Məsdəlveŋge 24 - Bible en Guidar

Zəga nawɗi lalam akan addəv gəla na Maŋgəlva

¹ Yawe apel sənək Moyisi amna:

² «Kənah sitgən mə Israyelɗe dəkayaŋ sukungən mẽl na hereme an ɗololo, narman offo, dəfəɗ də kapay ɗayɗayə,

³ aba məzlzlara dəɗaman akoti na wənmiyna naddəv gizlirke nalma də Maŋgəlva. Aron dəɗigən gala ndən nawsan guɗɗo də moskoy hã təki dadaŋ aba Yawe pay pakə. Mahenziŋ məs addəɗ na ɓay ammba saykum pakə.

⁴ Dəɗiyigin lalamɗe aka zəga nawɗiyit na meleŋge saksakə, dəssoŋgən guɗguɗ pay pak aba Yawe.

Memtekeɗ mipsin Maŋgəlva

⁵ Kəndəgən gəpa; kəbaygən gəpa məpəppəla məktəmən kəlaw kiyən sula, məktəmən taka pak dəsan kilo sləre;

⁶ Kəɗigin gəlan sula aka tabəl na meleŋge saksak aba Yawe, gəlan taka pak gəpa məpəppəla məktəmən sləre;

⁷ Aka gəlan kpewwe taka pak kəɗigən zəga məffok neneke; dəsangən ka zəga naɗɗum akan a gəla peŋ; wasan ka way məhhətən sən Yawe;

⁸ pay naffet pak kawɗitiyi aba Yawe ɗayɗayə, dəsangən wənmiyna an faɗ ezet mə Israyelɗe.

⁹ Dəssoŋ sənəngən Aron dit kirtini; dəzəmnəngən peŋ vanəs a matuya, zəgeɗ salalaŋ ezeti, məgimit səka way mehhətən na Yawe ŋgə; Haran neti yi ka faɗə.»

Əzga' sən ɗəf an dəran Maŋgəlva

¹⁰ Wətət mə Israyelək məs afən mə Eziptə atoŋguk aweleŋgit mə Israyelɗe addak dibirgidiki, armannək ziti, ndən wətət guluk mə Israyelək nakə, gəm ɗəf mə Israyel mbərən;

¹¹ wətət guluk mə Israyelək nak apelik mbərayən aka Maŋgəlva gəm aranəka; yaŋ məkan aba Moyisi. Dawyətən man na Selomit, wətən Divri, zev Dan.

¹² Məgulni a fərsəna kawtaw wən nan va Yawe adawɗi wən nani.

¹³ Ndəni Yawe anah sən Moyis na:

¹⁴ «Məgilgin ɗəf məs dərawəs sə dibirgidiki, ɗiy en dəprəmən pak dəɗiyin vet aka kini, asna əsap net ɗiy pak dəskanəngən dit gərmeŋge.

¹⁵ Kənah sitgin mə Israyelɗe na: An ɗəf aranək Maŋgəlva nani, dəslangən mambray nani;

¹⁶ vaska'a də ɗəf dəpel mbərayən aka iya na Yawe, kawbayni yi: gboŋ net ɗiy pak dəskanəngən dit gərmeŋge; molhõyõ awaniɓa wətdəlva, kawbayni vi apel mbərayən aka iya na Maŋgəlva.

¹⁷ An ɗəf abayək ɗəf bay zamə, va nawa asandi pak kawbayni bay zamə.

¹⁸ An zəga mamayã abayə, dəfaɗgən zəga mamayã madaran a gəlani.

¹⁹ An ɗəf aɗiyək vaŋvi aza həlfəni, kampəli kiya akani.

²⁰ Əŋzla a gəla əŋzla, harani a gəla harani, slayni a gəla slayni; kampəli kiya akan va agəɗ sən ɗəfəŋka.

²¹ Ɗəf dəbay zəga mamayã wafaɗa; ɗəf dəbay ɗəfa kawbayni.

²² Mahenziŋ takay dədassan vi molhõyõ gəm vi wətdəlva; vi intə Yawe Maŋgəlva nokum.»

²³ Vaski Moyis apel sit mə Israyelɗe. Yaŋ kan məgilgin ɗəf məs dəran Maŋgəlva nak sə dibirgidiki, məskan dit girməŋge. Mə Israyelɗe aɗɗanənək an Yawe aɗi wən nan sən Moyisi.