Mətawaŋwəna 16 - Bible en Guidar

Samson a Gaza

¹ Samson alək a Gaza. Yaŋ awəl guluk məpolkoyok adaka, ndən mbat azata.

² Məpel sitiyi ɗiy na Gaza dawnəh na: «Samson adek ahəŋka.» Yaŋ asərŋgəsləni, asoroŋ a metive na walaŋgəla-metiŋ də dəfɗa, assoŋ semsem dəfəɗ nan gərak də ənəh ammban na: «məgasəm təki dəddaŋ məbaygəni.»

³ Samson avoŋko, yaŋ də tətaŋ dəfəɗ na asili, arme maddambeɗe na metive na walaŋgəla-metiŋ van sulegit sap dit məmpa afuŋ neti, aptiw də zəga nawkəɗəslən pakə, aklek a mawəlani, ake hã a dadwar ki mossorgo dəsan a mahara Hebron.

Dalila təppasanək Samson

⁴ Səɓɓa asna, asimtək guluk na walaŋ na Sorek; iya nat na Dalila.

⁵ Milyeŋge net mə Filistiɗe peŋgeŋ azata, yaŋ aɓsətən na: «Ambəɗani, kəsəngən gabba gbogboŋ nan gbaŋkəŋka, va mbar mədaska wəlan di, məɓrukgən kaddakani; waməpsuk nawaydi pak koɓeɗ na təbəz babar gabal də səkatə.»

⁶ Dalila təɓsən Samson na: «Əŋga anah su ɗa, mi dəpsuk gbogboŋ gbaŋkəŋ di? Kaɓrukuk də mi naddokok di?»

⁷ Samson aɓsət na: «An məɓrukwi dit tətembleɗe meleketet məs məkliwtiyi ɓa na, wanəddakə, asna, wanəsaw va ɗəf mawandi pakə.»

⁸ Milyeŋge net mə Filistiɗe akaŋ sətənək tətembleɗe meleketet buhul məs məkliwtiyi ɓa, yaŋ təɓruk dənɗaŋ.

⁹ Dəka ɗiy tahəŋ sorsor a giziŋ anadda, yaŋ təɓsən na: «Samson! Mə Filistiɗe yeŋ akoko!» Samson aɓriw tetembleɗe va gaɗmay məɗəmən an offo arəŋgənəka. Mərəhni gabba gbogboŋ nan ɓa.

¹⁰ Dalila təɓsən Samson na: «Yaŋkəŋ na, kəsmayguka, kəwəsuwək wəna. Kakaŋ na, əŋga anah su ɗa, kaɓrukuk də miyi di?»

¹¹ Aɓsət na: «An aɓrukwənək dit helegeɗ meleketet məs dəɗɗaŋ wəza ɗah ɓa na, asna wanəddakə, wanəsaw va ɗəf mawandi pakə.»

¹² Yaŋ Dalila təgəm helegeɗ meleketeti, təɓruk dənditi, tənah sən kan na: «Mə Filistiɗe akoko Samson!» Dəka ɗiy tahəŋ sorsor a giziŋ anadda. Aɓriw səka van va gaɗmay məɗəmən.

¹³ Dalila təɓsən Samson na: «Hã kakaŋka, kəsmayguka, kəwəsuwək wəna. Anah suwa, kaɓrukuk də miyi di?» Aɓsət na: «Də ətroɗ muhur kiyu buhul də gaɗmay məzəyən na saka yi.»

¹⁴ Yaŋ təkkpa' saka də tələn aza gəla, tənah sən kan na: «Mə Filistiɗe akoko Samson!» Ndən bizlwir əfɗəh səket sin nani, yaŋ aptu təl saka təkkpa' dəndən nak dət moguluk nani gəm gaɗmay məzəyən na saka naka.

¹⁵ Yaŋ təɓsən na: «Mbarmbar kədawnəh na, “kəŋgluwəka” mbaraka mokrok tay akaw ɓa di? Təl hoku yaŋ kəsmayguwa, kərbansu va gbogboŋ nok asan diyɗaŋ ɓa!»

