Sefanya 1 - Bible en Guidar

Pay Yawe adawtaw wəna ( 1:1—2:3 )

¹ Əpel na Yawe ade sən Sefanya wətən Kusi, wətən Gedaliya, wətən Amarya, wətən Hizkiya, aka pay na Yosiyas wətən Ammon asan məlĩ na Yuda.

Maŋgəlva tay ətawwən aka dəlvafuŋ baymani

² Yawe aɗiyman na: Wanəzan zəga pak səka dəlvafuŋ.

³ Wanəzet ɗiy dit zəgeɗ memeyẽɗi, wanəzet biŋgeɗ na disiŋ dit kilfeŋge na pehe, wanəzet zəgeɗ dədazbərgit ɗiyi gəm məsdarawɗe, wanəzan ɗəf titir səka dəlvafuŋ, Yawe aɗiymani.

Maŋgəlva tay ətawwən aka Yuda də Yerusalem

⁴ Wanəslan vaw aka Yuda gəm aket ɗiy na Yerusalem pakə, wanəzan an dəpəl na Ba'al, may iya net məɗɗaŋ wəza nan dit məsdəlveŋge net dənɗaŋgə,

⁵ gəm məzəppu'oŋ aka təgbalka abet məzəlpaŋ na disiŋ, gəm məzəppu'oŋ aba Yawe ndəɗaŋ əswayaŋ də iya na maŋgəlva net Melek.

⁶ En dəmilyoŋ səmmba Yawe, məs awkayanən Yawe ɓa gəm assohõnən ɓa.

⁷ Məssoŋ sləɓək aba Yawe Maŋgəlva! Vi pay na Yawe go'o yi. Yawe azaɓanək əzaɓ-Maŋgəlva, abburik en ayə.

⁸ Pay nawzaɓ-Maŋgəlva na Yawe əsna, wanətaw wən aket deyeɗe dit kirtin məlyã gəm məguloŋ lukut arahaŋ doɓrok na guwa.

⁹ Dəpas na, wanətaw wən aket məveŋgeŋ ki maddamba, məzəknəhnən gəla na daya net dit zəgeɗ mumohĩt na gagay gəm də vurum.

¹⁰ Yawe aɗiyman na: pay nan na, kaprəmi vaŋvəl a maddamba net kilfeŋge, ənɗəs də əska morkoyo metiŋgin wagəɗ a walaŋgəla-metiŋ, əray metiŋ wagəɗ aket mossorgoɗe gugriɗe;

¹¹ məŋgəsl vaŋvəla, ɗiy na walaŋgəla-metiŋ na miktiki, vi məmanən vet na Kana'aŋ amtaŋka, məslaŋ gagdak na təbəz babar pak azaŋka.

¹² Ya pay nan na, wanəkkesen Yerusalem dit lalamɗe, wanətawwən aket ɗiy dəssoŋ dippi'e aka dagərgiya neti, mənahaŋ də mekret na: Yawe aɗɗa moggon ɓa, aɗɗa mbərayən ɓeŋki.

¹³ Ya kawmohõni arya neti, kawreygiti gəleɗe neti. Warkaŋ gəleɗe, assoŋ na addəvit ɓa; wampaŋ megezlembirkeɗi, asaŋ na mbazla net ɓa.

Pay na Yawe

¹⁴ Pay metiŋ na Yawe go'o yi, tay əzzan də kakara. Vaŋvəl wasan diyɗa aka pay na Yawe, məs makran dayday waŋgəl əsək səni.

¹⁵ Pay net herɗe yi pay nani, pay nawtorkoɗ ma gəm tatwãha, pay nawraya gəm naɓzlu zəga, pay na guzliyo gəm təki tiŋgbizlimi, pay na slay maŋgləvay də slaybuna,

¹⁶ pay naffon gozloro gəm vaŋvəl nalpa dit walaŋgəleɗe mərka kiyti gəm dit gəleɗe məɓeyti.

¹⁷ Wanəki tatwãh aka ɗəf titire, wadawaŋ va daŋgarɗe, vi aɗɗaŋgək mambray aka Yawe. Mbelit waggbo'oŋ va burɗuku, ki gəbeyit va pəlwa.

¹⁸ Təbəz babar də meleŋge net aɓap na əkõhgit ɓa, pay net herɗe na Yawe gəm pay na sələh nani dəlvafuŋ bayman wazlə; vi wazan zəga pakə, sesel zəga naw geslne' səni, wagəɗ aket ɗiy nammba dələv pakə.