Mətawaŋwəna 9 - Bible en Guidar

Abimelek akkpaŋgək məlĩ a Sikem

¹ Abimelek wət Yerub-Ba'al, ambatək a Sikem, vi kawpel sit gimsiŋgiɗin na met bide, may sən məlma na afət man də ənəh na:

² «Kamə, məprəman sit aslmet ɗiy gugriɗ na Sikem beymet na: awani moggon azokum di? Ɗiy kaklaw buhul kirtin Yerub-Ba'al beymet pak kəŋglaŋ dəssoŋgən məlĩ akokum sa, ɗəf taka kaka' dəsan məlĩ akokum? Kəɗɗumonəngən hara na, naw səzet sleŋsleŋɗe də slu zukum nəgili.»

³ Gimsiŋgiɗin apelənək wən nanəs pak eslmet ɗiy gugriɗ na Sikem beymeti, mekret aziwik aka Abimelek, vi tay ənəhaŋ na: «Nan məlməmi yi.»

⁴ Yaŋ apsənən deleɗ gərmeŋge kaklaw buhul səddəv gəla na Ba'al-Berit, dinditi Abimelek afaɗ sit ɗiy məs awtəraŋ wəray dit məs taggbelemɗe dəzbanəngəni.

⁵ Ndən mbat ana afənda a Ofra, abey milmiŋgiɗin, anet kirtin Yerub-Ba'al kaklaw buhul beymet aka milɓe taka. Yotam tabuwa na Yerub-Ba'al kaka' dəmbərə, vi aɗamka.

⁶ Ɗiy gugriɗ na Sikem də Bet-Millo bayman akkalaŋka, addoŋ əɗi Abimelek ka məlĩ a maŋgava wəlaŋga adawyaŋ na Elon, aza serek məmpan məs dəsan a Sikem.

Mamba na Yotam

⁷ Yaŋ mənah wən nan sən Yotam, yas ambat aziw a dadwar ki gərəm na Garizim, aslan wəlan ayə, aɓsit na: «Məprəmwa, migil Sikem, Maŋgəlva dəprəmkum.

⁸ Təl taka na, wəleŋɗe addoŋguk ədawel məlĩ neti. Yaŋ aɓsənən hereme na: azəm məlĩ akamə.

⁹ Yaŋ hereme aɓsit na: Nəppangən əɗɗa mẽl naw nawgagdakan Maŋgəlva may ɗiyi, ka kakker aket wəleŋɗe sa?

¹⁰ Yaŋ wəleŋɗe aɓsənən sokoyo na: Ade ɗa anoko, azəm məlĩ akamə!

¹¹ Sokoyo aɓsit na: Nəppangən dodo'õt naw də uwa naw nenekəŋ ndawgən vi kaɓla aket wəleŋɗe sa?

¹² Siske wəleŋɗe aɓsənən megezlembirke na: Ade anoko, azəm məlĩ akamə.

¹³ Megezlembirke aɓsit na: Nəppangən əɗɗa zəga nawsa məs dəda ənnek zə Maŋgəlva dit ɗiy pakəŋ ndawgən vi kaɓla aket wəleŋɗe sa?

¹⁴ Yaŋ wəleŋɗe beymet anahaŋ sən rəɓ net degirgeɗ na: Ade anoko, azəm məlĩ akamə.

¹⁵ Rəɓ net dedirgeɗ aɓsit wəleŋɗe na: An gesiŋ mokum aka nəzəmgən məlĩ akokum na, asna məde məkay təki nawɗam addəvwa, vas ɓa offo wagil səddəv rəɓ net degirgeɗi, wazim muguguleɗ na Liban.»

¹⁶ Yaŋkəŋ na an də gesiŋgesiŋ gəm də təstəs-gərak kəɗinən Abimelek aka məlyã, an moggon sən Yerub-Ba'al gəm sən gəla nan kəɗɗaŋgə, ya an dəslə va moggon an agəɗ sukum kəɗɗaŋgə,

¹⁷ afu alpək vikum, akay əzan kiyən vikum, akõhgukumək səmmba vet mə Madiyanɗe.

¹⁸ Yaŋ nokum pay dəpaŋ na, kəsilyoŋ sənən gəla na əbba; kəbeynin kirtin mezeŋgleket kaklaw buhul aka ma taka kpor, yas kəɗinən Abimelek wətət balamək nan məlĩ aket ɗiy gugriɗ na Sikem vi asan məlmukum.

