Matiye 20 - Bible en Guidar

Məɗɗaŋ wəza addivit megezlembirkeɗi

¹ Məlĩ na disiŋ agilik va Afən guli net megezlembirkeɗ dəgil də mompumo pum vi kawkay məɗɗaŋ wəza a guli net megezlembirkeɗ nani.

² Aslerik dit məɗɗaŋ wəza aka suley aza pay pakə, aslin a guli net megezlembirkeɗ nani.

³ Agilik əmpa də təbəz vaytakə, awlek ɗiy meɓɓeti tahəŋ ziwziw a gəla lumu, də meti.

⁴ Aɓsit na: Nokum pak məddoŋ a guli net megezlembirkeɗ nawa, a nəfaɗ sukum an məs dəslə azokum.

⁵ Addoŋguk a guli ananda. Yaŋ agil tataŋpay əmpa, agilik də təbəz hoku'e aɗɗak va an lahəŋka.

⁶ Agilik də təbəz sle əmpa, arəhik ɗiy meɓɓet tahəŋ ziwziw a gəla lumu də meti. Assohotike vimi kədasɓətaŋ aŋ huruɓ də mokum di?

⁷ Azlan sənən na: Vi ɗəf tay dəgəməm aka wəza ɓa. Anah sit na: Nokum pak məddoŋ a guli net megezlembirkeɗ nawa.

⁸ Adan pay atəpə, afən guli net megezlembirkeɗ aɓsən daya na wəza nan na: Aye məɗɗaŋ wəza, afaɗ sit deleɗ neti, ətəŋgən dit en meddirɓe əbay man dit en maddaabəŋ.

⁹ En na təbəz sle azzoŋ kana, yaŋ arəhaŋ naway di pak suley taka taka.

¹⁰ En maddaabəŋ azzoŋ tamə, azet na warəhaŋ dayki aska, yaŋ arahaŋ net pak suley taka taka.

¹¹ Səza atafən na aɗɗaŋgək wərwər aka afən gulyo.

¹² Aɓɗaŋ na: Ɗiyeŋki dərɓedərɓe azzoŋgu, təbəz taka aɗɗaŋ kaka'ə, yaŋ kəfaɗ sit dakadaka də mənam məs məzəmsahã ara pay sla'sla huruɓu.

¹³ Yaŋ azlan sən ɗəf taka səmmbeti, amna: Baynawa, nəgəɗ suk mataka taka ɓa. Məsler də'is aka suley taka ɓa sa?

¹⁴ Agəm suley noko, doko, naw nəŋgəl kawfaɗ sən ɗəf an meddirɓe gba noko.

¹⁵ Ya nəɓap na əɗɗa wəza dit suleyɗe naw va nəŋgəl ɓa sa? Awaniɓa kotorok kəgəɗ vi nəsaw moggow sa?

¹⁶ Vaski ɗiy en meddirɓe wakkpaŋgaŋ ɗiy en maddaabəŋ, ɗiy en maddaabəŋ wakkpaŋgaŋ ɗiy en meddirɓe.

Yesu tay əpel aka əmta gəm əsilye nan səka əmta təl mohokoni

¹⁷ Adan Yesu adaddan a Yerusalem, andek gewleɗ nan kəlaw kiyit sula takərgiti. Aka tive na, apel sitike, amna:

¹⁸ Mənam tat əpeŋ a Yerusalem yaŋka, wapsənən Wətən Ɗəf avet deyeɗe net məsdəlveŋge dit mərbaŋ-mahenziŋ. Watawən wən namta akani.

¹⁹ Wapsətin avet ɗiy-ɗarə, wamasaŋ akani, wavərnəni gəm wakkpa'nən aka məzliwrihe. Pay mohoko'ən wasil səka əmta.

Wəssõh nat met mãy Yakob də Yohanna

²⁰ Yaŋ met kirtin Zebede təzar aza Yesu dit kirtita. Tuppu'u gəm təssõh zəga avani.

²¹ Yesu anah sət na: Mi kəŋgəl di? Təɓsən na: Kəta aɗi wən nan na, kirtu suleŋ dəssoŋgən taka aka vok dəzəŋ, taka aka vok zlaɓay addəv məlĩ noko.

²² Yesu azlani amna: Kəsənən an kədassohoŋ ɓa. Wakəɓapən wəsət huloŋguk na tatwãh məs nədawsa van sa? Aɓsənən na: Waməɓapa.

²³ Yaŋ Yesu aɓsit na: Wakəɓapən wəsət huloŋguk na tatwãh nawa, Ya wən nasa aka dəzəŋ naw gəm aka zlaɓay naw na, intə naɗɗan ɓa. Tay viyit ɗiy en Afu azaɓani.

²⁴ Adan gewleɗ kəlaw aprəmən vaska, gidivit adək aka ɗiy də məlma zit sula neki.

²⁵ Yaŋ Yesu aye pakə, amna: Kəsənənka, məlyeŋge net ɗiy-ɗar watakən kiyit də gagay neti, ɗiy gugriɗ tamə tahəŋ ərbanən gagdak net aketi.

²⁶ Adawsan vas a waloŋkum ɓa. Ɗəf dəŋgəl nawsan metiŋ a walaŋkum dərəŋ na, dəsaŋgən məgəɗ wəza nokum.

²⁷ Ɗəf dəŋgəl nawsan ɗəf nabe sə walaŋkum dəsan balam nokum.

²⁸ Vaski kana Wətən Ɗəf dəde ɗiy dəɗɗaŋ sənəngən wəza ɓa, ya vi dəgəɗgən wəza gəm kappan zeŋgilen vi kawbit ɗiy diyɗa.

Yesu tay əmbəlgit daŋgarɗe sula

²⁹ Adan agilyoŋ sə Yeriko, ɗiy diyɗa azbanənək Yesu.

³⁰ Daŋgarɗe sula tahəŋ ɗewɗew aba tive, adan aprəmən na Yesu tay ətoŋgo, aŋzlaŋgək vaŋvəla, aɓɗaŋ na: Aw Daya wətən Davit, awəl sahã akamə.

³¹ Yaŋ ɗiy ahayẽtin dəɓətaŋgəni. Anzlaŋgək vaŋvəl dərəŋ day ki lahəŋka aɓɗaŋ na: Daya, wətən Davit, awəl sahã akamə.

³² Yesu aziwke, ayeke, assohẽt na: Mi kəŋglaŋ nəgəɗ sukumgən di?

³³ Azlanənək na: Daya, haram dəkolu.

³⁴ Yesu awlak sasahti, arəŋgən hereti, heret akoluk go'ləŋgə, azbanənka.