Isaya 65 - Bible en Guidar

Ətawwən an dədazzan

¹ Nəppanək kizu sit ɗiy məs dəttokowən ɓa dəkayawəngəni. Nəppanək kizu sit ɗiy məs dəkayawən ɓa dərəhwəngəni. Nəmna: In yakəŋkə, in yakəŋkə sit ɗiy-ɗar məs ayanən iya naw ɓa.

² Nətələk vaw pay pak kəlazet ɗiy məɓoŋti, məzəzbanən tive məza moggoni ɓa əzban əɗɗum neti.

³ Tahəŋ ədan suwənən gədəvu pay pakə. Tahəŋ əzaɓaŋ-Maŋgəlva addəv guli net wəleŋɗe gəm tahəŋ əzlaŋ tursan aka təki nawzaɓ Maŋgəlva mərkan dit menekeɗe.

⁴ Tahəŋ əssoŋ addivit magamasɗe, tahəŋ əvoŋgoŋ kim addivit bətəŋɗe; tahəŋ əzəmaŋ slu na vedem mawayɗe net aknahaŋgək də zəga nawmə'a.

⁵ Tay enahaŋ na: Aziw ɓa'ə, kədawrəŋgu ɓa, ɓa na wanəkkpaŋgok ka napsukuk sən Maŋgəlva. Zəgeɗis pak tay əsilginin ədagədəv nawa, tahəŋ əssan makraw ɗayɗayə.

⁶ Zəga məverin abawi yi, nəsaw na ɓat ɓa wanəmpəlkiya dəreŋgə, wanəfə̃h an na makraw pakə.

⁷ Nənɗanək heslepe neti gəm heslepe net efiŋgiɗit sapə Yawe anahə, ndəɗaŋ məzuzlaŋ tursan aket mossorgoɗe tahəŋ əmasaŋ akaw aket mossorgoɗe gesiŋ wanəfə̃h an na makraw pakə wanəpsit meŋgesl wəza net dətoŋgu.

⁸ Yaŋ an Yawe anahə: An mərəhi mokkoy na megezlembirke dit iŋkile addivti, kawnahi na: Kədawraygən ɓa, vi əzaɓ tay addəvni! Vaski nədaɗɗa viyit məɗɗaŋ wəza nawa vi nədawraygit pak ɓa.

⁹ Wanəpsən uwa sən Yakob. Mossorgoɗe naw wassoŋ ka na Yuda, dələv wasan sit ɗiy məwelit nawa, məɗɗaŋ wəza naw wassoŋ adaka.

¹⁰ Viyit ɗiy naw məs dəzzoŋ azawa, Saron wakkpaŋ təki nataɗ net gilewi, walaŋ na Akor tamə, gazlaŋ net wasliɗe.

¹¹ Ya mənokum məs kəzganən Yawe, məzgətaŋ ki mossorgo salala nawa məpsənən zəga nawzəm sən zəgakamaŋgəlva dəsan a Gad, məzəknahtən huloŋguk na zəgakamaŋgəlva Meni də zəga nawsa məslahani.

¹² Wanəŋɗokum ka na masalam. Wakəkdukun tokprokum pak vi kawtaw wəlokum. Vi nəyukumko ya kəzlanən ɓa, nəpel sukumko ya kəprəmwən ɓa. Kəɗɗaŋgək mambray ama harawa; an məs kəweleŋgi, zəga məs nəzeli yi!

¹³ Vini Yawe Maŋgəlva anah na: Məɗɗaŋ wəza naw wazəmaŋ yaŋka, nokumu, may wadukum. Məɗɗaŋ wəza naw wasaŋ yaŋka, nokumu, meme wadukuməni. Məɗɗaŋ wəza naw wassoŋ addəv ənnek yaŋka, nokumu, wil wadukum.

¹⁴ Məɗɗaŋ wəza naw wayaŋ gəlya sən ənnek tay a mekreti! Ya nokumu, wakəŋzlaŋ vaŋvəl sən əssa na mokrokum: Wakənɗesaŋgə, kiykum viwwe.

¹⁵ Məweleɗe naw wayanən iya nokum addəv əsway neti, wanahaŋ na: «Kəta Yawe Maŋgəlva dəbayuk va ɗəf ana awaniɓa va na ɗəf anda!» Ya kawyeti məɗɗaŋ wəza naw də iya mbərni.

¹⁶ Ɗəf naka dələv dəŋgəl əzaɓ sən kini, waɗɗa də iya na Maŋgəlva an gesiŋ məs ɗəf adawɗi əɗɗum nan akani. Ɗəf naka dələv dəŋgəl əswaya, wasway də iya na Maŋgəlva an gesiŋ məs ɗəf adawɗi əɗɗum nan akani. Kazgəti ki əzəmsãha an na maddaabəŋ vi waɗam faraɗa səma harawa.

Disiŋ meleketeni, dələv meleketeni

¹⁷ Vi wanəzəməɗ disiŋ meleketeni gəm dələv meleketeni, kaɗɗumeti zəgeɗ məzvet ɓa; kaɗɗumi aket a makra ɗəf ɓa.

¹⁸ Dərəŋ na, mənneki, mərban ənnek nokum pay pakə vi wanəzəməɗ: Yerusalem mərban ənnek nani ɗiy nan wannekeŋ sawɓa.

¹⁹ Ya nərbanək ənnek naw vi Yerusalem, wanənnek də əɗɗum aket ɗiy nawa. Addəvən, kaprəmi geŋgere na əhəm əmpa ɓa, gəm na vaŋvəl ɓa.

²⁰ Karahi wiyən namta səka muzliyan əmpa ɓa, mazza tamə amtə na an dəgal diyɗa ɓa ɓa. Məs dəmtə də əzva səkat na gawla gawla yi, məs dəgapgən əzva səkat ɓa pak wasan məraygəni.

²¹ Warkaŋ gəleɗe, wassoŋ addivti; wampaŋ megezlembirkeɗi, wazəmən uwa neti.

²² Arkaŋ na gəla vi ɗəf mbərən dətoŋgən addəvən ɓa, ampaŋ na megezlembirkeɗ asna ɗəf mbərən dəzəmgən uwa net ɓa. Vi va əzva net wəleŋɗe əzva net ɗiy naw adazzeke, məweleɗe naw wanneken də ərəh na wəza na veti.

²³ Azəmaŋ na sahã ɗar ɓa awaŋ na kirin vi kamtaŋ ɓa. Vi mahəlfa net ɗiy məs Yawe aɗɗa əzaɓ nan aketiŋgə, ndəɗaŋ dit kirtiti.

²⁴ Wanəzlan sit tak ndəɗaŋ əyəwəni; dəggrakən əpel net əmpa ɓa nəprimike.

²⁵ Kəramuyã də wət time wataɗaŋ a təki taka. Ɓoolu də wasliya kevile adawzəmaŋgə. Burɗuk wasan zəga nawzəm na dohõ. Mambray də əza wassoŋ aka mossorgo salala naw ɓa Yawe anahə.