Mətawaŋwəna 1 - Bible en Guidar

Wən an dəgəɗ hã gap aza əmta na Yosuwa ( 1:1—2:10 ) Mə Israyelɗe azinənək gəla a kana'an

¹ Dərɓaga əmta na Yosuwa na, mə Israyelɗe assohõnənək Yawe aɓɗaŋ na: «naway naddan səm daabəŋ əwak sit mə Kana'anɗe də əlpa di?»

² Yawe amna: «Yuda yi naddani, yaŋ nəpsənək dələv ammba vani.»

³ Yaŋ Yuda aɓsən Simeyon məlmən na: «Apeŋ də in aka hara dələv nawa, məlpəgən dit mə Kana'anɗe. Səɓɓan na, ndawgən tam də is aka hara dələv noko.» Yaŋ Simeyon ambat dəndəni.

⁴ Yuda nak peŋgi, yaŋ Yawe agim mə Kana'anɗe dit mə Perziɗe apsit ammba veti, abayaŋ zel gabal kəlaw a Bezek.

⁵ Yaŋ arəhənən Adoni-Bezek a Bezek vani, awakaŋ sənən də wəlpa; askanən wəlet mə Kana'anɗe dit mə Perziɗe.

⁶ Ya Adoni-Bezek ɓak ənzani, yaŋ azbanəni, armanəni, arslenin pirŋgiɗ van dit pirŋgiɗ tələn mezeŋgleketi.

⁷ Yas Adoni-Bezek amna: «Milyeŋge kaklaw buhul, məs mərsla pirŋgiɗ vet dit pirŋgiɗ tilit mezeŋgleket, akmaŋgək zəga nawzəm an diyo' səmmba tabəl nawa. Va nəgəɗə, vas Maŋgəlva amndagan suwa!» Akanən a Yerusalem, amtə adaka.

⁸ Mə Yudeɗ waksənən Yerusalem, amõhnəni. Azetin ɗiy nadak pak də masalam, aɗi sənən offo sən walaŋgəla-metiŋ.

⁹ Səɓɓan na, mə Yudeɗ apurkoŋguk əlpa dit mə Kana'anɗe məs dəssoŋ də gəla aka mossorgo, a dohoŋ gəm aka dələv na Bagərma.

¹⁰ Yuda awaksitik mə Kana'anɗe dəssoŋ a Hebron, Hebron van iya nan lahəŋ na, Kiryat-Arba yi. Askanən wəlet may Sesay, Ahiman də Talmay.

¹¹ Siskiŋ na, al əwak sit ɗiy na Debir, iya na Debir van lahəŋ na Kiriyat-Sefer yi.

¹² Kaleb atələk ma, amna: «Ɗəf an dəska wəla Kiriyat-Sefer dəmõh na, wanəpsənət wətu Aksa ka goni.»

¹³ Yaŋ Otniyel wətən Kenaz, mabərki Kaleb amõhõ, Kaleb apsənət Aksa wətən nak ka goni.

¹⁴ Səza təgap ananda ləŋ na, ndət təŋ əreɗin əŋgla guli ava afəta. Ndət prik səka koro nata, Kaleb aɓsət na: «Mi kəŋgəl di?»

¹⁵ Təɓsən na: «Awəl sahã akawa, vi dələv na dohoŋ kəvayəŋ məklakani yi, avay met iŋkile.» Kaleb apsət met iŋkile naka mossorgo, gəm met en nammban afuŋ.

¹⁶ Yaŋ Kirtin Keni, zev afət guluk na Moyis, apeŋgeŋ sə walaŋgəla net gogozleɗi dit kirtin Yuda əmbat a kapta-muyã na Yuda məs dəsan dohoŋ na Arad. Addoŋ əssa də gəla eret ɗiyi.

¹⁷ Yuda mbat də Simeyon məlmən ama wəlpa, akaŋ sitin mə Kana'anɗe məs dəssoŋ də gəla a Sefat. Akkãhnən walaŋgəla-metiŋ vani. Məlvani walaŋgəla-metiŋ van na, Horma, va wənəh na: «Əraya.»

