Isaya 52 - Bible en Guidar

Afɗahə Yerusalem

¹ Afɗahə, afɗahə, agul gbogboŋ noko Siyon agul lukut na sləma noko Yerusalem, walaŋgəla-metiŋ salala! Vi gayã may ɗəf mərnokun azzoŋ na anokda əmpa ɓa.

² Attu' ologudum səzoko, asil asok tuŋgu Yerusalem apəl helege suloko is waŋ na Siyon mərməta.

³ Vi vaŋki Yawe anahə: «Məvəlkumi na mekeleŋ; ya kawmõhkumi məza təbəz babar ɓa.»

⁴ Vi an Daya Yawe apel yaŋka: Də ətəŋ nan na, ɗiy naw apirkoŋguk a Eziptə, assoŋguk adaka, əggrak nan na ɗiy na Asiri azimgitin sahã.

⁵ Ya kakaŋ na, Yawe aɗiymani: Miy nədaɗɗa di? Vi agiminik ɗiy naw na mekeleŋ. Mərmaŋ mama azet tahəŋ əŋzlaŋ vaŋvəl na ənneke, Yawe aɗiymani. Pay pak huruɓ əraygən iya nawa.

⁶ Vasna ɗiy naw wasənən iya nawa. Pay nan dəpaska wasənən na intə məs dədawnəh na: «In yakəŋkə!»

Əmilye na Daya a Yerusalem

⁷ Miyə lalaw aket mossorgoɗe gugriɗe va təl mərbə alabara nenek di? Tay əprəman wən na zazaya, tay ərban alabara neneke na moggon məzuki əkõho. Tay ənah sən Siyon na: Maŋgəlva nok tay əzəm məlyã.

⁸ Məgaɗe nok tahəŋ əslan wəleti, sap net tahəŋ əŋzlaŋ vaŋvəl sən ənneke Vi tay ulanən Yawe də heret əmilyen a Siyon.

⁹ Mərga vokum, məŋgəsl vaŋvəl nannek sapə mənokum əray temtem na Yerusalem! Vi Yawe affetenik makret ɗiy nani, amanək Yerusalem.

¹⁰ Yawe arbanək gbogboŋ nan addəv salala nan a maheret ɗiy pak appaka ta'ə. Təki dələv abay man pak wawla əkõh na Maŋgəlva namə.

Məzar sə Babilon

¹¹ Məddoŋgu, məddoŋgu, migil siske! Kədawrəŋgənən zəga mərnokun ɓa. Məgil səddəvən. Məbbur zukum mənokum məsletin zəgeɗ na wəza na Yawe.

¹² Kədagilyoŋ də kakara ɓa, kədaddoŋ dinze ɓa, vi Yawe wadaw abokum, Maŋgəlva na Israyel wasan aɓɓokum.

Gawla na Daya Gəlya məmyã'ən mapoɗo'o

¹³ Awla wahhar ammba gawla nawa. Waɓayə, wasan metiŋgini, kawɗiyni kiyən diyɗa.

¹⁴ Ɗiy diyɗa ageslne'eŋgik aka wən nani, vi haran addəɗka, dəgil va ɗəf ɓa, ərka nan dəlam azan na ɗəf titir ɓa.

¹⁵ Vaska'a ɗiy diyɗa waggətaŋ aka wən nani, milyeŋge wamsanən meti. Vi wawlanən an dulanən ɗah ɓa, waprəmən gabba an dəprəmən ɗah ɓa.