Isaya 20 - Bible en Guidar

Kəleŋ narban na məskani wəla Eziptə

¹ Aka əzva məs daya net məzəlpaŋ məs Sargon məlĩ na Asiri aslən agap a Asdod, arəmək makra də Asdod amõhuko.

² Aka pay nani, Daya apelik də ma Isaya wətən Amos amna: «Dok apəl gabaga na gəlabay məs kiynə addakko gəm aggbuk hensek naka təlko.» Anani Isaya agəɗə; tay əbbal məza lukut ɓa məza hensek ɓa.

³ Daya amna: «Awla gawla naw Isaya adawək əzva hoku məza lukut ɓa, məza hensek ɓa. Zəga narbay yi gəm kəleŋ aka an dəwəl sən Eziptə gəm Etiyopi.

⁴ Vaski məlĩ na Asiri adawke məfərsəneɗ sə Eziptə, gəm ɗiy en adawsimgit sə Etiyopi, gewleɗ dit mezzeɗ zit mekeleŋ, tilit mekeleŋ. Gebbet mekeleŋ, ərba wili vi Eziptə!

⁵ Ɗiy məs dəɗiyən əɗɗum net aka Etiyopi gəm aka Eziptə gagdak neti, geslne dit wil warme!»

⁶ Pay dəpaska, ɗiy en dəssoŋ a ma məlpa dəŋ wanahaŋ na: «Vaŋki əɗɗum nawga zəga namə! Azam na məɗamək sədaka vi kawkay ɗəf nawkõhgəm səba məlĩ na Asiri. Mbarmbar mədawkõh kandi?»