Matiye 13 - Bible en Guidar

Wənməkkpaŋga na məzənse

¹ Pay dəpaska, Yesu agilik səŋgili, ambatək əsan ama pehe.

² Ɗiy diyɗa azzoŋguk azani. Vini atoŋ addəv bəlay, asan addəvən, ɗiy tam aziweŋ ama busgum.

³ Arban sitik zəgeɗ diyɗa də wənməkkpaŋga. Amna: Məzənse ambatək a gulyo, vi kazlga.

⁴ Adan adawndolni, zeŋve maɓɓan abətək aka tive, biŋgeɗ azzoŋko, ayaɗənənka.

⁵ Zeŋve maɓɓan abətək aka soyomo, dələv tay akan diyɗa ɓa. Go'ləŋgə agilke, vi dələv tay akan diyɗa ɓa.

⁶ Adan pay agili, azlaka, akəlka vi dərah təki nampa suwerin ɓa.

⁷ Zeŋve maɓɓan abətək addəvit gedirgeɗi, gedirgeɗ aɓayaŋka, azəmgənək sahã.

⁸ Ya zeŋve maɓɓan əmpa abətək aka ba'arə, aɗika. Maɓɓan aɗiyək səkatə maɓɓan kaklaw sləre maɓɓan kaklaw hoku.

⁹ Məs də sləman, dəprəma.

Vimi Yesu adawpel dit wənməkkpaŋgaɗe di?

¹⁰ Yaŋ gewleɗ na Yesu azzoŋ azani, assohõnəni: Vimi kədawpel sit dit wənməkkpaŋgaɗe di?

¹¹ Yaŋ azlani, aɓsit na: Nokum məpsukumi əsən wən məɗama na məlĩ na Maŋgəlva, ya neti məpsiti ɓa.

¹² Vi məs dərah zəga kapsəni azani, ərah nan wasan diyɗa, məs dərah zəga ɓa, kawmõhni an navan daydayə.

¹³ Vi aski nədawpel sit dit wənməkkpaŋgaɗe. Vi tahəŋ əziyən hereti ya awlaŋ ɓa. Tahəŋ əpakən sləmeti, ya aprəmnən ɓa, awsənən gabban ɓa.

¹⁴ Vaski kəleŋ na Isaya agəɗ aketi, an məs apel dawnəh na: Əprəm kədaprəmaŋgə, ya kəsənən gabban ɓa. Ula kədawlaŋgə, ya tay kədawlaŋ ɓa.

¹⁵ Vi mekret ɗiyəŋ aɓɓəlka, asukunək sləmeti, atipinik hereti vi adawlaŋ ɓa, adaprəmaŋ ɓa, adawsənaŋ gabba zəga ɓa, gəm adawɗiyaŋ marava ɓa, ka nədawmbəlgit ɓa.

¹⁶ Ya munokum, əzaɓ aza horokum vi tay ula, gəm sləmokum vi tay əprəma.

¹⁷ Gesiŋ nədawnah sukum: Məskəleŋɗe diyɗa dit ɗiy təstəs diyɗa, aŋglaŋgək ulanən an kədawlaŋgə, ya dulanən ɓa. Aŋglaŋgək əprəm an kədaprəmaŋgə, ya dəprəmnən ɓa.

Yesu tay əboton wənməkkpaŋga na məzənse

¹⁸ Məprəm gabba wənməkkpaŋga na məzənse naka.

¹⁹ Ɗəf an dəprəm əpel na məlĩ na Maŋgəlva pak ya dəsən gabban ɓa. Məs pepet əzzan əgəm an məzlgan a makran naka, ndəni an məzlgan aba tive.

²⁰ An məzlgan aka təki soyomo, ndeni ɗəf an dəprəm əpele, dətaf go' də ənneke.

²¹ Ya suwerin tay ɓa. Wasan gap pay siɗikke, ya an tatwãh awaniɓa əsərma adek aka wən na əpel naka, ndən ərəh tive naskoto.

²² An məzlgan addivit gedirgeɗi, ndeni ɗəf an dəprəm əpele, ya əŋgla na zəga negge də wərak na arya wazəmgənən sahã na əpel vani, ndən kpaŋ məza əɗi aran ɓa.

²³ An məzlgan aka ba'arə, ndəni ɗəf an dəprəm əpele, dəprəm gabbani, sessel watər wəraya, maɓɓan waɗi aran səkatə, maɓɓan waɗi aran kaklaw sləre, maɓɓan kaklaw hoku.

Wənməkkpaŋga na bergezleŋ

²⁴ Yaŋ Yesu apel sit də wənməkkpaŋga maɓɓani, amna: Məlĩ na Maŋgəlva tay va ɗəf dəzlga zeŋve moggon a gulyo ananda.

²⁵ Aka ɗiy adawleŋgeŋgi, məzuzel nan pay bergezleŋ ka'ka' addəv haykəmari, ndən mbatə.

²⁶ Səza hay agili, apoku, bergezleŋɗe tam arbanənək ziti.

²⁷ Belemɗe na afən gəla payaŋ azani, aɓsənən na: Daya: Nam na zeŋve moggon kəzlgə a gulyo anokdaŋka ɓa sa? Ya səŋgay bergezleŋ di?

²⁸ Aɓsit na: Ɗəf məzuzeli dəɗɗaska. Belemɗe aɓsənən na: As na mok aka məlgən əptiwit sa?

²⁹ Azlan sitike: Awwo, vi kədaptuwən bergezleŋɗe sap də haykəmari ɓa.

³⁰ Məppet sulegit pak dəɓayaŋ sap hã gap pay nawbəla. Pay nawbəla, wanənah sit məzubəlaŋ na: Məkkelet bergezleŋɗe tagay, miynet bebbepi, kawzleti. Ya na haykəmari na məkkalan su a maha anawda.

