Nehemi 3 - Bible en Guidar

Məmsaki ərka zlava na Yerusalem ( 3:1—7:72 ) Mə Yudeɗ tahəŋ əmsak ərkanən zlava na Yerusalem

¹ Daya net məsdələv Eliyasib asilik sap dit hilfiŋgiɗin en məsdəlveŋge, arkanən ma Gazlaŋ net gilewi, apeslnəni, ampenin maddambeɗe nani, apeslnən kan hã aza gəla adawyaŋ gəla məɓayən na Səkat hã gap gəla adawyaŋ gəla məɓayən na Hananeyel.

² An na maŋgeveti, ɗiy na Yeriko dərkanəni, amaŋgevet tamə, Zakur wətən Imri dərka.

³ Metive net kilfeŋge na, ɗiy na Ha-Sena'a dərkanəni; ndəɗaŋ dəkkpa'nəni, ampenin maddembeɗe nan dit zəgeɗ nawkəɗəslən gəm nawslakatən.

⁴ Na ma an neti Meremot wətən Uriya wət Hakkos dəzaɓani. Na man netis tam Mesulam wətən Berekiya wət Mesezabel dəzaɓani. Na ma as tam Sadok wətən Ba'ana dəzaɓani.

⁵ Sə man netis na, mə Tekoweɗ dəzaɓanəni, ya ɗiy en na məlĩ net dəɓe'eŋ əɗɗa wəza abet ɗiy gugriɗ na wəza van ɓa.

⁶ Yoyada wətən Pase'ah gəm Mesulam wətən Besodiya dəzaɓanən Metive məzvan. Ndəɗaŋ dəkkpa'nəni, ampenin maddambeɗe nani gəm zəgeɗ nawkəɗəslən dit en nawslakatən.

⁷ Sə man neti, Melatiya mə Gabawən dəzaɓani. May Yadon mə Meronot dit ɗiy na Gabawən gəm na Mispa tam sən təki nassa na daya na kivadələv dəgar ki məlpa metiŋ.

⁸ Na man nani Uzziyel wətən Harhaya taka net məhə̃saŋ meleŋge dəzaɓani. Sə man nan tamə, Hananiya mədə tursan dəzaɓani. Azaɓanən Yerusalem hã gap aza zlava gbimgbime.

⁹ Na meŋgevetis tamə, Refaya wətən Hur, daya na wəɗak na bərzləŋ na Yerusalem dəzaɓani.

¹⁰ Sə man netis tamə, Yedaya wətən Harumaf dədawzaɓan na mahara gəla nani; sə man nanəska, Hattus wətən Hasabneya dəzaɓani.

¹¹ Bərzləŋ an masula'ən də gəla məɓayən net maguloɗe pak, Malkiya wətən Harim dəzaɓan də Hasub wətən Pahat-Mo'ab.

¹² Sə maŋgavani, Sallum wətən Hallohes, daya na masula wəɗak na bərzləŋ na Yerusalem naki dəzaɓan dit kirtin muguluŋgiti.

¹³ Hanun dəzaɓan metive na Walaŋ, ɗiy na Zanowa dərkannən, dəziwgitinin maddambaɗe nani, zəgeɗ nawkəɗəslti gəm təbzeŋge nawslakatti, gəm azaɓanən zlava hã gap aza maddamba na Ba'arə, zəga na metər səkat sle'i.

¹⁴ Malkiya wətən Rekab daya na bərzləŋ na Bet-Kerem metive na Ba'ar azaɓani; arka, aziwgit maddambaɗe nan dit zəgeɗ nawkəɗəslti gəm təbzeŋge nan nawslakatti.

¹⁵ Metive net iŋkile mima tamə, Sallum wətən Kol-Hoze, daya na bərzləŋ na Mispa dəzaɓani; ndən dərka, dəɗupo, dəmpa maddambeɗe nan dit zəgeɗ nawkəɗəslti may təbzeŋge nawslakatti gəm zlava na ma bobok na ma təki məborən əmbat a guli nazgəl təɓ na məlĩ, hã gap a təki nawɗi təl ɗəf məzupirke sə walaŋgəla-metiŋ na Davit.

¹⁶ Balsəni, Nehemi wətən Azbuk daya na wəɗak na bərzləŋ na Bet-Sur, dəzaɓan gap abet magamasɗe na Davit, hã gap aza bobok məso'ən dəso'ə, hã gap aza gəla net ɗiy məs mekreti.

¹⁷ Balsəni, mə leviɗe dəzaɓanəni: Rehum wətən Bani dəzaɓan bərzləŋ an na man vani; Hasabiya daya na wəɗak na Keyla dəzaɓan wəɗak na bərzləŋ van a gilet ɗiy nani.

