Məsdəlveŋge 27 - Bible en Guidar

Əfaɗ na əswaya Məs mətawən nawfaɗ vi iynama

¹ Yawe apel sənək Moyis amna:

² Apel sit mə Israyelɗe; anah sit na: An ɗəf tawfaɗ əsway an asway napsən ɗəf sən Yawe na, dəziw aka va adawbiten ɗəfa,

³ vaŋki əbit neti. Ɗəf dəgəɗ wəzva kaklaw sula wəmbat aza kaklaw sləre, əbit nan na koɓeɗ kaklaw sle'i də koɓeɓ naddəv gəla na Maŋgəlva.

⁴ An guluktə, əbit nat na koɓeɗ kaklaw hoku.

⁵ Ɗəf məs wəzva nan təŋ səza sle' əmbat aza kaklaw sula, əbit na wiyna, koɓeɗ kaklaw sula; nat waŋkə, koɓeɗ kəlawə.

⁶ Net kirin təŋ səza təla taka əmbat aza wəzva sle'i, əbit na wəyin mizilin, koɓeɗ sle'i; nat waŋkə, koɓeɗ hoku.

⁷ Ɗəf gəm səza wəzva kaklaw sləre əmbat abe, əbit na ɗəf mizilin koɓeɗ kəlaw kiyən sle; nat gulku, koɓeɗ kəlawə.

⁸ An ɗəf van məssahãy aɓap na kawrəkən va an məziwgin ɓa, dəziwgingin ɗəf məvələn sən Maŋgəlva nak aba məsdələva, vi məsdələv dulagən va adalbaha; məsdələv dulagən əlbəh nan aza ərah na ɗəf vani.

⁹ An zəga mamayã səmmbet en ɗəf adawɓap əpsən sən Yawe yi, zəga mamayã məpsən Yawe pak na, zəga məs heslepe tay azan ɓa yi;

¹⁰ kaddəɗani ɓa, kawgəm a gəla mbərən ɓa, an moggon a gəla an daryaw ɓa, an daryaw a gəla an moggon ɓa. Də as pak an ɗəf addəɗanək zəga mamayã də an maɓɓani, zəga mamayã məddəɗən də an məgəmən a gəlani wassoŋ salala.

¹¹ An zəga mamayã məs heslepe azani, an nawkiyi sən Yawe ɓa, dəkagən zəga mamayã van aba məsdəlva;

¹² məsdələv dulagən wən nani, moggoni sa awaniɓa daryawi sa gəm kawziw aka va məsdələv awla wən nani.

¹³ An ɗəf aŋgələk kawmani, duɗakangən əlbah nan sle'i, dəzleɓgən taka nan aka va an adalbaha.

¹⁴ An ɗəf aɗiyək gəla nan sən Yawe ka zəga məs heslepe tay azan ɓa, məsdələv dulagəni, moggoni sa awaniɓa daryawi sa kawziw aka va məsdələv adaziwgin əvəl nani.

¹⁵ An ɗəf məs diynan man əɗi gəla nan van man aka əmani, duɗakangən əlbah nan sle'i, dəzleɓgən taka nan aka va an adalbaha.

¹⁶ An ɗəf aynanək man sən Yawe nawɗi guli nani, əman nan tay gba zeŋve naslga addəvni; kilo səkat hoku na hay na, koɓeɗ kaklaw sle'i;

¹⁷ an ɗəf aɗiyək guli nan wəzva na wəzləra nawpəl kiyit ɗiyi, əman nan dəsangən va məziwgini;

¹⁸ an dərɓaga wəzləra nawpəl kiyit ɗiyi ɗəf aɗi guli nani, məsdələv dəŋɗangən koɓo nan də ula wəzvaɗe məs dəppaŋgə nawga wəzləra nawpəl kiyit ɗiyi, dəprətgən səddəv va məziwgini.

¹⁹ An ɗəf dəɗi guli van man aka əbitni, duɗakangən əlbah nan sle'i, dəzleɓgən taka nan aka va an adalbaha, asna guli wakkpaŋ Kanani.

²⁰ An tak məbitni ɓa, avəl sənək ɗəf mbərni, tive nawbitin wasan əmpa ɓa,

²¹ pay nawman guliyəs a wəzləra nawpəl kiyit ɗiy na, wasan guli məpsən Yawe va zəga məza heslepe ɓa; wakkpaŋ ərah na məsdəlva.

²² An ɗəf aynanək man nawɗi guli an albah dəlbah sən Yawe, məza səddəv an nawray nan ɓa,

²³ məsdələv dənɗangən əbit nan hã gap aza wəzva na wəzləra nawpəl kiyit ɗiyi, asna kawfaɗ əbit nan dəpas dəpaska; as zəga məs salala sən Yawe yi.

²⁴ Pay na wəzləra nawpəl kiyit ɗiy na, guli wakkpaŋ kana ɗəf an məlbahən səvani, sən ɗəf məs asan ərah nani.

²⁵ Əbit zəga pak kawslani də koɓo naddəv gəla na Maŋgəlva. Koɓo taka pak gagdak nan tay kilo kəlaw.

Əvəl temtemi

²⁶ Adan uwa maddaabəŋ na Yawe yi na, arbək na ɗəf aɓap na əɗi wət zəga mamayã nan maddaabəŋ na wasliya, time awaniɓa na hãw sən Yawe ɓa.

²⁷ An zəga mamayã məs də heslepe yi, kawɓapi əbitin də əzleɓ taka na uɗak sle'i na əlbah nani; an məbitni ɓa, kawvələn va məziwgin əlbah nani.

²⁸ Dərɓaga as əmpa, an nava ɗəf məpsən Yawe pak na: ɗəfa, zəga mamayã awaniɓa gulyo səddəv zəga nawray vani, kawvəlni ɓa, kawbitni ɓa. An məpsən pak na, zəga məza heslepe tay azan ɓa yi sən Yawe;

²⁹ ɗəf məpsən Maŋgəlva pak na kawbitni ɓa, kawbayni.

³⁰ Taka səddəv kəlaw məgəmən səka zəga nawzəm naka dəlva awaniɓa səka uwa net wəleŋɗe sən Yawe; zəga məwelin sən Yawe yi.

³¹ An ɗəf aɗɗumuk nawbit zəga məs aki taka səddəv kəlaw nani, dəzleɓgin taka səddəv əlbah nan muɗakan sle' akani.

³² Taka səddəv kəlaw na zəga mamayã, wasliya, time awaniɓa hãwã, va wənahən na zəga mamayã makəlawan məs dətoŋ dəmmba zleŋge pak na, zəga məs heslepe tay azan ɓa yi sən Yawe;

³³ kawkeyeti en moggeti awaniɓa daryawɗe ɓa ya kaddəɗeti ɓa; an ɗəf addəɗanək ka, zəga mamayã məddəɗən də an mbərən, zəgeɗ məs heslepe tay azet ɓaŋ: kawɓapi əbitit ɓa.

³⁴ Eskiŋ əpelɗe na ənziya məs Yawe apsit mə Israyelɗe aka mossorgo metiŋ na Sinay də ma Moyis.