Mətawaŋwəna 8 - Bible en Guidar

Wədagədəv net ɗiy na Efrayim

¹ Ɗiy na Efrayim aɓsənən Gedeyon na: «Zəga an kəgəɗ naddok əgay dit mə Madiyanɗe məza ənah səm ɓaŋ na mi adarba di?» Akiyaŋ sənənək wən sawɓa.

² Gedeyon aɓsit na: «Mi nəgəɗ yaŋkəŋ gala nawsla də an kəɗɗaŋ di? An kəɗɗaŋ siɗikke mənokum ɗiy na Efrayim, adayək ki əska wəla na zev Abiyezer də sləma.

³ Ammba vokumi Maŋgəlva apsukum milyeŋge na Madiyan Oreb də Ze'eb. Mi nəɓap əɗɗa gala nawsla də mənokum di?» Səza apel əpel aski kan ədagədəv net affeti.

Gedeyon dəmmba pay nampum na Yurden

⁴ Gedeyon gap a Yurden, aggar ndən dit ɗiy səkat hoku məs dəssoŋ dəndəni. Ayaŋgək diyɗa, də as pak tahəŋ ərɓehet meseŋgitti.

⁵ Yaŋ aɓsit ɗiy na Sukkot na: «Kamə, məpsən peŋ sən vanday məs dədazbawəŋka, vi ayaŋka; may Zeba də Salmunna milyeŋge na Madiyan nədarɓeheti.»

⁶ Yaŋ ɗiy gugriɗ na Sukkot aɓɗaŋ na: «Kirmek may Zeba də Salmunna vet ammba vok səkay ka məpsəngən peŋ sən vanday net məzəlpaŋ nok sa?»

⁷ Gedeyon azlan sitike amna: «Paysən Yawe adapsiw may Zeba də Salmunna ammba vaw na, wanəslərotkum də maryariya na kapta-muyã gəm nzewɗe.»

⁸ Siske Gedeyon apeŋ a Penuwel apel sit va an naka'a. Yaŋ ɗiy na Penuwel vet azlan sənən vanet ɗiy na Sukkot azlanəni.

⁹ Aɓsit ɗiy na Penuwel əmpa na: «An nəmilik zay na, wanəbzləw gəla mələkləkəska.»

¹⁰ Zeba də Salmunna tahəŋ a Karkor də dula, a dibirgidikɗe net na, ɗiy tahəŋ gap gabal kəlaw kiyən sle'i, beymet en dəppaŋ səddəv dula nammba pay nampum. En məbay aɗɗaŋgək gabal səkat də kaklaw sula məs dəsənaŋ wən na masalam.

¹¹ Gedeyon apeŋgik dəka tive net ɗiy naddivit gizlirkeɗe na muyã, kəlammba pay nampum na Nobah də Yogboha, awaksən dibirgidik dədaɗɗum na tay zeŋleŋge.

¹² Zeba də Salmunna ɓak ənzoŋgu, ya Gedeyon ammbet ɓa' arme Milyeŋge na Madiyan anet may Zeba də Salmunna sulegiti. Akiyək geslne a dibirgidik net sawɓa.

¹³ Gedeyon wət Yo'as amilik səma wəlpa dəka tive nawpeŋ a Heres.

¹⁴ Yaŋ arəm gawla taka səret zel na Sukkot, assohõn man, aversin iya net ɗiy gugriɗ na Sukkot dit ɗiy məsɓet nadaka, aɗɗaŋgək zel kaklaw buhul kiyit buhul.

¹⁵ Gedeyon mbat ezet ɗiy na Sukkot, aɓsit na: «May Zeba də Salmunna nek yeŋki, məs kərawən aka wən net də ənahsu na: “Kirmek may Zeba də Salmunna vet ammba vok səkay ka məpsitgən peŋ sit ɗiy nok məs dəyaŋ sa naka?”»

¹⁶ Yaŋ arme ɗiy məsɓet na walaŋgəla-metiŋ gəm ande maryariya na kapta-muyã dit nzewɗe, arbəsit ɗiy na Sukkot dənɗaŋ.

¹⁷ Abzləw gəla mələklək na Penuwel, abey zel na walaŋgəla-metiŋ vani.

