Kolosi 4 - Bible en Guidar

¹ Munokum deyeɗe mərme belemɗe nokum təstəs va an dəslə. Nokum pak məsən na, munokum tat də Daya a disiŋ.

An naɗɗa temtemi

² Məkkam pay pakə, dəndən kədazgaŋ sləma aka əɗɗa soko sən Maŋgəlva.

³ Məkkam ammbamə'e vi Maŋgəlva dəkol səmgəm metive nawpele, kawpel aka wən məɗama na Kristu məs nəsaw məɓruku aka wən nani,

⁴ vi nərbangən va an dəslə nəpelgəni.

⁵ Mədaw də maɗɗula a walaŋgit ɗiy nappaka. Kədawzanən pay ɓa.

⁶ Pay pak əpel nokum dəsan neki, də ətərwəraya. Məsən əzlan sən naway pak va an dəslə.

Əgrakən ( 4:7-18 ) Əsɗa an bayma faɗə

⁷ An dəwəl su pak na, Tikikus məlməm na makrawa, məgəɗ wəza na Daya də gegesiŋ, baynaw naka balam wanah sukum pakə.

⁸ Ndəni kpak nəslən anokum da dənah sukumgən va məsam pakə, kəsənəngən wən namə gəm vi dəsɓangən mokrokum.

⁹ Wal də Onesimus, məlməm na makram an təstəsə, ɗəf nokumi. Warban sukum wən naŋ pakə.

¹⁰ Aristarkus, məs na fərsəna də in asɗokumko gəm Markus məlmən Barnabas. Ndəni məs nəɗi sukum wən nan na, an agapək anokum da na, mətaf lewlewi.

¹¹ Yesu məs adawyaŋ na Yustus asɗokumko, ndəɗaŋgə kaka mə Yudeɗ en dəɗɗaŋ wəza vi məlĩ na Maŋgəlva də ina. Əbbah metiŋginəŋ viwa.

¹² Epafras ɗəf na nokum da asɗokumko, məgəɗ wəza na Yesu Kristu wi. Pay pak tay əgay də əkkaman vikum, vi kəssoŋgən ziw ɓəlɓələ, gərrakə gəm təstəs naɗɗa an Maŋgəlva aŋgələ.

¹³ Wanəsaw miziwe nani, tay əgay diyɗa vikum, viyit ɗiy na Lawdikiya gəm viyit ɗiy na Hiyerapolis.

¹⁴ Luka, zloktor baynam na makram asɗokumko gəm Demas.

¹⁵ Məsɗet milmiŋgiɗəm na Lawdikiya, məsɗan Nimfa dit məzutafaŋ məzəkkalaŋ eŋgil ananda.

¹⁶ Pay məŋɗan ɗereweləŋ anokum da, məɗɗa ka dəŋɗanəngən addəv gəla na Maŋgəlva a Lawdikiya tamə, an dəde sə Lawdikiya tamə, məŋɗan anokum da.

¹⁷ Mənah sən Arkippas na: Azgə sləma aka wəza məs kərah addəv Daya, vi kəknahangəni.

¹⁸ In Pol tə nəver əsɗaŋ də vawa, məɗɗum akawa, aket ngiyamɗe nani! Mbəlembəle na Maŋgəlva dəsan də munokum.