Sirasid 51 - Bible en Guidar

Əkkam na Yesu wətən Sirak

¹ Daya maw aka əgəɗ suk soko, is məlyã Maŋgəlva wanəɗi kiyko, is məkõhguwa, is zək noktə nədawgəɗ suk soko.

² Vi kəsokuk məkə nawa, kədek əbbah suwa, kəmõhwək səma əmta, kəkõhguwək səma mazzaɗ net məmasaŋ aka ɗəfa gəm səmət muwaŋ wəna. Aka nəsaw abet məzuseɓɗe nawa,

³ kəbbah suwəka gəm kəkõhguwək va aza memetiŋ na moggon noko gəm na iya noko, səma əhar net ɗiy məsla zit nawzawa, səvet ɗiy dəŋglaŋ əzan zeŋgilewa, gəm səddəv tatwãhɗe temtem nərdə dənɗaŋ,

⁴ kəkõhguwək səma slayoffo dəsan kiyu tərwəslə, gəm səma hərzlum offo məs in nəsɗa ɓa.

⁵ Kəkõhguwək səma kpukpum na təki nassa net ɗiy mimtiti, səma əpel mbərayən gəm səma uwa wəna,

⁶ səmet herɗe mbəreyit na hərzlum ɗəfa. In tat ama əmta, təlu taka tay a təki net ɗiy mimtiti,

⁷ Məzuseɓɗe naw akaraŋgək kiywa, ya ɗəf tay nabbah su ɓa; in tat əkay ɗəf nabbah suwa ya samə.

⁸ Yaŋ nəɗɗum aka ulasahã noko Daya, gəm aka moggon nok kədaɗɗa pay pakə, is tat əpil məs dəɗiyən əɗɗum net akoko, is tat əkõhgit səvet məsdarawɗe.

⁹ Hã səka dəlvafuŋgi əkkam naw ammbat azoko, nəkkamokuk kəgugən səma əmta.

¹⁰ Nəkkamanək Daya afən Daya nawa adapaw firik pay nawzəm sãhã naw ɓa, pay nəsaw abet məs fərkeɗ məza məzəbbah su ɓa.

¹¹ Nəppan na gabba əɗi ki iya nok ɓa, Wanəgagdakok dit gəlyaɗe nalva naɗɗa soko. Yaŋ kəprəm əkkam nawa,

¹² vi kəkõhguwək səma əza kəkõhguwək səddəv pay na tatwãhã. Vini nədawgəɗ suk soko diyɗa, əgagdakoko Daya, gəm ənah moggon noko.

Addəv əkayan maɗɗula

¹³ Aka nəsaw gawla tagayə, tak əmbat əbbala, nəkayanək maɗɗula deredere addəv əkkam nawa.

¹⁴ Aba Gəla na Maŋgəlva, nəkkamək vi nərahgəni gəm wanəkayan hã ŋgbuslu.

¹⁵ Adan aɓay va megezlembirke adawnəha, akkpaŋgək slalwãy ənneke, nədawək aka tive moggoni, nəzbanək batamən təŋ səka sawãwã.

¹⁶ Nəsokuk zu pay siɗɗike əprəmni, nətafəka, nərahək əyak diyɗa.

¹⁷ Mbəlembəle ndəni nəmmbat abe abe. Ɗəf dəvay maɗɗula wanəpsən gagdaka,

¹⁸ vi niynanək a makraw naɗɗa wəza dəndəni, nəkayanək əɗɗa moggon haraw tiptipi, maw asan na nzok ɓa.

¹⁹ Nəgayək vi nəsawgən də maɗɗula, nəgayək əɓesən mahenziŋ. Pay maɓɓani, in əkkam vaw təlla a disiŋ, ərban na nəzək sləma aka maɗɗula lahəŋ ɓa.

²⁰ Ya nəkkpaŋganək haraw akani, nəgak zu məza heslepe azaw ɓa, nərəhəka. Ndəndəni nərah əsən hã səza ətəŋga. Vini nəsaw na ɗah məzgaw firik ɓa.

²¹ Asanək megenegenew ammba əkayani, ndəni nərəh zəga moggon vanəska.

²² Daya avayək hərzləmu nawpel ka zəga na vawa, ndəndəni nədawgagdakani.

²³ Mide azawa ɗiy məs məyegeti ɓa, mətoŋ addəv əyak na maɗɗula nawa.

²⁴ Vimi kəssoŋ farfar məza dəndən avokum ɓa dəka mənokum tat əmta mãy nan di?

²⁵ In tat əhã' maw ətəlma: «Məkay ərəh maɗɗula na mekeleŋ.

²⁶ Məgul kikum ammbani vi kawrəh əyak nani! Wakərəhən go'o azokum.

²⁷ Mula də horokum na nəyə diyɗa də ərəh əffet metiŋ ɓa.

²⁸ Mətaf əyak nawa, məpsən gagdaka gəm əmpa na, ndəndən kədawrahaŋ meleŋge diyɗa.»

²⁹ Mənnek də moggon na Daya, wil adawdukumən dawɗi kiyən ɓa.

³⁰ Məɗɗa wəza nokum tak ətoŋ na pay nani, Daya wapsukum soko na vokum də pay nani.