Matiye 7 - Bible en Guidar

Kədawtaw wən aket ɗiy meɓɓet ɓa

¹ Kədawtawaŋ wən aka ɗəf ɓa, vi adawtaw wən akokum ɓa.

² Vi wataw wən akokum va kətawən wən aket ɗiyi, zəga məs kədawslenin ɗiy dəndənəŋka, dəndəni adawslukuməni.

³ Vimi kədawla kevile ara məlmuko, ya kawla motoffo məs dəsan arok ɓa di?

⁴ Vimi kədawnah sən məlmuk na appaw nəgəm suk kevile səroko yaŋ nok van motoffo tay aroko'e di?

⁵ Məs muluvuluvu, agilgən motoffo sərok daabəŋ, asna akəwəl lewlew nawgəm kevile səra məlmuko.

⁶ Kədapsitin zəga salala sit kirɗe ɓa, vi adawmə'aŋ akokum kawbakokum ɓa. Kədazgetin averzleɗ na sləma nokum sit vedemɗe ɓa, vi adawndapetin də tilit ɓa.

Məssõhu, məkayani, mərga maddamba

⁷ Məssõhu wakərəhaŋgə. Məkayani wakərəhəni, mərga maddamba kawkol sukumi.

⁸ Vi ɗəf dəssõh pak warahə. Ɗəf an dəkayani warəha. Ɗəf an dərga maddamba kawkol səni.

⁹ Awaniɓa ɗəf naway sərokum wətən adassohon memteke na, ndən kapsən gərəm di?

¹⁰ Awaniɓa adassohon kilif na, ndən kapsən dohõ di?

¹¹ Munokum mbəraykum dərəŋ kəsənənək əpsit zəgeɗ mogget sit kirtukum. Mbari Afukum na disiŋ apsit na zəga moggon sit məzəssohonən ɓaŋ di?

¹² An məs kəŋglaŋ ɗiy dəɗɗan sukuməngəni, məɗɗa sit vaska. Aski mahenziŋ dit məskəleŋɗe kpakə.

Maddammba feŋge

¹³ Mətoŋ kəla maddamba feŋge. Vi maddamba an viŋ də tive an tay tuwãh ɓa, a təki nawza adawkaŋ ɗəfa, ɗiy diyɗa tahəŋ məzəddoŋ dədaka.

¹⁴ Ya maddamba an feŋge gəm tive an gargar məzukaŋ ɗəf a təki na zeŋgile, məzəzbanən tahəŋ diyɗa ɓa.

Məskəleŋɗe məwaŋ wəna

¹⁵ Məzi zukum azet məskəleŋɗe məwaŋ wəna, tahəŋ əzzoŋ azokum va timiŋgiɗi, ya diddivit na kirɗemuyã vorgomohɗiŋ.

¹⁶ Wakəsinin aza wəza neti. Kawɓuhi uwa na megezlembirke səket gedirgeɗi awaniɓa uwa na sokoyo səka tintif sa?

¹⁷ Wəlaŋga moggoni kirtin mogget adawa, wəlaŋga mbərayən kirtin mbəreyit adawa.

¹⁸ Wəlaŋga moggoni awə na kirtin mbəreyit ɓa, wəlaŋga mbərayən awə na kirtin mogget ɓa.

¹⁹ Wəlaŋga an awa kirtin mogget ɓa pak, kawbəlni, kazgani aka offo.

²⁰ Vaski kan kədawsinin aza uwa neti.

Əpelin gəm əɗɗani

²¹ Məzunah su na: Daya, Daya paki nawtoŋ məlĩ na disiŋ abbər məgəɗ əŋgla na Afu na disiŋ ɓa.

²² Pay nani, ɗiy diyɗa wanahaŋ suwən na: Daya, Daya! Də iya nok məgəɗ kəleŋ, də iya nok mərɓih tuyeŋɗe, də iya nok məgəɗ sekeneɗ diyɗa ɓa sa?

²³ Asna wanəzlan sit na: Nəsənkum ɗah ɓa, məzar səzaw faraɗa, mənokum məɗɗaŋ wəza mbərayən.

Gəleɗe sula

²⁴ Ya məs dəprəm əpel nawəŋ pakə, dəgəɗ wəza dəndəni, agilik va ɗəf məs maɗula, dərka gəla nan aka milɓe.

²⁵ Yaŋ buwən aziyə, məlpeŋɗe azzoŋgu, barkataŋɗe asilyoŋgu, arɓəzlaŋ aka gəla vani, ya dəɓəzl ɓa vi mərkan aka milɓe yi.

²⁶ Ya məs dəprəm əpel nawəŋ pakə, dəgəɗ wəza dəndən ɓa, agilik va ɗəf məza maɗulan ɓa, dərka gəla nan aka hoyoŋko.

²⁷ Yaŋ buwən aziyə, məlpeŋɗe azzoŋgu, barkataŋɗe asilyoŋgu, arɓəzlaŋ aka gəla vani, aɓəzl əbzla mbərayən.

Gagdak na Yesu

²⁸ Adan Yesu agrak əpeləska, ɗiy pak aggətaŋgək aka əyak nani,

²⁹ vi dəpel sit va net mərbaŋ-mahenziŋ net ɓa, apel sitik də gagdaka.