Mətawaŋwəna 12 - Bible en Guidar

Wəgay naweleŋgit mə Efrayimɗe də Yefte

¹ Ɗiy na Efrayim akkalaŋka. Ndəɗaŋ dəggar kəla Sifon. Aɓsənən Yefte na: «Mi dəgəɗ kəggar əgay dit mə Ammonɗe, məza əyəm nadda də is ɓa di? Waməɗi sən offo sən gəla nok akoko.»

² Yefte aɓsit na: «In dit ɗiy naw na, məgayək gədak dit mə Ammonɗe. Nəŋgəzlək vaŋvəl əyukum, ya kəkõhguwən səvet ɓa.

³ Səza nula na, məkõhguwən kənaŋ ɓa, in haraw sek aka əmta, nəggar aket mə Ammonɗe, ya Yawe apsiwik ammba vawa. Mi dəgəɗ kepeŋgeŋ pay dəpaŋ kawgay də in di?»

⁴ Yaŋ Yefte akkelet zel na Galad beymeti, agay dit ɗiy na Efrayim da. Zel na Galad abeynin zel na Efrayim, vi anəhaŋgək na, «Mənokum ɗiy na Galad na, mənokumtə ɗiy na na Efrayim məs dənzoŋ əkõhgən kiyti, səza mahəlfa na Efrayim kəkkpaŋgaŋ addəvən na Manase.»

⁵ Yaŋ ɗiy na Galad atakənən təki temtem naggar ki məlpa na Yurden a Efrayim. An ɗəf na Efrayim məzəsmaɗ anahək na: «appaw nəggarə», asna ɗiy na Gala'ad əssõhon man na: «Mə Efrayim kənan sa?» An anahək na: «Awwo»,

⁶ asna, ndəɗaŋ ənah sən na: «əŋga anah na Sibbolet ɗa.» Ndən ənəh na «Səbbolet,» vi aɓap na ənahən təstəs ɓa; asna, ndəɗaŋ ərman əbayənən a mabuzgum na Yurden adaka. Aka pay nan na, zel na Efrayim gap gabal kaklaw poɗo kiyən sula amtaŋka.

⁷ Yefte asanək mətaw wən a Israyel wəzva sləre, siske na Yefte mə Galad zamə, məndəkən a walaŋgəla-metiŋ nan a Mispe na Galad.

Ibsan, Elon gəm Abdon

⁸ Sə dərɓagan na, Ibsan na Bet-Lehem dəsan mətaw wən a Israyel.

⁹ Kirtin mezeŋgleket tahəŋ kaklaw hoku, muguluŋgit kaklaw hoku. Gorɗeŋge vetiski, apsitik ɗiy-ɗar ka gili, yaŋ akay gorɗeŋge en kirtit ɗiy-ɗar sit kirtin ka gili. Asanək mətaw wən a Israyel wəzva buhul,

¹⁰ Ibsan nak zamə, məndəkən a Bet-Lehem.

¹¹ Səɓɓan na, Elon ɗəf na mahəlfa na Zabulon dəsan mətaw wən a Israyel wəzva kəlaw.

¹² Elon na Zabulon zamə, məndəkən a Elon aka dələv na Zabulon.

¹³ Səbbərən na, Abdon wətən Hillel na Piryaton dəsan mətaw wən a Israyel

¹⁴ Kirtin mezeŋgleket tahəŋ kaklaw poɗo gəm kirtit kirtin kaklaw hoku, pakgit məpeŋgeŋ aket korɗe kaklaw buhul. Asanək mətaw wən a Israyel wəzva dədopoɗo.

¹⁵ Yaŋ Abdon wətən Hillel na Piryaton amtə, məndəkən a Piryaton aka dələv na Efrayim, aggərəm net mə Amalekɗe.