¹⁸ Yaŋ aɓsit may Zeba də Salmunna na: «Mbar mbarəŋ ɗiy məs kəbayaŋ a Taboriŋ di?» Aɓɗaŋ na: «Va is agulyoŋ, beymet pak ulaŋ va kirtin məlyã!»

¹⁹ Aɓsit na: «Milmiŋgiɗwəŋ, kirtət əmma. Suway də Yawe madaran, va kəppetinik əgge, kəta nəbaykum na ɓa.»

²⁰ Yaŋ aɓsən tizi nan Yeter na: «Asili, abeye!» Ya wiyən nak dəgdəh masalam nan ɓa, geslne armaka, vi gawlaktə ba'ə.

²¹ Yaŋ may Zeba də Salmunna aɓɗaŋ na: «Asil dəvoko, vi ɗəf an ɗəf na, aza makra nani yi!» Gedeyon asil abay Zeba gəm Salmunna, andek zəgeɗ va təla məlewit awlek zlogomeɗ neti.

Əbay ma ənziya egge na Gedeyon

²² Mə Israyelɗe aɓsənən Gedeyon na: «Asok məlĩ namə, isi, asna wətuko, asna wətən wətuko, vi kəkõhgəmək səvet mə Madiyanɗe.»

²³ Gedeyon aɓsit na: «Vaski ɓa, nəzəm na məlĩ akokum ɓa, wətu azəm na məlĩ akokum ɓa, Yawe dədawzəm məlĩ akokum.»

²⁴ Gedeyon aɓsit əmpa na: «Nəssohõkum zəga taka, ɗəf sərokum pak dəvay ndama na meleŋge səddəv ərəh na mawgay nani!» Ɗiy məskawəlet vet tahəŋ dit ndemeɗ na meleŋge, Vi mə Ismayelɗeŋgə.

²⁵ Mə Israyelɗe aɓɗaŋ na: «Waməpsuke.» Yaŋ apakaŋ lukut metiŋ afuŋ, azgaŋ akan, nawaydi pak ndama na meleŋge taka səddəv ərəh na ma wəgay nani.

²⁶ Gagdak net ndemeɗ na meleŋge məs attok vet agəɗək ammba kilo kaklaw sula. Mbəksa zəgeɗ va təla, metendeŋ naza sləma ɗəfa, may lukut pepreŋ nawgul net milyeŋge na Madiyan, mbəksa əmpa everzleɗ abayaŋ gawla awlet zlogomeɗ net dənɗaŋ.

²⁷ Gedeyon avotək zəga va zev lukut na daya net məsdəlveŋge dənɗaŋ, aziwgin a walaŋgəla-metiŋ nan a Ofra. Mə Israyelɗe beymet kan əddoŋ əɓuh met ammban adaka, kpaŋ bizwil sən Gedeyon də gəla nani.

²⁸ Təŋ sissiŋgi mə Madiyanɗe aɓe'eŋ sitin mə Israyelɗe, dəzbanən əslan kuturit ɓa. Dələv asanək addəv əffet wəzva kaklaw poɗo aka pay na Gedeyon.

²⁹ Yerub-Ba'al wət Yo'as mbat əsan ananda.

³⁰ Gedeyon awək kirin mezeŋgleket kaklaw buhul na uwa nani, vi gil nan diyɗaŋgə.

³¹ Gəran məs təsat a Sikem nat pak tuwə sənək wiyna, alvan na Abimelek.

³² Gedeyon wətən Yo'as amtək addəv əgal neneke; məndəkni addəv magamas na Yo'as afəni, a Ofra na Abiyezer.

³³ Adan Gedeyon amtə, mə Israyelɗe həmsak təŋ əppu' abet Ba'alɗe, yaŋ aɗinən Ba'al-Berit ka Maŋgəlva.

³⁴ Mə Israyelɗe dəɗɗumonən wən na Yawe Maŋgəlva net məs dəkõhgit səmmba vet meseŋgiɗit məs dəssoŋ kiyit tərwəsl pak nek əmpa ɓa.

³⁵ Dəɗinən kigəla na Yerub-Ba'al, Gedeyon ammba moggon an agəɗ sən Israyel pakəŋ ɓa.