Hənhən 20 - Bible en Guidar

Wəzva gabal

¹ Yaŋ nula maslay dawpriken sə disiŋ, lekile nakol ma delŋgeɗek tay avani gəm ngiyamɗe.

² Armak zəga darawən, dohõ an məgalən, va wənah na Ibilisa awaniɓa Satan, aynanək dəgəɗgən wəzva gabalə.

³ Maslay nak azganək addəv delŋgeɗek naka, ampanək mani gəm asləratək lamba azani, vi adawmbəɗet ɗah ɗiy əmpa ɓa, hã an wəzva gabal atoŋko. Dərɓaga as əmpa na kappani pay siɗikke.

⁴ Yaŋ nula mezeŋgeɗ na məlyã, ɗiy məs dəssoŋ aket arəhaŋgək gbogboŋ nawtawwəna. Nulak zeŋgilet ɗiy məs məbeyit vi adawpelin wən na Yesu gəm əpel na Maŋgəlva gəm ɗiy məs dəgagdakanən zəga mamayã ɓa mãy zeŋgilen ɓa, dətafən voɗoko nan a mirbizit ɓa, awaniɓa aza vet ɓa. Assoŋguk mederet də Kristu, tahəŋ wəzəmaŋ məlĩ dəndən gap wəzva gabalə.

⁵ Ɗiy mimtit meɓɓet dəmsap əssoŋ mederet tak wəzva gabal nak dəknahaŋ ɓa ɓa. Ndəni wəsilye səka əmta an daabəŋ.

⁶ Əzaɓi gəm zazayi azet ɗiy məs dədawsilyoŋ səka əmta an daabəŋ. Əmta masula'ən tay də gagdak aket ɓa, wassoŋ məsdəlveŋge na Maŋgəlva gəm na Kristu, wazəmaŋ məlĩ də Kristu wəzva gabalə.

Məzani Satan

⁷ An wəzva gabal atoŋko, kappani Satan sə fərsəna.

⁸ Wambat əmbəɗet ɗiy səka tapaslay pay poɗo na dəlvafuŋ pakə, va wənah na: Gog də Magog. Satan wakkeleti kawgaya, wassoŋ diyɗa va hoyoŋko a məlpa.

⁹ Watrayaŋ aka dələv pakə, wakaraŋ ki dibirgidik net ɗiy salala gəm ki walaŋgəla-metiŋ net ɗiy na Maŋgəlva. Ya offo waprik sə disiŋ wazet pakə.

¹⁰ Asna kazgani Satan məs dəmbəɗet nak addəv vov na offo gəm na busuku, a təki məzgan zəga mamayã də məskəleŋ məwə tepelke naka, wazəmaŋ sãhã adak kapay də dəfəɗ pak ha faɗə.

Ətaw wən an bayma faɗə ( 20:11-15 ) Ətawwən an madədirɓe faɗə

¹¹ Yaŋ nula mazaŋga babar na məlyã də ɗəf məs dəsan akani. Dəlvafuŋ də disiŋ tahəŋ wənzoŋ sənəni, kawleti ɗah əmpa ɓa.

¹² Yaŋ Nule ɗiy mimtit pakə, ɗiy gugriɗ dit muzliyeɗ pakə, tahəŋ ziwziw aba mazaŋga na məlyã. Məkolti ɗerewelɗe, yaŋ məkol ɗerewel maɓɓani, ndəni ɗerewel na zeŋgile. Ɗiy mimtit pak mətawi wən aket va aza wəza net aɗɗaŋ məverin addəvit ɗerewelɗe.

¹³ Yaŋ məlpa metiŋ agilgit ɗiy məs naddəvən. Wəmta də təki nassa net ɗiy mimtit pakə, agilgitinik ɗiy neti. Ndəɗaŋ pak mətawi wən aket va aza wəza net məs aɗɗaŋ.

¹⁴ Yas kan məzget mãy əmta də təki nassa net ɗiy mimtit pak addəv vov na offo. Vov na offo nan ndəni wəmta masula'ən.

¹⁵ Ɗəf awandi məs iya nan tay meverin addəv ɗerewel na zeŋgile ɓa pak, kazgani addəv vov na offo.