¹⁸ Yuda amõhuk Gaza də kivadələv nani, Askelon də kivadələv nani, gəm Ekron də kivadələv nani.

¹⁹ Yawe asanək də Yuda, ndəni amõh ki mossorgo, ya dəɓap ərɓih ɗiy na walaŋ ɓa, vi tahəŋ dit mawteŋɗe na təbəz nawgaya.

²⁰ Apsənənək Hebron sən Kaleb va Moyis aɗi wən nani, yaŋ Kaleb arɓehet mə Anakɗe tem tem hoku sədaka.

²¹ Mə Yebusɗe məs dəssoŋ a Yerusalem də gəla na, kirtin Benyamin dəɓap ərɓihin ɓa, mə Yebusɗe assoŋguk də gəla a Yerusalem sap dit kirtin Benyamin hã pay dəpaŋka.

²² Gəla na Yosef, net tam apeŋgeŋgik a Betel, Yawe asanək dənɗaŋ.

²³ Gəla na Yosef nak slən əsənglan Betel; iya na walaŋgəla van lahəŋ na, Luz yi.

²⁴ Məsekeɗeŋ təki nek awlaŋgək ɗəf əgilyan sə walaŋgəla, yaŋ aɓsənən na: «Arban səm təki nawtoŋ a walaŋgəla, asna waməsam nek nek də isi.»

²⁵ Yaŋ arban sit təki nawtoŋ a walaŋgəla vani, abeynin ɗiy na walaŋgəla van gərak də masalam, appanən ɗəf nak ambat də məlma nan pakə.

²⁶ Ɗəfəs ammbat aka dələv net mə Hittiɗe ampə walaŋgəla məs alvan na Luz; aski iya nan hã pay dəpaŋka.

²⁷ Manase dərɓehet ɗiy en dəssoŋ də gəla sə Bet-Se'an də kiva nani, en na Ta'anak də kiva nani, en na Dor də kiva nani, en na Yible'am də kiva nan dit en na Megiddo də kiva nan ɓa; mə Kana'anɗe dəzaraŋ zarsa səka dələv van ɓa.

²⁸ Adan mə Israyelɗe arəhaŋ gbogboŋ na, akkpeŋgetinik mə Kana'anɗe ka belemɗe, ya dərɓehetin dərɓəh ɓa hara.

²⁹ Efrayim dərɓehet mə Kana'anɗe dəssoŋ də gəla a Gezer ɓa, mə kana'anɗe assoŋguk a weleŋgit adak a Gezer.

³⁰ Zabulon dərɓehet ɗiy dəssoŋ də gəla a Kitron may en na Nahalol ɓa. Mə kana'anɗe vet assoŋguk də gəla a weleŋgiti, məɗiyiti ka belemɗe hara.

³¹ Aser dərɓehet ɗiy dəssoŋ də gəla a Akko may en na Sidon, na Ahlab, na Akzip, na Helba, na Afik gəm na Rehob ɓa.

³² Mə Aserɗe assoŋguk də gəla a waleŋgit mə Kana'anɗe naka dələv adaka adan dərɓehetin ɓa.

³³ Neftali dərɓehet ɗiy dəssoŋ də gəla a Betsemes may en na Bet-Anat ɓa, assoŋguk də gəla a weleŋgit mə Kana'anɗe məs dəssoŋ də gəla aka dələv adaka; ɗiy na Betsemes gəm na Bet-Anat akkpaŋgaŋgək belemɗe neti.

³⁴ Mə Amorɗe areɗinik ɗiy na Dan dəka mossorgo, appetin əpirke afuŋ a walaŋ ɓa.

³⁵ Mə Amorɗe assoŋguk fiwwe də gəla a Har-Heres, a Ayalon gəm a Sa'albim, ya səza va Yosef asəɓ aza boto na, mə Amorɗe akkpaŋgaŋgək belemɗe.

³⁶ Dələv net mə Amorɗe asilik sə təki nawpeŋ net Hərziyeɗi, təŋ səza milɓe əpeŋ də disiŋ.