyɗa addəv ədagədəv nani, ya in əgəm kigəbeyit vi kawndikti; Senakerib akeyetik sam ɗarə.

¹⁹ Dəf taka sə Niniwe alək ənah sən məlĩ na, intə nədawndikti, yas nədawɗama; səza nəsən na məlĩ aprəmək wən nawa, gəm tay əkayaw nawbaywa, geslne' armuwəka in ɓak ənzawa.

²⁰ Məmõhni arya naw pakə, zəga tay appaŋ suwən ɓa, mətakni sən məlyã; abbər ɗak naw Anna gəm wətu Tobiyas appaŋ suwəni.

²¹ Əvoŋ kaklaw poɗo dətoŋgoŋ ɓa kirtin məlĩ nak sula bay əbayəni, yaŋ anzoŋ aket mossorgoɗe na Ararat. Asarhadon wətən dəgəm məlĩ agəlani; apsənək arya naka dələv nan pak ammba va Ahikar, wətən məlmu Anayel, arahək gagdak diyɗa aka ədawgən dəlva.

²² Yaŋ Ahikar akkam məlĩ ammbawa, yaŋ nəmndaw a Niniwe, Ahikar na ndəni mətiŋ napsən mbazla sən məlyã, məzərma ndama, daya nawdawgən dəlva, mərəm arya ammba Senakerib məlĩ na Asiri, gəm Asarhadon amndagan aket wəzaɗe nan va lahəŋka; əmpa na wətət məlmuwi, mbel nawi.