¹⁸ Səman nanəska, milmiŋgiɗit dəzaɓanəni, ana Binuwi wətən Henadad, daya na wəɗak na bərzləŋ na Keyla,

¹⁹ səman nanəs tamə, Ezer wətən Yosuwa, daya na Mispa dəzaɓan təkzləmən an na ma təki nawpeŋ addəv gəla net gəlomɗe nawgaya, aka ədoɗ na zlava vani.

²⁰ Səban nanəska, Baruk wətən Zakkay, dəzaɓ bərzləŋ masula'ən zən soksok təŋ səka ədoɗ nan hã gap a meŋgle na Eliyasib daya net məsdəlveŋge.

²¹ Balsən əmpa, Meremot wətən Uriya wət Hakkos dəzaɓan bərzləŋ nan masula'ən təŋ sə meŋgle na Eliyasib hã a metteɓ ma gəla nani.

²² Balsən na, məsdəlveŋge net ɗiy nakki va nadak dəzaɓanənən.

²³ Balsən na, Benyamin dəzaɓan də Hasub sə mahara gəla neti; balsəni, Azariya wətən Maseya wət Ananiya tam dəzaɓan an go'o də gəla nani.

²⁴ Balsəni, Binuwi wətən Henadad dəzaɓan bərzləŋ an masula'ən təŋ səza gəla na Azariya hã gap aka ədoɗ nan hã aza bezler na zlava.

²⁵ Palal, wətən Uzay tam an naba ədoɗ nani gəm naba gəla məɓayən an dəgil zollo ana məlĩ da, məs go'o də daŋgla na fərsəna. Səbbərən tamə, Pedaya wətən Pareyos,

²⁶ məɗɗaŋ wəzeɗe meɗmeɗ naddəv gəla na Maŋgəlva dəsoŋ a Ofel dəzaɓanən hã gap aza metive net Iŋkile dəmmba pay nampum aba gəla məɓayən məs dəgil zollo.

²⁷ Səban nani, mə Tekoweɗ dəzaɓanən bərzləŋ an masula'ən təŋ səza təki dəsan dakadaka də gəla məɓayən məs dəgil zollo gəm an hã gap aza gəla adawyaŋ na Ofel.

²⁸ Təŋ səka metive net Pilseŋge na, məsdəlveŋge dəzɓanəni, naway pak an na mahara gəla nani.

²⁹ Bal əmpa na, Sadok wətən Immer dəzaɓan sə mahara gəla nani. Sə man nan tamə, Semaya wətən Sekaniya, məga na maddamba nammba pay nampum.

³⁰ Səɓɓani, Hananiya wətən Selemiya dəzaɓan bərzləŋ an masula'ən də Hanun wət Salaf masləre'e. Səɓɓan tamə, Mesulam wətən Berekiya dəzaɓan an naba giziŋ nani.

³¹ Balsən na, Malkiya məhə̃s meleŋge dəzaɓan hã gap aza gəla net məɗɗaŋ wəza meɗmeɗ naddəv gəla na Maŋgəlva dit məmanən veti, dakadaka də metive na Mifkad hã gap aza giziŋ na gəla məzarŋgasla, naka əŋzla na zlava.

³² Awalaŋ giziŋ gəla məzarŋgasla, naka əŋzla na zlava də metive net Gilewi, Məhə̃saŋ meleŋge dit məmanən vet dəzaɓanəni.

Məzuzelɗe tahəŋ əŋgla əziwgin wəza

³³ Adan Sanballat aprəm na, mənam tat ərkan zlava na, herɗe agəmnənka, gədəvən adək sawɓa; amasək aket mə Yudeɗi.

³⁴ Yaŋ kan adawpel abet hilfiŋgiɗin gəm vanday net məzəlpaŋ na Samari, amna: «Miyi mə Yudeɗ məddektiŋ tam adaɗɗaŋ di? Azet na wazaɓanən gəm kawzaɓaŋ-Maŋgəlva sa? Azet na waggrakənən dəpaŋ, də əmsak əɗɗa wəza dit gərmeŋge nammba burɗuk məs offo apuh sa?»

³⁵ Tobiya mə Ammon tay a maŋgavani, yaŋ amna: «Dərkanən nak ɓa sa! An balway apeŋgik aka zlava net gərmeŋge netis na waɓzlu viliŋgi!»

³⁶ «Aw Maŋgəlva namə aprəma, vi məkkpaŋgək zəga net wili! Akkpaŋgan əmas net aketi. Appet sit ɗiy nawmõhə̃t nawket ka belemɗe aka dələv maɓɓan.

³⁷ Kədawɗaman heslepe net ɓa, mambray net adavvuy səbok ɓa. Vi aretinik mərkanən zlava!»

³⁸ Mərkak zlava, zlava azaɓək bayman hã gap wəɗak na əɓay nani. Mekret ɗiy asilik naɗɗani.