Matiye 11 - Bible en Guidar

Maslənɗe na Yohanna məgəɗ baptem

¹ Adan Yesu agrak əɗi wən nan sit gewleɗ nan kəlaw kiyit sula, ambatək sədaka, vi kaɗɗa əyaka gəm kawpel wən na Maŋgəlva addivit walaŋgəla gugriɗ neti.

² Yaŋ Yohanna səddəv fərsəna aprəmək alabara na wəza na Kristu, aslən gewleɗ nani,

³ vi kawnah sən na: Istə məs nazzokuŋ sa? Awaniɓa məga ɗəf maɓɓan sa?

⁴ Yesu azlan anah sit na: Məddoŋ mənah an kədaprəmaŋ də an kədawlaŋ sən Yohanna:

⁵ Deŋgerɗe tay ulaŋgə, vədalɗe tay ədawaŋgə, məskokoleɗ abburoŋko, goryomɗe mərma hərzlumit tay əprəmaŋgə, ɗiy mimtit asilyoŋko, məs sahẽŋɗe tamə tay əprəmnən Wən Neneke.

⁶ Əzaɓ aka ɗəf an məs nəsaw sən ka zəga nazbərgən ɓa.

⁷ Aka gewleɗ na Yohanna adaddoŋgu, Yesu təŋ əpel wən na Yohanna sit ɗiyi, amna: Mi kəddoŋ ula a kapta-muyã di? Eflere an səmyã adaɓlan sa?

⁸ Ya mi kəddoŋ ula kandi? Ɗəf dəgul lukutɗe na sləma sa? Ya məguloŋ lukutɗe na sləma a net milyẽŋge da adassoŋgu.

⁹ Ya mi kəddoŋ ula kandi? Məskəleŋ sa? In tat ənah sukum: Gesiŋ məday ki məskəleŋgi.

¹⁰ Ndəni an məs məverin apel akani: In tat əslən maslən naw aboko, an dədawzaɓan tive nok səboko.

¹¹ Gesiŋ nədawnah sukum: Səwalaŋ uwa net gil pak tay an məs dəday ki Yohanna məgəɗ baptem ɓa, ya an muzliya naddəv məlĩ na disiŋ, adayək kini.

¹² Təŋ səza pay na Yohanna məgəɗ baptem hã gap kəkaŋka, gagay tay əteh aka məlĩ na disiŋ, məsgagayɗe dədawkayaŋ əmõhən.

¹³ Vi məskəleŋ baymet gəm mahenziŋ aɗɗaŋgək kəleŋ hã gap aza Yohanna.

¹⁴ An kətafənka, ndəni Eliya an məs nazzani.

¹⁵ Ɗəf an məs də sləman pak dəprəma:

¹⁶ Də mi nədawsla sayit ɗiyəŋ di? Agilik va kirin dəssoŋ a təki nakkala, məzutələn met sit meɓɓeti.

¹⁷ Ənahaŋ na: Məffon sukumək pozloro, kəskəlaŋ ɓa, məyə sukumək gəlya na gəlabaya, kəskaŋ morkoyo ɓa.

¹⁸ Vi Yohanna adeke, awzəm ɓa, awsa ɓa, aɓɗaŋ na: Tuya tay akani.

¹⁹ Wətən Ɗəf adeke tay əzəma tay əsa, tay ənahaŋ na: Ɗəf məs golvoŋ yaŋka, məsə mbazla, baynet məkkalaŋ nzalaka gəm məɗɗaŋ mambraya. Ya maɗula arbək təstəs dit wəzeɗe nani.

Walaŋgəlaɗe gugriɗ məs dədawɓoŋgoŋ dawtafa

²⁰ Yaŋ Yesu atəŋ əheyẽt walaŋgəleɗe gugriɗ məs agəɗ sekeneɗ adak diyɗa sawɓaŋka vi dəɗiyaŋ marava ɓa.

²¹ Əray azoko Korazin, əray azoko Betsayda. Va sekeneɗiŋ a Tir gəm a Sidon məɗɗet na, kəta farfar aguloŋguk lukut na gəlabaya, aggbo'oŋguk moŋglo aketi, aɗiyaŋgək marava.

²² Vini nədawnah sukum: Pay nawtawwən na, tatwãh na Tir də an na Sidon wasan ɗəɗah ki an nokum.

²³ Ya is Kafarnahum, wakəɓaygən zuk hã a disiŋ sa? Hã a təki nanziya net mimtit kədawpurkoko. Vi va a Sodom məɗɗe sekeneɗ dəɗɗaŋ anokdaŋka, kəta wasan hã dəpaŋka.

²⁴ Vini nədawnah sukum: Pay nawtawwən na, tatwãh na dələv na Sodom wasan ɗəɗah ki an noko.

Məde azawa kərahaŋgən əffete

²⁵ Pay nan dəpaska, Yesu agəmək əpele, yaŋ amna: Intat əgagdokoko Əbba, Daya na disiŋ də dəlvafuŋ, vi kəɗemetik zəgeɗis səma heret məs maɗɗulet dit məs əsəna, kərbet sit kirin muzliyeɗi.

²⁶ Ha'aw, Əbba, vi vaski kəŋglu dəgəɗgən ama horoko.

²⁷ Zəga pak Əbba apsuka. Ɗəf tay dəsən Wətən an Afəni ɓa ɓa, ɗəf tay dəsən Afən an Wətəni ɓa ɓa, gəm ɗəf an Wətən aŋgəl narban səni.

²⁸ Mide azawa munokum pak məyokum də zəga gədak akokuməŋka, ya naw wanəpsukum effete.

²⁹ Məslan zuk naw akokum, məyak azawa, vi zay nani, makraw barə, wakərahaŋ əffet na zeŋgilokum.

³⁰ Vi zuk naw moggoni, an məs nədawɗi sukum nawsla kafat-kafati.