Isaya 27 - Bible en Guidar

Əska wəla aka zəga darawən na pehe

¹ Pay dəpaska, Yawe wasil akan də əptu masalam nan məs man hoɓhoɓ ɓəɓəl metiŋgini, vi kaskot aka heŋzle, dohõ məzənzani, aka heŋzle, dohõ məs pepete; wabay dohõtuya na pehe.

Daya də guli net megezlembirkeɗ nani

² Pay dəpaska, məyəgəlya sən guli net megezlembirke nenekɗe.

³ In Yawe tə, məga nani. In tat əzi sən iŋkile də pay nani, dəfəɗ də kapaya, in tat əgan vi kawtak ɗəf dawraygəni.

⁴ Nəppanək ədagədəv akani, ya an nərahək degirge dit tintifɗe addəv əgay na! Wanədaw aketi, wanəzle sapə.

⁵ An ɗəf appanək zən əɗam azawa wakay əsler də iyna, wasler də iyna!

Əvvuyon mambray na Israyel

⁶ Abe na, ɗiy na Yakob wanzaganən slalwayti, Israyel wandəfə, waffuyu, kirtin wassoŋ aka dələv təslə.

⁷ Argek ɗiy nan va arge ɗiy en dərgenin sa? Awaniɓa, abeyik va abey ɗiy en dəbeynin sa?

⁸ Atawək wən aket də əɓɓihti, də əgilgiti. Aɓɓehik də səmyã nan kituw-kituw pay səmyã nammba pay nampum adaɓla.

⁹ Vi vaski mambray na Yakob arah əvvuyo, pay məvvuyon sən mambray nani: kawpuhti gərmeŋɗe na matuya pak va gərmeŋɗe na ɗama, kakrapni Astera gəm təki nawzla tursan.

¹⁰ Vi walaŋgəla-metiŋ gbogboŋ wasan də mani, va təki nawtaɗ məppan firik va Kapta-muyã. Kirtit wasliɗe wataɗaŋ adaka, wadikeŋ adaka wazəmən vet geslemɓeɗi.

¹¹ An kivet wəleŋɗe aŋkəlaŋka, kaŋzluti, gil wandenin kasɗa offo. Vi maɗɗula tay aket ɗiy vet ɓa. Ndəni məs dəɗɗe dəwəl sãhã aket ɓa, məs dəzəmiɗ tay də mbəlembəle aket ɓa.

Əmilye net gədak səka balamə

¹² Pay dəpaska, Yawe warga hay nani, təŋ sə ma məlpa metiŋ hã gap a lolohõ na Eziptə. Ya waŋgbukum takataka, mənokum, mə Israyelɗe.

¹³ Pay dəpaska, kaffoni gozloro metiŋgini. Asna ɗiy en dəzaŋ aka dələv na Asiri gəm ɗiy en dətrayaŋ aka dələv na Eziptə wamilyoŋgu. Wappu'oŋ aba Yawe a Yerusalem, aka mossorgo metiŋ salala.