Wənməkkpaŋga na zeŋve na meslene

³¹ Yesu apel sitik də wənməkkpaŋga maɓɓani, amna: Məlĩ na disiŋ tay va zeŋvək na meslene. Ɗəf agəmtək azlgətək addəv guli nani.

³² Məgəsəttə səmmbet zeŋveɗe pakə, ya an təɓayka, ndət əday kiyit teɓ pakə, ndət əkkpaŋ wəlaŋga, hã biŋgeɗ əzzoŋ əzaɓ gəla net aka ki vata.

Wənməkkpaŋga na wuɗo

³³ Yesu apel sitik də wənməkkpaŋga maɓɓan əmpa, amna: Məlĩ na disiŋ agilik va wuɗo, guluk təgəm təslahan ara gəpa marga taka, gəpa pak ahəska.

Va Yesu agəɗ wəza dit wənməkkpaŋgaɗe

³⁴ Zəgeɗis pak Yesu anah sitik ɗiy dit wənməkkpaŋgaɗe, tay məs anah sit məza dit wənməkkpaŋgaɗe yi ɓa ɓa,

³⁵ vi an məskəleŋ anah dəgəɗgəni. Amna: Wanəkol maw əpel wənməkkpaŋgaɗe, wanərbet zəgeɗ en məɗemit farfar, aka ətəŋ na gabba dəlva.

Yesu tay əboton wənməkkpaŋga net bergezleŋ

³⁶ Adan Yesu appet ɗiyi, atoŋguk eŋgili. Gewleɗ nan azzoŋguk azani aɓsənən na: Arban səm wənməkkpaŋga net bergezleŋɗe a gulyo.

³⁷ Yaŋ azlan siti, amna: Məs dəzlga zeŋve moggonəŋka, ndəni Wətən Ɗəfa.

³⁸ Guli na ənziya egge yi, zeŋve moggoni, ndəni ɗiy na məlĩ na Maŋgəlva, bergezleŋɗe ndəɗaŋgə ɗiy mbəreyti.

³⁹ Məzuzel məs dəzlge ndəni Satan, pay nawbəla, ndəni pay nagrak dəlva, məzubəlaŋ tamə ndəɗaŋgə maslayɗe.

⁴⁰ Va adawndetin bergezleŋɗe kazgət aka offo vaski adawsan pay əgrak dəlva.

⁴¹ Wətən Ɗəf waslən maslayɗe nani, wagilgitin məskotgitin ɗiy addəv mambraya dit məs mambrayɗe pak səddəv məlĩ nani,

⁴² wazgetin addəv movoro na offo. Əhəm də əpəran slay ɗəfi dədawsan adaka.

⁴³ Asna ɗiy təstəs wawiɗeŋ va pay addəv məlĩ na Afiti. Məs də sləman, dəprəma.

Arya məɗamani gəm everzle na sləma

⁴⁴ Məlĩ na disiŋ agilik va arya məɗaman addəv gulyo. Ɗəf arəhəka, aɗamanək əmpa, addəv ənnek nani, yaŋ ambat əvəl zəga nan pak albəh guli vani.

⁴⁵ Məlĩ na disiŋ agilik va məman van məkay everzleɗ na sləma.

⁴⁶ Adan arəh everzle na sləma diyɗa, yaŋ ambat əvəl zəga nan pak yaŋ albəh everzle vani.

Wənməkkpaŋga na zəva

⁴⁷ Əmpa, məlĩ na disiŋ agilik va zəva məzgan a pehe dərəm zeŋvit zəgeɗ temtem pakə.

⁴⁸ An aknahka, kagdəni ama busgum, kassayi, kawzi kilif mogget a kəggəla, ya en mbəreyti kawndolti.

⁴⁹ Vaski adawsan pay əgrak dəlva. Maslayɗe wazzoŋgu wagohnin ɗiy mbəreyit səret en təstəsə.

⁵⁰ Wazgetin addəv movoro na offo. Əhəm də əpəran slay ɗəfi dədawsan adaka.

Aryeɗ meleketet dit məzveti

⁵¹ Yesu assohẽtik gewleɗ nani. Kəprəmənək zəgeɗis pak sa? Azlan sənənka məprəməka.

⁵² Yaŋ anah sit na: Vi vaski mərbə-mahenziŋ məzəzban məlĩ na Maŋgəlva pak, agilik va afən gəla, məzugilgit zəgeɗ meleketeti gəm zəgeɗ məzvet sə təki nawzaɓ nani.

Ɗiy na Nazaret dətafnən Yesu ɓa

⁵³ Adan Yesu agrek wənməkkpaŋgaɗeski, ndən mbat sədaka,

⁵⁴ adan agap aka dələv nani, ayegetik ɗiy nadak addəv gəla nakkal neti hã ndəɗaŋ əggətaŋgə, aɓɗaŋ na: Səŋga arəh maɗɗulaŋ mãy sekeneɗiŋ di?

⁵⁵ Nam na wətən məntar wəleŋɗe yi ɓa sa? Miryam adawyətən mani, Yakob də Yosef, Simoŋ gəm Yuda əŋgə milmiŋgiɗin ɓa sa?

⁵⁶ Milmiŋgiɗin məguliŋgit pak anamdaŋ ɓa sa? Səŋga arəh zəgeɗiŋ pak di?

⁵⁷ Aski dətek dawtafni. Yaŋ Yesu aɓsit na: kawzeleni məskəleŋ an aka dələv nani gəm eŋgil ananda yi ɓa ɓa.

⁵⁸ Adak na, Yesu dəgəɗ sekeneɗ diyɗa ɓa, vi tahəŋ də ətaf ɓa.