Mətawaŋwəna 5 - Bible en Guidar

Gəlya nat Debora

¹ Pay dəpas na, may Debora də Barak wətən Abino'am ayaŋgək gəlya də ənah na:

² «An məppani muhur kiya zlifsik-zlifsik a Israyel, an ɗiy appanək ki zit dəveti, məgəɗ soko sən Yawe.

³ Məprəma, mənokum milyeŋge! Məpak sləmokum mənokum ɗiy gugriɗe! Naw maw aka iya gəlya sən Yawe, maw aka əgagdakan Yawe, Maŋgəlva na Israyel.

⁴ Yawe, səza kəgil sə Se'ir, səza kəmbat abe sura na Edom na, dələv aɓəlka, disiŋ afloŋgik iŋkile, slaybuwən afloŋgik iŋkile,

⁵ mossorgoɗe luyuɓ səba Yawe an na Sinay, səba Yawe Maŋgəlva na Israyel.

⁶ Aka pay na Samgar, wətən Anat, pay Ya'el təsat na, tiveɗ na malaka arslaŋka, məddoŋ malaka əgəmaŋ tiveɗ məkkpaŋga.

⁷ Walaŋgəleɗe gugriɗ assoŋguk də met məza deyeɗe a Israyel ɓa, hã gap, in Debora nəsili, nəsil va ma Israyel.

⁸ Ɗiy aweleŋ meŋgilveɗ meleketeti, ndəni wəgay asan kan a met maddambeɗe net walaŋgəleɗe; Tuwãhi nawrəh baray taka də tulhõ taka, avet zel gabal kaklaw poɗo a Israyel.

⁹ Naw, makraw tay dit deyeɗe na Israyel, gəm dit ɗiy en dəpsənən kiyzit də wəŋgla neti. Məgəɗ soko sən Yawe!

¹⁰ Mənokum məpeŋgeŋ aket korɗe muguluŋgit babarɗeŋki, mənokum məs ɗewɗew aket kukurɗe məveret moggetiŋki, mənokum mədawaŋ tive tiveŋki, məɗɗumu.

¹¹ A met iŋkile, ɗiy məzuɗekin iŋkile tahəŋ əpel aka moggon na Yawe adaka, moggon nan aweleŋgit ɗiy na Israyel! Yas kan ɗiy na Yawe apurkoŋ a met maddambeɗe net walaŋgəleɗe gugriɗe.

¹² Afɗahə, afɗahə Debora! Afɗahə! Afɗah aɓap gəlya nalpa. Asili Barak, wətən Abino'am, dok dit en kərəmə!

¹³ Yaŋ en dəkõhoŋ apurkoŋ ezet milyeŋge, Yawe aɗɗak ka nəskəgən wəla aket ɗiy gembereɗi.

¹⁴ Məskaŋwəla aket mə Amalek hã sə Efrayim azzoŋgu. Benyamin azboko, asapək ara vanday noko. Sə Makir milyeŋge adawgulyoŋgu, sə Zabulon tam deyeɗe net məzəlpaŋgə.

¹⁵ Deyeɗe na Isakar asapaŋgək azat Debora. Va na Isakar, vaski Barak azbat də tələn a təki məpəlayya. Addəv mahəlfa na Ruben na, əŋzlamay vadaysa!

¹⁶ Mə dəray kəssoŋ a weleŋgit gazlaŋɗe əprəm uffo na pozloro net məzuteɗeŋɗe di? Addəv məlma na Ruben na, əssõhɗeŋ vadaysa.

¹⁷ Galad nan dəgar ki Yurden asani. Mə dəray Dan asan də gəla aket bəlayɗe di? Aser nan asanək də gəla ama pehe, a maŋgava təki nawziw net bəlayɗe nani.

¹⁸ Ɗiy na Zabulon gəm na Neftali dəgeslne'eŋ sənən əmta ɓa aganənək aka gərəm awra.

¹⁹ Yaŋ milyeŋge azzoŋgu, alpaŋgə, alpaŋgək dit milyeŋge na Kana'an a Ta'anak go'o ezet iŋkile na Megiddo; ya dəgəmaŋ təbəz bəbar ɓa.

²⁰ Hã sə disiŋ ŋgərzleɗ alpaŋgə; səka tive nawdaw net alpaŋ də Sisera!

²¹ Məlpa na Kison akeke, məlpa na maguwa, məlpa na Kison! Wandaw ama wəgay məza geslne ɓa.

²² Yaŋ eperkeperkeɗe net pilseŋge kan adaslmanən dəlvafuŋ də əŋkor neti.

²³ Yaŋ maslay na Yawe anah na: Məraygən Meroz. Məraygit ɗiy nadak də gəla, vi dəzzoŋ əbbah sən Yawe ɓa, dəzzoŋ əbbah sən Yawe dit gambareɗ nan ɓa.

²⁴ Səret gil pak əzaɓ dəsan akat Ya'el, guluk na Heber mə Keni, əzaɓ dəsan akat anat səret gil naddəv gizlirke pakə.

²⁵ Iŋkile aŋgələ, yaŋ təpsən moŋvo; addəvət huluŋguk na sləma təpsən ləbam.

²⁶ Ndət vat təl, təbəz nakkpa' afuŋ gəm əgəmən, vat dəzəŋ tam ndəvəl net məɗɗaŋ wəza hembit. Təkkpa' Sisera, təŋgrof kiyən; təkrap kolmboŋgən təflike.

²⁷ Ndən a walaŋ tələt pirfif, ndən zəbər, a walaŋ tələt ɓəlohu; a walaŋ tələt asan pirfif, azbərə. A təki asan pirfif əŋki, azbər məmtən.

²⁸ Yaŋ ma Sisera tədawla də təkifoŋgo məppa aza gəla, dəra zlazlar na təbza, tədawɓuh mata: “Mi dəgəɗ mawta nawgay nan ada əliya dazzan di? Mi dəgəɗ ədaw net mawteŋɗe nan nawsak zəgeɗ asan zay di?”

²⁹ Ndət əmsak əsɗeken sən kiyət əpel an beyneŋgiɗət en məsmaɗɗulet azlan sətəni:

³⁰ Wasan arəhaŋgək zəga səma wəgaya, tahəŋ uɗakani: goruk akən mərma taka, awaniɓa sula sən məzəlpa pakə, gabagaɗe mənɗerit, məbay sit gawla tam sən Sisera, vaski, gabaga temtem sula məbay sən gawla na təwəɗ awla məskaŋwəla.

³¹ Vas meseŋgiɗuk pak adamtaŋgə Yawe, ɗiy en dəŋgluwkun dəwiɗeŋ va pay, aka adawgilyen də əzla nan grakəŋka!» Səɓɓan na, dələv asanək əffet wəzva kaklaw poɗo.