Matiye 14 - Bible en Guidar

Əmta na Yohanna məgəɗ baptem

¹ Pay daska, Herodə məlĩ na Galile aprəm wəna Yesu.

² Anah sit gewleɗ nan na: ɗəfəŋ Yohanna məgəɗ baptem naki dəsil səka əmta, vini asan də gbogboŋ naɗɗa sekeneɗ azani.

³ Vi Herodə armak Yohanna. Aɓrukuko, azganək a fərsəna aka batamət Herodiya guluk na Filip məlməni.

⁴ Vi Yohanna anah sən na: Tive tay abok ka kəɗiyətgən ɓa.

⁵ Herodə aŋgəl kawbayən kəta, ya geslne adak viyit ɗiyi, vi tay əɗiynən Yohanna va məskəleŋ.

⁶ Səza əzləra na pay muwa Herodə agapə, wətət Herodiya təskələk abet ɗiy en məyet dəpaska. Annekək zə Herodə diyɗa.

⁷ Asway sətək napsət an tədassoh pakə.

⁸ Yaŋ mat təreɗta, təɗi mat na: Apsu ki Yohanna məgəɗ baptem addəv hĩlĩwe.

⁹ Assanək məlyã, ya vi əsway nani gəm viyit ɗiy məyeti, aɗiyək wən nan dəpsətəŋgən an təssõhu.

¹⁰ Yaŋ aslən ətaw ki Yohanna məgəɗ baptem sə fərsəna.

¹¹ Məkini kiyən addəv hĩlĩwe, yaŋ məpsət waŋ goruk nakə, təkiy sət mata.

¹² Gewleɗ nan pohu, agəmənək kigəbayni, andəkənən. Yaŋ addoŋ aprəman sənən Yesu.

Yesu azəmgitik ɗiy gabal sle

¹³ Səza Yesu aprəm wən nani, asilik sə təki nani, ambatək də bəlay, vi kawmbat kapta-muyã takərgəni. Ɗiy aprəmnənka, agilyoŋguk sə walaŋgit gəlaɗe gugriɗ neti, asbanənək də tilti.

¹⁴ Səza Yesu aprik səddəv bəlay, awlek ɗiy diyɗa, awələk sahã aketi, ambəlgitik məs gbəgbaɗe neti.

¹⁵ Adan moskoy agəɗə, gewleɗ nan poh azani, aɓsənən na: təkiyəŋ kapta-muyã yi, ya pay atoŋko. Apsit tive sit ɗiyəŋ dəmbataŋ a walaŋgit gəlaɗe dəlbahaŋgən zəga nawzəm sən kiyti.

¹⁶ Yaŋ Yesu anah sit na: Wəray tay dəddoŋgən ɓa, munokum zək nokum məpsit əzəma.

¹⁷ Yaŋ aɓsənən na: Zəga tay avam aŋ ɓa, abbər moŋgosok sle gəm kilifeŋge sula.

¹⁸ Yesu anah sit na: Məki siw aŋka.

¹⁹ Yaŋ aɗi wən nan sit ɗiy dəssoŋgən aka kevile. Agim moŋgosokɗe sle neki gəm kilif sula, aziy haran a disiŋ, agəɗ əsoko sən Maŋgəlva. Arɗeti, apsit gewleɗ nani, gewleɗ nan tam sit ɗiyi.

²⁰ Ndəɗaŋ pak azəmaŋka, abaŋka. Akkalanənək an dəmbərə, agəɗək gadagarɗe kəlaw kiyit sula miknihti.

²¹ Əŋɗa net zel en dəzəmaŋ wagəɗ aza gabal sle mbəksa gil dit kirni.

Yesu tay ədaw aka pehe

²² Dərɓagan ləŋgə, Yesu agəɗək vavyak sit gewleɗ nan dətoŋgoŋgən addəv bəlay, vi dəmbataŋgən daabəŋ kiyən a dəgar, aka tay əgay uɗak dit ɗiyi.

²³ Adan awɗak dit ɗiyi, ndən peŋ aka mossorgo metiŋ vi kakkam takərgəni. Hã moskoy gap tay adak takərgəni.

²⁴ Bəlay faraɗay diyɗa də mabuzgum, vovulumɗe asilyoŋguk akani vi haran sek aka səmyã yi.

²⁵ Ba pummo na, ndən pay azet də ədaw aka pehe.

²⁶ Adan gewleɗ awlanən ədaw aka pehe, geslne armeke, aɓɗaŋ na: Məzvefi, anzlaŋgək vaŋvəla sən geslne.

²⁷ Yesu apel sitik go'ləŋge, amna: Məsok zukum intə, kədawgeslne'eŋ ɓa.

²⁸ Piyer azlan sənəka, amna: Aw Daya, adan istə na, anah su ndawgən azok dəket iŋkile tamə.

²⁹ Yaŋ anah sən na: Ade. Səza agil səddəv bəlay, Piyer adawək aket iŋkile əmbat aza Yesu.

³⁰ Ya adan awla semyã gədakə, geslne armaka, atəŋgək ətəpa, aŋgəzlək vaŋvəl dawnəh na: Daya akõhguwa.

³¹ Yesu atələk van go'ləŋgə, armaka, aɓsən na: Məs ətaf nan məgəsən, vimi kəsok kiyuk gərətgərət di?

³² Adan aguloŋ sulegit pak addəv bəlay, səmyã ɓatə.

³³ Yaŋ gewleɗ en naddəv bəlay appu'oŋ abani, aɓsənən na: Gesiŋgi Wətən Maŋgəlva kənani.

Yesu tay əmbəlgit məs gbəgbaɗe na kivadələv Genesaret

³⁴ Səza agaraŋgə, atoŋgoŋ aka dələv na Genesaret.

³⁵ Ɗiy naka dələv nadak vet asənnək Yesu, abbalanənək wən nan aka kivadələv van pakə, akisənənik məs gbəgbaɗe pakə.

³⁶ Akkamanənək dəpetigən dərəŋgənəngən gabba lukut nan dayday, en məs dərəŋgənən pak amblaŋka.