Isaya 13 - Bible en Guidar

Əzga' sit ɗiy-ɗarə ( 13:1—23:18 ) Əgrak na Babilon

¹ Wən məpel aka Babilon, an Isaya, wət Amos awələ:

² Aka mossorgo metiŋ pəh-pəh, məmpa gabaga na dəlva məslan wəlokum məye, məhevet də vokum vi dəzzoŋgən amaddambet ɗiy tekteki.

³ In vattə nəɗi wən nan sit ɗiy en duwelin kiyit suwa, gəm nəye gammbereɗ naw məzəlpaŋ vi karban ədagədəv nawa, məzənnekeŋ sən gagdak nawa.

⁴ Məprəm geŋgere aket mossorgoɗe gugriɗe: va kəɓəs na wəlet ɗiy diyɗa. Məprəm wəhay na məlyã, net dilveŋge dəkkalaŋgə. Daya Məzuɓappak tay əsəŋgləket məzəlpaŋ naddoŋ ama əgaya.

⁵ Tay əzzoŋ səka dələv faraɗa, səkki dələv abaymani, Daya yi dit məzəlpaŋ naknahanən ədagədəv nani, vi kawzan dələv pakə.

⁶ Məɓuh mokum, vi pay na Yawe go'oy yi, tay əzzan va əza metiŋgin an səza Maŋgəlva Məzuɓappakə.

⁷ Vini va ɗəf pak waddakə, mekret ɗiy pak wamtə.

⁸ Arayaŋka, tatwãh də kutur kəra armeke, tahəŋ ɓalwayɓalway va guluk dawɓay uwa. Naway pak əkkpaŋ ula kəlaza ɗəf mbərən heret pəreŋ sən geslne.

⁹ Awla, pay na Daya tay əzzani, pay mbərayən, də gagay gəm ədagədəv məza ulasahã ɓa adawsani. Wazan dələv mbo'u, wazet məs mambrayɗe.

¹⁰ Vi ŋgərzleɗ na disiŋ dit duŋgusɗe awiɗeŋ na ɓa. Paya, an agilke, guzli wasərəta, təla akasak na ɓa.

¹¹ Wanəzga' sən ənziya egge aka mambray nani, aka mambray net məsdarawɗe. Wanəziwgin əɓaygən kiya net məzuzelenən ɗəfa wanəmtan ənnek net məsdarawɗe.

¹² Wanəkkpaŋgan ərəh na zev ɗəf tuwãh day ki meleŋge saksak, tuwãh day ki meleŋge na Ofir.

¹³ Vi vaski, wanəzlzlaɓan disiŋ, dələv wakker sə gəlani, sən gagay na Daya Məzuɓappak, pay na ədagədəv nani.

¹⁴ Wasan va mune məs adaɓɓahaŋgə awaniɓa timeŋgiɗ məza məzutaɗa ammbet ɓa: naway pak wakkpaŋ azet ɗiy nani, naway pak wanzan aka dələv nani.

¹⁵ Ɗəf an mərəhən pak kawmbokni, ya ɗəf an mərman pak waskot ama masalam.

¹⁶ Kawpiweti kirtit a ma hereti, kawsləpatni zəga səŋgil anetda, kawvoŋgiti gil net na gagayə.

¹⁷ Wanəsilgit mə Mediɗ aketi, məs asimin təbəz babar ɓa annekeŋ də meleŋge ɓeŋki, Yawe anahə.

¹⁸ Tay əŋgroɓnin gewleɗ dit herɗe; awlaŋ sãhã aka uwa na ɗəf titir ɓa, awlaŋ sasãhit kirin ɓa.

¹⁹ Babilon, dələv məzaɓan moggon lalaw day məs mə kaldiyeɗ adawɓaygənən kiyzit dəndənəŋ Maŋgəlva waslaŋgan va Sodom də Gomorra.

²⁰ Ka faɗi ɗəf asan na adak də gəla ɓa, səza sayit ɗiy hã aza sayit en mbərti wasan məza ɗəf addəvən ɓa. Arabɗe ampanən na gizlirke net adak ɓa, məzuteɗeŋɗe adikeŋ na adak ɓa.

²¹ Movoɗe nawra wafnaŋ adaka, gəlaɗe net waknahaŋ dit harawa haraweɗi. Wasan kpiftil hosgolok hosgoloku, herkeseŋɗe wassoŋ adaka, tuyeŋge wapepɗekeŋ adaka.

²² Derzliŋgeɗ wahəmaŋ addivit gəleɗe nani gəm wawayɗe addivit gəleɗe mogget na məlyã. Pay nazza nan gu'o yi, əvoŋ nan azzek na ɓa.