Mətawaŋwəna 7 - Bible en Guidar

Ɗiy səkat hoku aɓɓa Gedeyon

¹ Gedeyon adawyaŋ na Yerub-Ba'al alvəɗək pum dit ɗiy en dəssoŋ dəndən beymeti, ampanən dibirgidik net a met iŋkile na Harot; dibirgidik net mə Madiyanɗe tam tay də disiŋ dəza mossorgo na More a təki məpəlayya.

² Yawe aɓsən Gedeyon na: «Ɗiy adayaŋgək ammboko, adayaŋgək ka nəppetigin əska wəlet mə Madiyanɗe; vi mə Israyelɗe adawkaɓaŋ akaw də ənəh na: “Vam dəkõhgəmə ɓa!”

³ Yaŋkəŋ na, affonsit ɗiy pak eslmet də ənəh na: “Ɗəf məs geslne arəm dədakker pak dəmil eŋgili, dəmbat dəra gərəm na Galad!”» Zel gabal kaklaw sula kiyən sula səmmbet amndoŋguk eŋgili, mbək zel gabal kəlaw.

⁴ Yawe aɓsən Gedeyon na: «Ɗiyiŋ adayaŋka'e. Aprikgit a met iŋkile, nəwelet sukgin adaka. Ɗəf məs nədawnahsuk na: “dəmbat də isi,” ndəni dədaddan də isi, ɗəf məs nədawnahsuk na adaddan də is ɓa, nan ambat na ɓa!»

⁵ Gedeyon aprikgitik ɗiy a met iŋkile, Yaŋ Yawe aɓsən na: «Ɗəf məs dəsket iŋkile aman ətaksla'it də hərzlumən vana kəra na, aziwgin temme, vaska'a də məs dəgduk də takpran kawsa iŋkile.»

⁶ Əŋɗa net ɗiy en dəsketin iŋkile də vet ətaksle'it a met aɗɗaŋgək zel səkat hoku, madambərgit ɗiy agdukoŋguk də takpret kawsa iŋkile.

⁷ Yawe aɓsən Gedeyon na: «Dit ɗiy səkat hoku məs dətaksle'in iŋkile də hurzlumtiŋ nədawkõhgukum, nədapsuk mə Madiyanɗe ammba voko. Madambərgit ɗiy pak dəmndoŋ naway pak ananda.»

⁸ En səkat hoku nek atafənək zəga nawzəm tivetive dit gozloreɗ navet ɗiy dədamndoŋ eŋgil pakə; siske na, Gedeyon appetik vadaya net ɗiy na Israyel əmndoŋ a gizlirkeɗe neti, ndən mbegit ɗiy en səkat hoku neki. Dibirgidik net mə Madiyanɗe tam tay a dohoŋ ammban, a təki məpəlayya.

Əska wəla arbəka

⁹ Dəfəɗ dasək na, Yawe aɓsən Gedeyon na: «Asili, aprik a dibirgidiki, nəpsukuk ammba voko.

¹⁰ An geslne tay əduk də əwak sit na, aprik a dibirgidik van də gawla nok Pura.

¹¹ Kəprəməgən mi adawpeleŋ adak di. Vasna, mokrok wasoku, wakəprik əwak sən dibirgidiki.» Ndən prik də gawla nan Pura nak hã bal sit ɗiy en məssẽhit a dibirgidik nawgaya.

¹² Mə Madiyanɗe dit Mə Amalekɗe gəm ɗiy na muyã nammba pay nampum appasaŋgək a təki məpəlayya ndimi ndimi va sesɓeke; zlogomeɗ net aŋɗaŋ ɓa va hoyoŋko a məlpa.

¹³ Gedeyon gap na, ɗəf yaŋ əŋɗan issine nan sən galani, amna: «Issine yaŋ nissini: nəwələk peŋ na haykəmari pepreŋ əkəɗəŋgəl a dibirgidik net mə Madiyanɗe, al hã a gizlirke argislsəni, aslaŋgən azbər kpaŋgən mədiŋgbile.»

¹⁴ Galan nak azlanka amna: «As aday na ki masalam na Gedeyon, wətən Yo'as mə Israyel ɓa. Maŋgəlva apsənək Madiyan ammba van də dibirgidik baymani.»

¹⁵ Adan Gedeyon aprəm wən na issine də an adarbani, appu'ko. Siske amndan a dibirgidik net mə Israyelɗe, yaŋ amna: «Misili! Yawe apsukumək dibirgidik net mə Madiyanɗe.»

Ənza net mə Madiyanɗe

¹⁶ Gedeyon awɗeketik ɗiy səkat hoku nek vanday hoku. Apsitik naway pak gozloro gəm tutuŋgok mekeleŋ də mətal offo addəvta.

¹⁷ Yaŋ aɓsit na: «Kulaŋgən kəlazawa, kəɗɗaŋgən va nawa! Pay nəgap aɓɓa dibirgidik na, an nədaɗɗa, anan kədaɗɗaŋgə.

¹⁸ Wanəffon gozloro in dit ɗiy nambaw pakə, asna mənokum məs ki dibirgidik tərwəsl tam kəffotingini, kənəhaŋgən na: “Sən Yawe gəm sən Gedeyon!”»

¹⁹ Gedeyon dit ɗiy səkat məs dəssoŋ dəndən agapaŋgək aɓɓa dibirgidik go'o aza təteŋgit sini; gəgaŋgəgaŋ məddəɗet məgaŋ təkiya. Yaŋ affonən gozloro, aŋgrofnin titiŋgeɗ nammba veti.

²⁰ Yas kan Vandayɗe hoku pak aŋgrofin titiŋgeɗi. Vet zlaɓay ərma mətal offo, vet dəzəŋ tam gozloro noffo, adaŋzlaŋ vaŋvəla: «Masalam sən Yawe gəm sən Gedeyon!»

²¹ Aziweŋgik ki dibirgidik tərwəsl naway pak a gəlan, dibirgidik bayman ndeleŋ, aɓuhun meti, anzoŋgu.

²² Aka pay ɗiy səkat hoku nek adaffonən gozloro, Yawe aɗɗak ka a dibirgidik na, naway pak əgdəh masalam aka ɗəf nani, yaŋ anzoŋ beymet hã a Bet-Sitta nadda kəla Serera, hã a ma walaŋgəla-metiŋ na Abel-Mehola gugo də Tabbat.

²³ Yaŋ miye mə Israyelɗe zev Neftali, zev Aser gəm zev Manase beymeti, azbanən ərɓehet mə Madiyanɗe.

²⁴ Gedeyon aslənək metiveɗ aka mossorgo na Efrayim bayman ənəh na: «Məprik ələmsit mə Madiyanɗe, mətak met iŋkile daabəŋ kiyit hã gap a Bet-Bara də Yurden pakə.»

²⁵ Armaŋgək milyeŋge na Madiyan sula, Oreb də Ze'eb. Abayənən Oreb aka milɓe na Oreb, Ze'eb tam a təki nawɗot uwa net wəleŋɗe na Ze'eb. Akanən ərɓehet hã kəla Madiyan, akisinin kiyit may Oreb gəm Ze'eb sən Gedeyon sə dəgar ki Yurden.