Isaya 28 - Bible en Guidar

Wəzga' an dədazzan gəm an miynan naɗɗa ( 28:1—35:10 ) Barkataŋ nawza aka Samari

¹ Əraya! Məs mbazla abay na Efrayim tay əkaɓaŋ də walaŋgəla-metiŋ dəsan mətərkiya, dəzlzlet hã aka walaŋ məs ba'ar gagdak nan aɓətək va uffiyo məɓətən aket məs mbazla abayə.

² Ɗəf gbogboŋ gagdak na Daya yaŋka, tay əvoŋgən zəga pak afuŋ də van va buwən maŋgalaw də ɓeɓrezle, gəm səmyã məraygən təkiya, va buwən maŋgalaw məmet iŋkile hã ənzoŋ lokloku.

³ Kawndapani walaŋgəla-metiŋ mətərkiya na əkaɓ net məs mbazla abayaŋ na Efrayim ammba tilit ɗiyi.

⁴ Əffuyo məɓətən, lalaw na zəga na gawla nani, dəsan aka ki walaŋ məs ba'ar tay va muduvurziyo na sokoyo, mulan tak əɓoh nani, an ɗəf awlaka, waɓuh kakara ammba vani, wazəma.

⁵ Pay dəpaska, Yawe Məzuɓappak wakkpaŋ, mətərkiya na sləma gəm kulpupu na məlĩ lelew sit madambirgit ɗiy nani.

⁶ Wasan ka əmpəs nawtawwən təstəs sit ɗiy en dəssoŋ a təki nawtaw wəna, gəm wasan gbogboŋ sit guromɗe nalpa məzəɓɓehnin məzuzelɗe səma maddamba na walaŋgəla-metiŋgini.

Məs mbazla abay tay əmasaŋ aka məskəleŋ

⁷ Məsdəlveŋge dit məskəleŋɗe pak tay əttapaŋ sən wən na mbazla tay əzaŋ sən əbay na mbazla, mbazla abeyike, tahəŋ gərəŋgərəŋ sən mbazla, tay əzaŋgə, awlanən an dədaɗɗa ɓa awɓapaŋ wətawwən ɓa vi mbazla abeyike.

⁸ Kiyit tabəlɗe pak də əpari aket va pəlwa təki tay dəpəl ɓa.

⁹ Yaŋ ɗiy adawnahaŋ na: «Sən naway ɗəf Isaya van adaŋgla əyagan sən əsən di? Sən naway adaŋgla əprəman hənhən nan di? Sit kirin məvok met səket bide sa? Sit kirin məɓuhit səmet bide sa?

¹⁰ Tay əpel na: Sawlasaw, sawlasaw, kawlakaw, kawlakaw, kawlakaw, kawlakaw, zersam, zersam.»

¹¹ An vaski na, Daya də meslekelɓe, gəm də ma temme adawpel sit ɗiyiŋki!

¹² Ndən məs dənah sit na: Aŋ təki naffeti; məppan ɗəf məyan dəffeti. Aŋ təki nasso kiyuk foŋgoy. Dəŋgəm əprəmən ɓa.

¹³ Əpel na Yawe wakkpaŋ azet Sawlasaw, sawlasaw, kawlakaw, kawlakaw, zersam, zersam. Əgrak nan na, wambataŋ əskot midiŋgbile, waŋzlaŋgə, mazzaɗ warme aɓapaŋ na əkõh ɓa.

Gərəm na bezler

¹⁴ Məprəm an Yawe anahə: mənokum ɗiy məmasaŋ aka ɗəfa, deyeɗe net ɗiy na Yerusalem əŋki,

¹⁵ Vi kənahaŋgək na miynək wənmiyna də əmta, gəm dəndə təki nassa net ɗiy mimtiti. An tatwãh tay ətoŋ na arəhəm na ɓa, vi məɗiyək uwawən ka zəga nawtərmə, tepelke dəɗamamə.

¹⁶ Vini Daya, Yawe anah na: «Nəɗiyək gabba gəla a Siyon addəvən na nəɗiyək gərma, gərəm məwele na bezler məmpan ɓəlɓələ. Ɗəf an dəges azani, zəga tay naɓlan ɓa.»

¹⁷ Wanəɗi an dəslə ka helege, təstəs tam ka zəga nawziwgin ərka. Ya ɓeɓrezle wazan təki nawɗam net tepelke, iŋkile wakanən təki nawsor nokum.

¹⁸ Kawpəlni wənmiyna nokum də əmtaŋka, mokum kəsapaŋ də təki net ɗiy mimtitiŋka wal kokoko ɓa. An əza tay əzzani, waləkatkum, wakəssoŋ nawndap nani.

¹⁹ Pay adawtoŋ pakə, warəmkumu, vi watoŋ va təki addaŋ pakə, kapaya gəm dəfɗa. Əprəmən əpel akan kaka' na, ɗəf kpo'kpo' adawsani!

²⁰ Vi zəga nafna akan wasan duɗukko napparan zə ɗəf akani zəga nazzəɗ aka ɗəf narnar adawsan nawsərət akani.

²¹ Yawe wasili va aka mossorgo metiŋ na Perasim; wakker sit herɗe va a walaŋ na Gabawən, vi kaɗɗa wəza nani, wəza naggət akani. Kaknahan wəza nan məs məsərəki dəndən ɓa!

²² Ya kakaŋ na, məppan gabba əmas nokum aka ɗəfa, vas ɓa na helege an diynokum waŋgərəɗə. Vi nəprəmək na, Daya, Yawe Məzuɓappak, aynanək wən nan nawzan dələv pakə.

Maɗɗula na məzinse səza Maŋgəlva ade

²³ Məpak sləmokum, məprəm əpel nawa, məzlgə sləma məprem an nədawnaha:

²⁴ Pay pak məzinse adanse, adazlga, adawmbokon guli nan adawziyan sa?

²⁵ Nam na, an aziyanək gulyo, ndən əgəm mehẽyĩt teɓ kawndolti; ndən kazlga haykəmari pepreŋ aka təki an dəslə kawdor haykəmari aka meŋge.

²⁶ Aski tive an Maŋgəlva nan aɗi gəm ayagan sən ka dəzbangəni.

²⁷ Arganən teɓ də tandaŋ ɓa; aŋgriwnin kirtin meslene də wət buwən ɓa. Dət zlaŋki adattusun mehẽyĩt teɓi.

²⁸ Kargani haykəmari pepereŋ hã kpaŋ gəpa sa? Owwo kargani hã gbas ɓa. Teletele adarganəni məza ndən əbasl ɓa.

²⁹ As van səza Yawe Məzuɓappak ade, əzga nan naggət akani pepet nan metiŋgini.