¹⁹ An də gegesiŋ gəm də təstəs-gərakə kəɗɗaŋ sən Yerub-Ba'al gəm sən gəla nani, pay dəpaŋ na, mərah nenek səza Abimelek ndən tam dərah nennek səzokum!

²⁰ An vaski ɓa, offo dəgil səza Abimelek dəzim ɗiy gugriɗ na Sikem gəm na Bet-Millo; offo dəgil səzet ɗiy gugriɗ na Sikem gəm na Bet-Millo dəzəm Abimelek.

²¹ Siske na, Yotam ɓak, mbat haɗam a Be'era, asan adak faraɗa sə mahara Abimelek məlməni.

Ɗiy na Sikem asilyoŋguk aka Abimelek

²² Abimelek azəmək məlĩ aka Israyel wəzva hoku.

²³ Yaŋ Maŋgəlva aslən əmpəs mbərayən a walaŋ Abimelek dit ɗiy gugriɗ na Sikem, ɗiy gugriɗ na Sikem arbaŋ sənən wili.

²⁴ Vi daraw məɗɗa aket kirtin Yerub-Ba'al kaklaw buhul gəm mbel net dəmndoŋgən ka ki milmit Abimelek məs dəbeye gəm ɗiy gugriɗ na Sikem məs dəreɗinin dəbeygin milmiŋgiɗni.

²⁵ Ɗiy gugriɗ na Sikem aɗiyaŋ ɗiy məvoŋgoŋ tive aket mossorgoɗe, yaŋ adawmõhnən zəga səva ɗəf mətoŋ də maŋgevet pakə, yaŋ məprəman sən Abimelek.

²⁶ Ga'al wətən Ebed adek a Sikem dit milmiŋgiɗin; ɗiy gugriɗ na walaŋgəla na Sikem tam aɗiyənən ka ɗəf moggoni.

²⁷ Ndəɗaŋ mbataŋ awra əɓuh uwa net megezlembirkeɗ neti; yaŋ aɗotini aɗɗaŋ wəzləra. Atoŋgoŋ addəv gəla na maŋgəlva neti, azəmaŋgə, asaŋgə, yaŋ aɓuhnən met nawraygən Abimelek.

²⁸ Ga'al wətən Ebed awɗi man na: «Abimelek na ndəni nawa a Sikem məsamgən ammba van di? Namna wətən Yerub-Ba'al gəm Zebul daya an aɗi dədaɗɗaŋ wəza abet ɗiy na Hamor, afən Sikem ɓa sa? Gabban mbar nam məgəɗ səngən wəza di?

²⁹ Napsiw ɗiyiŋ ammba vaw na, kəta wanərɓəh Abimeleki. Yaŋ anah sən Abimelek na, anzlərgit məzəlpaŋ noko, ade agay səmə.»

³⁰ Zebul, daya na walaŋgəla-metiŋ, aprəmək əpel na Ga'al wətən Ebed naka. Gədəvən adək sawɓa.

³¹ Yaŋ aslən maslənɗe məɗama aza Abimelek də ənəh na: «Ga'al wət Ebed dəde dit milmiŋgiɗin a Sikem nak yeŋ əɓoŋgitin ɗiy na walaŋgəla-metiŋ akoko.

³² Yaŋkəŋ na, asil də vanday məs dəsan də is də dəfɗa, avoŋsit tive awra.

³³ Də mompumo də pay birndisse na, kəsilgin go'u, kəwak səngən walaŋgəla-metiŋ. An Ga'al dit ɗiy en dəndən tay əgulyoŋ azok na, kəgəɗ səngən an vok adawɓap pakə.»

³⁴ Abimelek asilik dit ɗiy en dəssoŋ dəndən pak də dəfɗa, vandayɗe temtem poɗo asoroŋ a maŋgava Sikem.

³⁵ Ga'al wətən Ebed vit ziw a meŋgle na walaŋgəla-metiŋ. Abimelek le' dit ɗiy en dəsoroŋ dəndəni

³⁶ Ga'al awlek ɗiy veti, yaŋ aɓsən Zebul na: «Ɗiy yendek əpurkoŋ sə dadwar kiyit mossorgoɗe!» Yaŋ Zebul aɓsən na: «Zeŋgilet mossorgoɗe kədawla va ɗiyi.»

³⁷ Ga'al anah əmpa na: «Ɗiy yendek əpurkoŋ sə kəladdak dəlva gəm vanday taka əzzan tive nammba Elon wəlaŋga net mulaŋ heligi.»

