Matiye 16 - Bible en Guidar

Farisaɗe dit Sadukiɗe tay əssohoŋ sekene

¹ Farisaɗe dit Sadukiɗe azoŋguk aza Yesu kawslani. Assohõnən dərban sitgən sekene dəde sə disiŋ.

² Yaŋ Yesu azlani, aɓsit na: An moskoy agəɗka, təki wasan lewi vi disiŋ pəreŋgi.

³ Də mompumo dəpaŋka buwən wagəɗə, vi disiŋ kirɓiɓkirɓiɓi. Kəsənənək uɗakan disiŋ na, kəɓapənna uɗeket sekeneɗ na pay ɓa!

⁴ Sayit ɗiy mbəreyti, məs məluvuluvuɗe. Tay əŋglaŋ Sekene ya arahaŋ na sekene maɓɓan abbər sekene na məskəleŋ Yonas ɓa. Yaŋ appeti, ambatə.

Wuɗo net Farisaɗe dit Sadukiɗe

⁵ Dəggar gewleɗ azgətaŋgək dawgim meptekeɗ aveti.

⁶ Yesu anah sit na: Məgəɗ maɗɗula məsla zukum səza wuɗo net Farisaɗe dit Sadukiɗe.

⁷ Yaŋ gewleɗ adawpeleŋ dəddiviti, aɓɗaŋ na: Vi məgim meptekeɗ ɓaŋki.

⁸ Yesu asənəka, amna: Vimi mənokum məs ətaf nokum məgəsnəŋ kədawpeleŋ dəddəvkum na, meptekeɗ tahəŋ avokum ɓa di?

⁹ Kaprəmən gabban ɓa'a sa? Kaɗɗumonən wən net meptekeɗ sle sit ɗiy gabal sle, an dəmbər gadagarɗe mbarwa kəndaŋ di?

¹⁰ Awaniɓa meptekeɗ buhul sit ɗiy gabal poɗo, an dəmbər gadagarɗe mbarwa kəndaŋ di?

¹¹ Vimi kaprəmnən gabban na, wən net meptekeɗ nədawpel sukum ɓa ɓa di? Məsla zukum səza wuɗo net Farisaɗe dit Sadukiɗe.

¹² Yaŋ gewleɗ nan aprəmnən gabban na dəpel nawsla zə ɗəf səza wuɗo net meptekeɗ ɓa, səza ərba zəga net Farisaɗe dit Sadukiɗe.

Piyer tay ərban na Yesu yi Kristu

¹³ Adan Yesu agap aka va na Kaysariya na Filipi. Assohẽtik gewleɗ nani, amna: Ɗiy ka nawa adawɗinən Wətən ɗəf di?

¹⁴ Aɓɗaŋ na: Meɓɓet ka Yohanna məgəɗ baptem, ɗiy meɓɓeti, ka Eliya, ɗiy meɓɓet əmpa ka Yeremiya, awaniɓa taka neret məskəleŋɗe en farə.

¹⁵ Yaŋ Yesu aneh siti: Ya nokum nawa nan kədawnahaŋ di?

¹⁶ Simoŋ Piyer azlani amna: Kristu Wətən Maŋgəlva madaran kənani

¹⁷ Yesu apeli aɓsən na: Əzaɓ akoko, Simoŋ wətən Yonas; vi gəɓa zə ɗəf dit mbel dərban sukun ɓa, afu na disiŋgi yi.

¹⁸ Naw in tat ənah suko: Piyer (Milɓe) kənani, ya aka milɓes nədarka Gəla nakkam nawa, maddembeɗe na təki nanziya net mimtit aska na wəlan ɓa.

¹⁹ Wanipsuk lekile nawkol metiveɗ na məlĩ na disiŋ. An kiynə səgge aŋka, waynə a disiŋ, an kədawpəl səka dələv aŋka, kawpəlni sə disiŋ.

²⁰ Yaŋ Yesu abay met gewleɗ nan adawnahaŋ sənən ɗəf taka dayday na ndəni Kristu ɓa.

Yesu apelik wən na əmta nan də wəsilya nan səka əmta

²¹ Təŋ siske ləŋ, Yesu atəŋ ərban sit gewleɗ nan na: Aslək dəlgən a Yerusalem, kawzəm sahã diyɗa səvet ɗiy məsɓet dit deyeɗe net məsdəlveŋge mərbaŋ zəga na mahenziŋ, wabaynəni, də əvoŋ mahokoni, wasil səka əmta.

²² Piyer abitginək tuɓollo, apel sən na wəlan na ŋgboro dawnəh na: Maŋgəlva dəguko Daya. Zəgas adaɗɗa akok kpak ɓa.

²³ Yaŋ Yesu akkpaŋgan harani, aɓsən Piyer na: Azar səzawa Satan! Zəga nazbərgu kənani, vi əɗɗum nok tay va na Maŋgəlva ɓa əɗɗum nok va net ɗiyi.

²⁴ Yaŋ Yesu anah sit gewleɗ nan na: An ɗəf aŋgələk wəzbawa, dəppan əɗɗum aka zəni, dəgəmgən wəlaŋga məzliwrihe dəzbawgəni.

²⁵ Vi ɗəf an dəŋgəl əkõhgən zeŋgileni, wazani. Ya məs dəzan zeŋgilen aka wən nawa, nan warəha.

²⁶ Mi adawtər sən ɗəf an arəhək mammba dələv gboŋ ka nan an azanək zeŋgilen di? Awaniɓa, mi ɗəf adawɗi agəla zeŋgilen di?

²⁷ Vi Wətən Ɗəf wade addəv gagdak na Afən dit maslayɗe nani, wafaɗsən ɗəf pak aza wəza nani.

²⁸ Gesiŋ nədawnah sukum ɗiy meɓɓet tahəŋ awalaŋgit ɗiy en dəssoŋ aŋkiŋki, sessel amtaŋ na tak dulanən Wətən ɗəf əzzan addəv məlĩ nan ɓa ɓa.