Isaya 34 - Bible en Guidar

Ətawwən aka Edom

¹ Ɗiy naket dəlveŋge məzar aŋka vi kaprəma; vanday məpak sləmokum. Dələv də an dəknah pakə waprəma gəm ənziya egge də an adawa pakə.

² Vi ədagədəv na Yawe tay aket ɗiy naket dəlveŋge pakə, herɗe nan tahəŋ aket məzəlpaŋ net pakə. Aziwginik kawzeti, appetik kawtaw wəleti.

³ Kazgeti ki gəbeyit ɗiy net afuŋ, mogogoy net waffokoŋgu, mbelit wanzoŋ aket mossorgoɗe gugriɗe.

⁴ Zəgeɗ na disiŋ waŋgənaŋ pakə, disiŋ waktəm aka zən va ɗerewel. Ngərzleɗ wayyo'oŋ pak va gaslamba na megezlembirke awaniɓa va sokoyo adayyo'o.

⁵ Vi masalam na Daya asək mbel a disiŋ. Yaŋ tay əbətan aka Edom aka vanday net ɗiy məs nətawwən akan də əziwgin nawzani.

⁶ Mbel tahəŋ yototo aza masalam na Yawe, səlhã tay azan slərkətənəh-slərkətənəh va mbel net kirit timeŋgiɗ dit en net murgoŋge, va səlhã naka kiriɗ dəɓet ndargeyẽɗi. Vi əzaɓ-Maŋgəlva mədan sən Yawe a Bosra, əza metiŋgini aka dələv na Edom.

⁷ Təgənəɗi, medgeɗgeɗe dit wasliɗe wazbəraŋ məstaka dənditi. Mbel wassoŋ aka dələv totoptotopu, səlhã walmis burɗuku.

⁸ Vi pay an Yawe adampəlkiya iyi; əzva nampəlkiya aka wən na Siyon.

⁹ Lolohẽɗ nan wakkpaŋgaŋ ndərɓa, burɗuk nan wakkpaŋ busuku. Dələv nan wakkpaŋ ndərɓa məzuzla,

¹⁰ dəfəɗ də kapay pak amtə na ɓa, enene nan wapeŋgeŋ a disiŋ faɗə. Va sayit ɗiy amə' pak wasan məklakani, ɗəf atoŋ na dəkan ɓa faɗə.

¹¹ Aŋkar-Guzlo gəm tovvo watakəni. Gbuzlu dit gaŋgrekeɗ wassoŋ adaka. Wapak helege nawza akani kawzaɓan kappan təki piɗil dəmani.

¹² Ɗəf səmmbet ɗiy nan tektek tay nawsan adak kawtəl ma aka wən na məlĩ ɓa, deyeɗe nan pak wassoŋ ɓa.

¹³ Geslembeɗ məs degirge azet wagilyoŋ akki gəla na məlyã, addivit gəleɗe gboloŋgboloŋ neti, kevile gəm nzewɗe wassoŋ hizikhiziki. Təki nawɗam net wawayɗe yi, gəm təki na herkeseŋ.

¹⁴ Zəgeɗ nawra walmaŋ dit derzliŋgeɗ adaka, porsokɗe wayanən ziti. Adaki tuyaŋgək Lilit tədakkpih gəlata: watərah təki naffete.

¹⁵ Adaki dohõ adakku vov nani, kawa ɗenzle nani gəm kawvoŋ aket kawɗeslti. Adaki mogdokɗe adakkalaŋgə, mawandi pak də zeŋvini.

¹⁶ Məkolon ɗerewel na Yawe, məŋɗani: təttaka səmmbet tay dədaddak ɓa, tay an dədazga sləma aka zeŋvin ɓa; vi man dəɗi wən nani, əmpəs nan dəsepeti.

¹⁷ Ndən dəɗɗa sit vẽpəlwa van duɗakan sit dələv van də helege. Wasan ka net faɗə, va sayit amə' pak wassoŋ də gəla akani.