Matiye 9 - Bible en Guidar

Yesu tay əmbəlgən ɗəf məɓrukun

¹ Yesu atoŋguk addəv bəlay, aggar əmndan a walaŋgəla-metiŋ nani.

² Aki sənənək ɗəf zə məmtən məvoŋgən aka zəga nawvoŋgo. Adan Yesu awla ətaf neti, aɓsən ɗəf zə məmtən nak na: Asok zuko wətuwa, mambray nok avviko.

³ Yaŋ mərbaŋ-mahenziŋ meɓɓet anahaŋ a walaŋ zit na: Ɗəfəŋ tay əran Maŋgəlva.

⁴ Adan Yesu awla əɗɗum neti. Amna vimi kədaɗɗumoŋ mbərayən vas a mokrokum di?

⁵ Mi məza tuwãhi ɓa kan di? Ənah sən ɗəf na mambrayɗe nok avvuyoŋko sa awaniɓa ənah sən na: Asili doko?

⁶ Ya ka kəsənəngən na: Wətən Ɗəf tay də gagdak navvuyon mambray aka dəlva, yaŋ aɓsən ɗəf zə məmtən nak na: Asili, agəm zəga na əvoŋ noko, dok anokda.

⁷ Asilke, ambatək eŋgil ananda.

⁸ Adan ɗiy awlanəni, geslne armeke agagdakanənək Maŋgəlva məs dəpsit gagdak vas sit ɗiyi.

Yesu tay əya Matiye

⁹ Yesu ambatək sədaka. Yaŋ awla ɗəf tuŋngo addəv gəla nawfaɗ nzalaka, iya nan na Matiye. Yesu aɓsən na: Azbawa, yaŋ asil azbani.

¹⁰ Adan Yesu asan kawzəm eŋgil ana Matiye da, məkkalaŋ nzalaka diyɗa dit ɗiy məs mambrayɗe, azzoŋguk əzəm də Yesu gəm dit gewleɗ nani.

¹¹ Farisaɗe awlanəni, aɓsitin gewleɗ nan na: Vimi Mərbəzəga nokum adawzəm dit məkkalaŋ nzalaka gəm dit məs mambrayɗe di?

¹² Adan Yesu aprəma, amna: Ɗiyen də zay na gəɓa zitiŋ də wəray na zloktor an məs gbəgbaɗeŋ ɓa ɓa.

¹³ Məddoŋ məyagan an dəɗam addəv wənəŋka, ulasahã nəŋgələ, əzaɓ-Maŋgəlva yi ɓa. Vi naw nəde vi kawye ɗiy en salala ɓa, abbər ɗiy mbəreyit ɓa.

Yesu gəm əɗɗa meme

¹⁴ Yaŋ gewleɗ na Yohanna azzoŋ aza Yesu, assohõnən na: Vimi mənam dit Farisaɗe mədaɗɗa meme, ya gewleɗ nok na aɗɗaŋ meme ɓaŋ di?

¹⁵ Yesu aɓsit na: Ya ɗiy məyet a təki əɓel waɗɗaŋ meme an məzuɓel tay dənɗaŋ sa? Pay wade məs məzuɓel asan na azet ɓa, asna waɗɗaŋ meme.

¹⁶ Ɗəf tay nawɗi sən lukut məzvan də gabaga meleketen ɓa, vi gabaga meleketen watəɗ lukut məzvani, əŋgar nan wasan day ki lahəŋ əmpa.

¹⁷ Awziyaŋ mbazla na meketepe addivit kenekeneɗ məzvet ɓa. Vi kenekeneɗ waɓahaŋgə, mbazla wambat afuŋ pakə, kenekeneɗ warayaŋgə. Ɗəɗah əzi mbazla na meketepe addivit kenekeneɗ meleketeti vasna sulegit pak wassoŋgu.

Əmbla nat gulku gəm əsilye nat waŋ səka əmta

¹⁸ Aka adawpel sit aka wənəska yaŋ ɗəf metiŋ ade agduk aban dawnəh na: «Wətu təmtək yaŋ gəgaŋkəŋka, ade aɗi vok akata, watəmbələ.»

¹⁹ Yesu le' dit gewleɗ nani, azbani.

²⁰ Guluk tat adak də gbəgba' na əzəlaha əzva kəlaw kiyən sula. Tədder azan dərɓagani, tərəŋgən gabba lukut nani.

²¹ Vi təɗɗumuk na: An nərəŋgənək lukut nan kaka'ə, wanəkõhu.

²² Yesu haran kpaŋgəni, awləta amna: «Asok zuko wətuwa, ətaf nok akõhgukko. Guluk nak təmbələk aka pay nanəs ləŋgə.»

²³ Adan Yesu agap eŋgil ana ɗəf metiŋ da naka, awle muffoŋ pozloro gəm ɗiy məskaŋ morkoyo,

²⁴ amna: Məgili, vi waŋ vat təmtə ɓa, əleŋ tədawleŋge. Yaŋ adawmasaŋ akani.

²⁵ Adan məgilgit ɗiyi, ndən toŋ vat waŋ nak kãwə, yaŋ waŋ vat təfɗahə.

²⁶ Alabara van atrayək aka va na dələv van pakə.

Yesu tay əkol heret deŋgerɗe sula

²⁷ Aka Yesu adaddan sədaka. Deŋgerɗe sula azbanənək də əŋzla vaŋvəl na: Aw awəl sahã akamə wətən Davit.

²⁸ Adan atoŋ eŋgili, deŋgerɗe sula nek payaŋ azani, Yesu aɓsit na: «Kətafənək na wanəɓap əɗɗani sa?» Azlan sənən na: «Ha'aw Daya.»

²⁹ Yaŋ arəŋgən heret dawnəh na: «Dəgəɗ sukum va ətaf nokum.»

³⁰ Yaŋ heret akolu. Yesu ahẽyẽt dawnəh na: Mərma mokum ɗəf adawsənən ɓa.

³¹ Ya səza ambataŋgə, atrayanənək alabara nan aka dələv nan pakə.

Yesu tay əmbəlgən goryom

³² Adan adaddoŋgu, ɗiy akiyaŋ sənənək ɗəf goryom mərma hərzləmən, tay də tuya akani.

³³ Səza Yesu agilgin tuya səkani, goryom nak təŋ əpele. Ɗiy aggətaŋgək diyɗa aɓɗaŋ na: Mula yi zəga vaŋ ɗah a Israyel ɓa.

³⁴ Farisaɗe aɓɗaŋ na: Də gbogboŋ na məlĩ net tuyeŋɗe adarɓih tuyeŋɗe.

Yesu tay ula sahã aka vanday net ɗiyi

³⁵ Yesu abbalək a walaŋgəleɗe gugriɗ dit walaŋgəlaɗe memeɗeŋɗe pak əɗɗa əyak addəv gəla nakkam net mə Yudeɗi, də əpel Wən Nenek na məlĩ na Maŋgəlva, gəm ənzaɗ zev gbəgba'a də əray zev awandi pakə.

³⁶ Adan awla vanday net ɗiyi, awələk sahã aketi, vi ayaŋka hompok-hompokuŋ va timiŋgiɗ məs tahəŋ də məzutaɗa ɓa.

³⁷ Yaŋ aɓsit gewleɗ nan na: Əbəl tay diyɗa ya məɗɗaŋ wəza nan tahəŋ diyɗa ɓa.

³⁸ Məkkaman Afən əbəl kana vi dəsləngən məɗɗaŋ wəza a təki əbəl nani.