Matiye 22 - Bible en Guidar

Wənməkkpaŋga na way na əɓele

¹ Yesu apel sitik wənməkkpaŋga maɓɓan əmpa, aɓsit na:

² Məslani məlĩ na disiŋ də məlĩ məs dədaɗɗa əzləra na əɓel na wətəni.

³ Aslənik belemɗe nan əye ɗiy en məyet a wəzləra, ya də ngəmaŋ əzzoŋ ɓa.

⁴ Yaŋ aslən belemɗe meɓɓet dawnəh na: Mənah sit ɗiy məyet na: Mətawi wəlet medgeɗgeɗe dit zəgeɗ memeyẽɗ məkərti zəga nawzəm pak mədani. Zəga pak məzaɓani, məde a wəzləra.

⁵ Ya net dəzgaŋ sləma ɓa, ndəɗaŋ mbatə, an dəl a gulyo ananda, an dəl əman vani,

⁶ ɗiy dembirgit armeninik belemɗe neki azəmgitin sahã, abaynini.

⁷ Gədəv məlĩ adəka, aslənik məzəlpaŋ nani azet məbayaŋ gəbay neki, azla walaŋgəla-metiŋ neti.

⁸ Yaŋ aɓsit belemɗe nan na: Mədani zəga na əzləra na əɓəl səkay, ya ɗiy en məyet dədahaŋ nazzoŋ ɓa.

⁹ Məddoŋ kan aka zləzlaŋgbra tiveɗ pakə, məye ɗiy en kərəhaŋ pak dəzzoŋ a wəzləra na əɓele.

¹⁰ Belemɗe addoŋguk aket tiveɗi, akkeletinik ɗiy en arahaŋ pakə, en mbəreyit dit moggeti. Gəla nawɓel aknahək dit ɗiy məyeti.

¹¹ Adan məlĩ atoŋ kawle ɗiy məyeti. Awələk ɗəf aweleŋgit ɗiyi, məs dəgul lukut nawɓel ɓa.

¹² Yaŋ anah sən na: Baynawa mbari kətoŋ aŋ məza lukut nawɓel ɓaŋ di? Dərah nawzlan sən ɓa.

¹³ Yaŋ məlĩ anah sit məɗɗaŋ wəza na: Məɓruk tələn də van pak məzgan ara guzli nappaka, dəhəmgən də əmpəran slayən adaka.

¹⁴ Vi ɗiy məyet diyɗaŋ ya en məwelit siɗikkeŋ.

Nzalaka məfaɗ sən məlĩ metiŋ

¹⁵ Yaŋ Farisaɗe akkalaŋgə, asapanənək met va adarmanən Yesu də wəpele.

¹⁶ Asləninik gewleɗ net dit ɗiy na Herodə azan dawnəh na: Mərbəzəga, məsənək na təstəs kənani, is tat ərban tive na Maŋgəlva də gegesiŋ kawgeslne sit ɗiy ɓa, vi nok kawelet ɗiy ɓa.

¹⁷ Anah səm əɗɗum nok kan ɗa: Tive tay nawfaɗ nzalaka sən Kaysara sa, tay ɓa?

¹⁸ Yesu asənək əɗɗum net mbəraynəŋka, aɓsit na: məs muluvuluvuɗe, vimi kədawlanən an nazaw di?

¹⁹ Mərban su suley nawfaɗ nzalaka vani. Arban sənənək suley na təbəz babara.

²⁰ Yaŋ aɓsit na: Aŋ foto na naway də əverəŋ di?

²¹ Azlan sənənək na, na Kaysara. Yaŋ aɓsit na: Məpsən Kaysara an dəslə aza Kaysara, məpsən Maŋgəlva an dəslə aza Maŋgəlva.

²² Adan aprəmən əzlanəska, aggətaŋka, yaŋ appanən ambataŋgə.

Əssõh aka wən na əsilye net ɗiy mimtiti

²³ Pay dəpaska, Sadukiɗe azzoŋguk azani. (Ndəɗaŋ məzunahaŋ na əsilye səka əmta tay ɓa.) Assohõnən na:

²⁴ Mərbəzəga, Moyis anahək na: An ɗəf amtək məza əppa kirin ɓa, məlmən dəzəmgən gəla azat guluk nani dəɗisəngən zev məlməni.

²⁵ Ya ɗiy meɓɓet tahəŋ awalaŋgəm də məlma zit buhul. An daabəŋ aɗiyək gulku ndən zamə, məza zeŋve ɓa, mbagət guluk nan sən məlməni.

²⁶ Masula'it vaska'a, mohoko'it pak vaska'a, hã gap aza ma buhuleti.

²⁷ Dərɓeget pakə, guluk nak zamə.

²⁸ Ya vas kan na pay əsilye səka əmta na ga nawa tədawsat səmmbet buhulis di? Vi ndəɗaŋ pak aɗitənka.

²⁹ Yesu aɓsit na: Munokum tat əzlzlaɓa, vi kaprəmnən gabba an məverin addəv Ɗerewel na Maŋgəlva ɓa, gagdak na Maŋgəlva ɓa.

³⁰ Pay əsilye səka əmta, zel agəmaŋ na gil ɓa, gil agəmaŋ na zel ɓa, kassay va maslayɗe a disiŋ.

³¹ Dəwəl sən əsilye səka əmta na, kəŋɗanən an məs Maŋgəlva apel sukum dawnəh na:

³² Naw intə Maŋgəlva na Abraham gəm Maŋgəlva na Isak, Maŋgəlva na Yakob. Maŋgəlva net ɗiy mimtiti yi ɓa, Maŋgəlva net ɗiy medereti yi.

³³ Ɗiy dəprəmnən aggətaŋgək aka əyak nan sawɓa.

Mahenziŋ an dəday pakə

³⁴ Adan Farisaɗe aprəmənən na Yesu adayək kiyit Sadukiɗe də wəpel nani, akkalaŋka.

³⁵ Ɗəf taka səwaleŋgit mərbə-mahenziŋ assohõn vi kawla nazani.

³⁶ Mərbəzəga mahenziŋ awani day di?

³⁷ Yaŋ azlan sən na: Aŋglu Daya Maŋgəlva nok də mokrok pakə, də megenegenok pakə, də maɗɗulok pakə.

³⁸ Ndəni mahenziŋ an maddaabəŋ an dədayə.

³⁹ Ma sula'ən tay va ndəni'e. Aŋglu meggok va kəŋglu ki zuko.

⁴⁰ Mahenziŋ də wəpel net məskəleŋɗe pak asapaŋgək addivit mahenziŋɗe suleski.

Kristu gəm Davit

⁴¹ Adan Farisaɗe akkalaŋgə, Yesu assohẽtik na:

⁴² Mbari əɗɗum nokum aka Kristu di? Wətən naway di? Aɓsənən na: Wətən Davit.

⁴³ Yesu aɓsit na: Mbari kan Əmpəs anah sən Davit aya na Daya dawnəh na:

⁴⁴ Daya anah sən Daya naw na: Asok aka dəzəŋ nawa, hã gap an nəvoŋgitik məzuzelɗe ammba təlko di?

⁴⁵ Ya an Davit ayak na Daya, mbarmbar adawsan wətən di?

⁴⁶ Ɗəf tay dəzlan sən əpel tətaka ɓa, təŋ səza dəpaska ɗəf tay dəda kiyən ɗah əssohon wən ɓa.