³⁸ Zebul aɓsən na: «Kaŋ ŋgay mok məzunəh na: naway Abimelek ka məgəɗ səngən wəza nak di di? Namna məzəlpaŋ məs kəzelet nekiŋ ɓa sa? Kamə egil kakaŋ agay dənɗaŋ kana.»

³⁹ Ga'al tam ŋgbih əgilyen dit ɗiy gugriɗ na Sikem ammbani, alpə də Abimelek.

⁴⁰ Abimelek azbanka, Ga'al anzanək abani. Məbay yi ɗiy kpororo hã nawtoŋ a maddamba na walaŋgəla-metiŋ.

⁴¹ Abimelek ɗew də gəla a Aruma. Zebul ma gabba Ga'al dit milmiŋgiɗin gəm dassoŋ a Sikem.

⁴² Vit pummo nan na, ɗiy vitvit əgulyoŋ awra, yaŋ mənah sən Abimelek.

⁴³ Ndən ɗiy nan hãs, aprohet ka vandayɗe hoku, avoŋ sitin awra. Aka awle ɗiy əgulyoŋ sə walaŋgəla-metiŋ na, ndən ləŋ ezet hõs abeye.

⁴⁴ Abimelek də vanday məs dəsan dəndən õyõy aza əlpa yaŋ aziweŋ a mahara walaŋgəla-metiŋ. Vandayɗe en sula meɓɓet tam asilyoŋ õyõy aket ɗiy en dəssoŋ awra pakə.

⁴⁵ Abimelek hurruɓ əsɓəta nan dəpas əlpa də walaŋgəla-metiŋ, amõh walaŋgəla-metiŋ vani, abey ɗiy naddəvən, aɓzlu walaŋgəla-metiŋ vani, appik bətuw akani.

⁴⁶ Deyeɗe naddəv gəla məɓayən na Migdal-Sikem beymet aprəmənək wən nani, yaŋ azzoŋ ətoŋ a bətəŋ naddəv gəla-na-tuya El-Berit.

⁴⁷ Mənah səni Abimelek na, ɗiy naddəv gəla məɓayən na Migdal-Sikem nek pak akkalaŋka.

⁴⁸ Abimelek peŋ aka mossorgo na Salmon, ndən dit ɗiy en dəssoŋ dəndən pakə, andə zlimbeɗ avani, abəl kiva wəlaŋga, aslan aklak a mawəlani. Aɓsit ɗiy en dəssoŋ dəndən na: kulanənək va nəgəɗə, məgəm zukum məɗɗa va naw tamə.

⁴⁹ Ɗiy vet tam abəlaŋ naway pak də kiva wəlaŋga, addoŋ ammba Abimelek, akkpuɓnin a ma bətəŋ aɗinən offo əvot ɗiy naddəv bətəŋ. Vaski ɗiy naddəv gəla məɓayən na Migdal-Sikem tam amtaŋ beymeti, waɗɗaŋ ɗiy Gabal, zel dit gili.

Əmta na Abimelek

⁵⁰ Siske Abimelek ambat a Tebes, asərŋgəsla, azəma.

⁵¹ Gəla tay məɓayən gbimgbim addak walaŋgəla-metiŋ vani; zel dit gil beymeti gəm deyeɗe na walaŋgəla-metiŋ vet pak anzoŋ adaka, amsanən maddamba aketi, apeŋgeŋ aka məggbo'o naddəv gəla məɓayən naka.

⁵² Abimelek pay hã aza gəla məɓayən naka, awaksəni, adder hã a maddamba na gəla məɓayən van kawɗisən offo kəta.

⁵³ Yaŋ guluk təslaŋgan buwən nawsər aka ki Abimelek, aŋgrof hiyuɓ hiyuɓu.

⁵⁴ Abimelek ləŋ dah iya gawla məndə gulom nani, aɓsən na: «Agdəh masalam noko, abaywa, vi adawnahaŋ anaw na: “guluktə təbaya ɓa.”» Yas kan gawla nan van ampa, ndən zamə.

⁵⁵ Mə Israyelɗe səza awlanən na Abimelek amtəka na, amndoŋguk naway pak eŋgil ananda.

⁵⁶ Maŋgəlva amndaganək mbərayən na Abimelek məs agəɗ sən afən abey milmiŋgiɗin mezeŋgleket kaklaw buhul əŋka.

⁵⁷ Vas Maŋgəlva amndagan sit mbərayən net ɗiy na Sikem bayman aketi. Mefɗeke na Yotam wətən Yerub-Ba'al armeninke.