Matiye 23 - Bible en Guidar

Əsla zə ɗəf səzet mərbaŋ-mahenziŋ dit Farisaɗe

¹ Yaŋ Yesu apel sən gboŋ net ɗiy gəm gewleɗ nani,

² amna: Mərbaŋ-mahenziŋ dit Farisaɗe assoŋguk a təkinarbawən na Moyis sit ɗiyi.

³ Məɗɗa gəm məzban an adawpeleŋ sukumən pakə, ya kədazbanən wəza net ɓa, vi wapeleŋgi ya aɗɗanən na ɓa.

⁴ Vi tay iynaŋ zəga gagdaka, əɗinən a ma wəlet ɗiyi, ya net na, awŋgəmaŋ ərəŋgən də pərəm vet dayday ɓa.

⁵ Əɗɗanən wəza net pak vi ɗiy duleningəni. Ndəɗaŋ əslosloproketin filakterɗe neti, ndəɗaŋ əɗɗaŋ moksoy zezek aza gabba lukut net.

⁶ Aŋglaŋgək əssoŋ a təki na sləma a təki na əzəma gəm əssa aket mezeŋgeɗ nabe addəv gəla nakkal net mə Yudeɗi.

⁷ Aŋglaŋ ɗiy dəsɗetingin a lumiɗi gəm əprəm ɗiy əyet na Mərbəzəga.

⁸ Ya nokum, kədangəmaŋ əyəkum na mərbəzəga ɓa, vi mərbəzəga nokum taka yi kaka'ə, munokum pak məlma kənanaŋgə.

⁹ Kədawyaŋ ɗəf taka aka dələv na əbba ɓa. Vi munokum tat də Afukum taka a disiŋ.

¹⁰ Kədawkayaŋ ɗiy dəyukuməngən na məsənaŋzəga ɓa, vi məsənzəga nokum takay kaka'ə, ndəni Kristu.

¹¹ Ɗəf an metiŋ na walaŋkum, wasan məgəɗ wəza nokum.

¹² Ɗəf an dəɓaygən kizən pak kawɓe'gəni. Ɗəf an dəɓe'gən kizən pak kawɓaygəni.

Muluvuluvu net mərbaŋ-mahenziŋ də an net Farisaɗe

¹³ Əray akokum, munokum mərbaŋ-mahenziŋ dit Farisaɗe, məs muluvuluvuɗe, munokum tat əmpan maddamba na məlĩ na disiŋ səbet ɗiyi. Munokum zək nokum vani, kawtoŋgoŋ ɓa, ya kəppetin ɗiy en dəŋglaŋ ətoŋ dətoŋgoŋgən ɓa. [

¹⁴ Əray akokum, munokum mərbaŋ-mahenziŋ dit Farisaɗe, məs muluvuluvuɗe, munokum tat əzəmən arya net gil net gəbayɗe, kawbay heret ɗiy na munokum tat ənziyaŋ diyɗa aka əkkam. Vini kawtawni wən akokum na daraw.]

¹⁵ Əray akokum, munokum mərbaŋ-mahenziŋ dit Farisaɗe məs muluvuluvuɗe. Munokum tat əbbalan pehe mãy dələv pak vi kawrəh ɗəf an nawtaf əzba nokum tətaka daydayə. An kərahaŋka, munokum əkkpaŋgan wətən offo məs amta ɓa day kikum təl sula.

¹⁶ Əray akokum, deŋgerɗe məkdəhaŋ deŋgerɗe. Munokum mənahaŋ na: Ɗəf dəsway də Gəla na Maŋgəlva pak nan ɗari, ya an aswayək də meleŋge naddəv Gəla na Maŋgəlva, asna dəknahan əsway nani.

¹⁷ Dərweŋge, deŋgerɗe, mi an dəday di? Meleŋge sa, Gəla na Maŋgəlva məzəkkpaŋgan meleŋge salalaŋ sa?

¹⁸ Munokum tat ənahaŋ əmpa na: Ɗəf an dəsway də matuya pak, tay də əŋɗa ɓa, ya an aswayək də əvəl an naka matuya, asna dəknahan əsway nani.

¹⁹ Deŋgerɗe, mi də an dəday di? Əvəl sa, matuya məs dədakkpaŋgan əvəl nakan salalaŋka?

²⁰ Ɗəf an dəsway də matuya, nan də matuya gəm də zəga nakan pak aswayə.

²¹ Ɗəf an dəsway də Gəla na Maŋgəlva, də Gəla na Maŋgəlva gəm də Maŋgəlva məs dəsan addəvən aswayə.

