Mətawaŋwəna 4 - Bible en Guidar

Debora də Barak

¹ Dərɓaga əmta na Ehud na, mə Israyelɗe təŋgaŋ əɗɗa zəga mbərayən a mahara Yawe əmpa.

² Yawe mbegit ammba va Yabin, məlĩ na Kana'an dəsan a Hasor. Sisera, daya net məzəlpaŋ nan tam a Haroset-Goyim asani.

³ Mə Israyelɗe ahəmaŋgək sən Yawe, vi Yabin van tay dit mawteŋɗe nawgay na təbəz səkat vaytakə. Agəɗək wəzva kaklaw sula aka əsər met mə Israyelɗe.

⁴ Dasək na, məskleŋgək Debora, guluk na Lapidot tə mətaw wən a Israyel.

⁵ Debora təsatək də gəla ammba gogozlo nata, a walaŋ Rama də Betel, aggərəm na Efrayim. Adaki mə Israyelɗe adawpeŋgeŋ azat ətaw wəna.

⁶ Təslən iya Barak wət Abino'am sə Kedes dələv na Neftali, təɓsən na: «Yawe Maŋgəlva na Israyel aɗi sukuk wən naɗɗa. Doko, andə ɗiy gabal kəlaw səddəv mahəlfa na Neftali gəm na Zabulon, akkelet aggərəm na Tabor.

⁷ Wanəkkən Sisera, daya net məzəlpaŋ na Yabin kəlazok dit mawteŋɗe nawgay nani, də dula nan pak a məlpa na Kison, wanəpsuk ammba voko.»

⁸ Barak aɓsət na: «An wakəl də ina, asna wandawa; an kəl na də in ɓa na, ndaw na ɓa.»

⁹ Debora təmna: «Wandaw də isi, ya sləmok agil na aka tive məs kədawdaw van ɓa hara, vi ammba vat gulkiyi Yawe adappan Sisera vani.» Yaŋ Debora təsili, təmbat də Barak a Kedes.

¹⁰ Barak akkalanək mahəlfa na Neftali gəm na Zabulon a Kedes. Zel gabal kəlaw azbanənka, Debora pak tələk dəndəni.

¹¹ Heber mə Keni awɗakək də Kayen gəm dit kirtin Hobab, afət ga Moyis, ampa gizlirke na gabaga nan hã a maŋgava wəlaŋga adawyaŋ na Elon a Sa'anayim dəsan go'o aza Kedes.

¹² Məprəman səni Sisera na, Barak wət Abino'am, apeŋgək aka gərəm na Tabor.

¹³ Sisera ləŋ mawteŋɗe nawgay na təbəz nan səkat vaytak dit ɗiy nan pak kəkalgit a Haroset-goyim, addoŋ a lolohõ na Kison.

¹⁴ Debora təɓsən Barak na: «Asili! Də pay aŋki Yawe adapsuk Sisera ammba voko, ha'aw Yawe tay ədaw aboko!» Barak prik səggərəm na Tabor dit ɗiy gabal kəlaw ammbani.

¹⁵ Yawe attapanək Sisera dit mawteŋɗe nawgay nan gəm dibirgidik nan baymani, Barak abey də masalam. Sisera prik səka mawta nawgay nani, anzan də tələni.

¹⁶ Barak akak wərɓehet mawteŋɗe nawgay na Sisra də dula nalpa nan pak hã a Haroset-Goyim; dula nalpa na Sisera bayman amtək ama masalam; ɗəf tay dəmbər təttaka ɓa.

¹⁷ Sisera anzanək də tələn a gizlirke na gabaga nat Ya'el, guluk na Heber mə Keni, vi əsler tay a walaŋ Yabin məlĩ na Hasor də gəla na Heber mə Keni vani.

¹⁸ Ya'el vit ələmsən Sisera, təɓsən na: «Amzlahə daya nawa, amzlah anawda, kəgeslne' ɓa!» Ndən mbəzlah anadda, ndət godo akan zəzəɗə.

¹⁹ Yaŋ aɓsət na: «Kamə, avay iŋkile nawsa siɗikke, vi meme tay ədəwəni». Ndət ma kwenekwene na moŋvo kol, ta' sən asə, ndət həmsak zəga akan zəzəɗə.

²⁰ Aɓsət na: «Dok əziw a maddamba, an ɗəf adek əttokoko, anahək na: ɗəf tay aŋ sa na, asna kənahgən na, tay ɓa.»

²¹ Sisra ayək sawɓa, yaŋ aleŋ bəslə. Ya'el ga Heber kan ana ndəvəl gəm təbəz nampa gizlirke na gabaga dəndən hãs, azan tele tele toŋ. Yaŋ təkkpa' təbəz nak aka tapaslayən hã ambat ətoŋ afuŋ. Sisera nan tay məleŋgin palala miyan. Ndən zamə.

²² Barak tam yaŋ əzban Sisera vani, Ya'el ləŋ aban dal ələmsəni, təɓsən na: «Ade nərban suk ɗəf məs kədawkayani.» Ndən toŋ anatda na, Sisera yaŋ ɓəlohho məmtən, təbəz nampa gizlirke a tapaslayən biɗimme.

²³ Pay dəpas na, Maŋgəlva arbəsənək wil sən Yabin, məlĩ na Kana'an abet mə Israyelɗe.

²⁴ Mə Israyelɗe kan vet aka Yabin məlĩ na Kana'an kan tiliwwe hã ndəɗaŋ mbo' əzani.