¹⁶ Adan tədawtokoslon də əpel nat pay pakə, akiyək mani, kpaŋ dəɓap əɓəsən ɓa,

¹⁷ yaŋ anah sət an naddəvən gərakə, aɓsət na: «slambər dəɗi ɗah akaw ɓa, vi məwele na Maŋgəlva nənan təŋ səddəvət əmma. An məfaɗi kiyu na, asna gbogboŋ naw wagil səzawa, wanəddakə, asna, wanəsaw va ɗiy pakə.»

¹⁸ Dalila tulak na, anah sətək an naddəvən gərakə, yaŋ təslən təye milyeŋge net mə Filistiɗe də ənəh na: «Kakaŋ na, məde kana, vi anah suwək an naddəvən gərakə.» Milyeŋge net mə Filistiɗe nek addoŋ anadda dit koɓeɗ nek aveti.

¹⁹ Yaŋ təleŋgən aka təlta, təyə ɗəfa, tətaw ətroɗ naka kiyən buhul neki; vaski kan tətəŋ əɗɗa an təŋgəl dəndəni, vi gbogboŋ nan agilik səzani.

²⁰ Yaŋ tənah kan na: «Mə Filistiɗe akoko Samson!» Ndən bizlwir əfɗəh səket sin nani, amna wanəgil va ɗayɗayə, wanəkõgən kiwa, nan dəsən na Yawe aktohuk gəɓan səzani ɓa.

²¹ Yaŋ mə Filistiɗe armanəni, agdəhənən haran sulagəni, aprikginən a Gaza, aynanən dit ŋgəyamɗe heret sula na təbəz pepreŋge. Asanək əkkpaŋgan gərəm nawsər addəv gəla net məfərsəneɗi.

²² Muhur kiyən atəŋgək əgilyan səza məfaɗən naka.

Wəza na bigawla an Samson agəɗ meddirɓe, gəm əmta nani

²³ Pay mbərən na, milyeŋge net mə Filistiɗe akkalaŋgək kawzaɓ-Maŋgəlva gədak sən Dagon maŋgəlva neti gəm kanneken ziti. Yaŋ adawnahaŋ na: «maŋgəlva nam apsəmək masam Samson ammba vamə.»

²⁴ Ɗiy təm ulanənəŋka, ndəɗaŋ əgagdakan maŋgəlva neti, vi aɓɗaŋ na: «maŋgəlva nam apsəmək masam ammba vamə, an məzuraygən dələv namə, may dəŋroɓ ɗiy nam naka.»

²⁵ Adan mekret anneki, yaŋ aɓɗaŋ na: «Məya Samson dəsmaygəmgəni.» Ayanən Samson səddəv gəla net məfərsəneɗi, adaɗɗa zəga na dərwa abeti, aziwginən a weleŋgit dədəkeɗi.

²⁶ Yaŋ Samson aɓsən wiyən an məzərma van əgdəhən nak na: «Azarguwa, nəttimetgin dədəkeɗ məs gəlaŋ asan aketiŋki, vi nəgesgən ezeti.»

²⁷ Gəla van aknahək dit zeli, may gili. Milyeŋge net mə Filistiɗe beymet tahəŋ adaka. Aka təgbalka nani, zel dit gil məzulanən wərda na Samson waɗɗaŋ gabal hoku.

²⁸ Yas Samson akkaman Yawe amna: «Kamə Yawe Maŋgəlva, aɗɗum akawa, akkpaŋgaw gboŋgboŋ aka an yaŋkəŋ kaka'ə, kamə Maŋgəlva, vi nəmpəlgən ki dəmən na haraw sulaŋ təl taka moggon aket mə Filistiɗe.»

²⁹ Samson kan, təttəm təttəmgit dədəkeɗ sula naddak təkiya, məs gəla aziw aketi; attəŋ zən azeti, aza taka də van dəzəŋ, aza taka maɓɓan də van zlaɓay.

³⁰ Samson anah kan na: «Nəmtə dit mə Filistiɗe!» Yaŋ aslaŋgit də gbogboŋ nan pakə, gəla van aɓəsl aket milyeŋge gəm aket ɗiy məs dəssoŋ adak pakə. Ɗiy en abay dəmta nan diyɗaŋ daykiyit en abay gala asan madarani.

³¹ Milmiŋgiɗin də gəla na afən bayman apurkoŋ aslanəni; apeŋgeŋ andəkənən a walaŋ Soreya də Esta'ol, addəv magamas na Mano'ah afəni. Nan asanək mətaw wən a Israyel wəzva kaklaw sula.