²² Ɗəf dəsway də disiŋ, aswayək də mazaŋga na məlĩ na Maŋgəlva gəm də an dəsan akani.

²³ Əray akokum, munokum mərbaŋ-mahenziŋ dit Farisaɗe, məs muluvuluvuɗe. Munokum tat əpsənən kəlaw na zəga nokum sən Maŋgəlva səzet teɓ net zeŋgeli, teɓ na anisa, teɓ na algaru, ya munokum tat əzgətaŋ kiy wən an metiŋgin naddəv mahenziŋ əɗɗa an dəslə, də ulasahã, də ətafa. Eskiŋ zəgeɗ nazba pay pakə. Ya kədawgəsetin meɓɓet ɓa.

²⁴ Deŋgerɗe, məkdəhaŋ deŋgerɗe, munokum tat əgəmən birte səra zəga nawsa nokum, ya munokum tat əsanən də zlogomo pakə.

²⁵ Əray akokum, munokum mərbaŋ-mahenziŋ dit Farisaɗe, məs muluvuluvuɗe. Munokum tat əɗetin gəɓet hĩlĩŋgiɗ nawsa zəga nokum də gəɓet kasliɗe nokum, ya gədivit aknahək də wəhala gəm də əssa məza helze ɓa.

²⁶ Munokum Farisaɗe deŋgerɗe, məɗet gədivit hĩlĩŋgiɗ nawsa zəga nokum daabəŋ tagay, asna gəɓet wasan salala.

²⁷ Əray akokum, munokum mərbaŋ-mahenziŋ dit Farisaɗe, məs muluvuluvuɗe. Munokum tat va magamasɗe məɗɗa sit ɗama ulaŋ dəppaka moggeti, ya gədivit aknahək dit slesleŋɗe net ɗiy mimtiti gəm əŋgəna zev awandi pakə.

²⁸ Nokum pak vas kənanaŋgə, appaka ɗiy təstəs kənanaŋ ama haret ɗiyi, ya kəladdəvkum kəknahaŋgək də muluvuluvu gəm də mbərayən pakə.

²⁹ Əray akokum, munokum mərbaŋ-mahenziŋ dit Farisaɗe məs muluvuluvuɗe. Vi munokum tat ərkanən net məskəleŋɗe, munokum əbayaŋ sitin gawla sit magamasɗe net ɗiy en təstəssə.

³⁰ Yaŋ kədawnahaŋ na: Va mənam tat pay net efiŋgiɗəm na, məsler na dənɗaŋ kawbay məskəleŋɗe ɓa.

³¹ Munokum tat əpel aka zukum tusso vi kirtit ɗiy dəbeyin məskəleŋɗe kənanaŋgə.

³² Nokum kəknahanənək an efiŋgiɗkum atəŋgaŋgə!

³³ Dohõɗe, zeŋvit barwayɗe. Mbarmbar kədawkõhoŋ səma ətawwən nawmbat addəv offo məs amta ɓaŋ di?

³⁴ Vi wən nani nədawslən məskəleŋɗe, məs maɗɗuleti gəm mərbaŋ-mahenziŋ yaŋ azokum. Sə weleŋti, wakəbeyin ɗiy meɓɓeti, wakilewin ɗiy meɓɓet aka məzliwrihe, wakəvirin ɗiy meɓɓet addivit gəlaɗe nakkal nokum, wakərɓehetin sə walaŋgəla-metiŋ aŋka aŋka.

³⁵ Ka mbel net ɗiy en təstəs dəziyaŋ aka dəlvəŋ pak, təŋ səza mbel na Abel məs təstəssə, hã gap mbel na Zakari wətən Baraki an məs kəbayaŋ a walaŋ Gəla na Maŋgəlva də matuya dəkkpaŋgaŋgən akokum pakə.

³⁶ Gesiŋ nədawnah sukum: As pak wakkpaŋ aka sayit ɗiyəŋki.

Yesu tay əɓuh man aka Yerusalem

³⁷ Yerusalem, Yerusalem, is məbay məskəleŋɗe, məskə en məslən azok dit gərmeŋge. Təl gbəgbar nəŋgəl əkkelet ɗiy nok va gəmnda adakkelet kirtin ammba persleken di, ya kəŋgereŋ ɓa.

³⁸ Ya məppani gəla nokum va kapta-muyã.

³⁹ In tat ənah sukum: Sessel, kuləwən na ɗah ɓa təŋ kakaŋka, hã gap mənokum ənahaŋ na: Əzaɓ aka ɗəf an dədazzan də iya na Daya.