Hənhən 19 - Bible en Guidar

Vanday net ɗiy diyɗa tay əgagdakan Maŋgəlva

¹ Dərɓaga aska yaŋ nəprəm wəpel va wəlet ɗiy diyɗa a disiŋ, dawnahaŋ na: Məgəɗ soko sən Maŋgəlva! Wəkõho, gagdaka gəm əɓap pak na Maŋgəlva nami.

² Vi ətawwən nan aknahək də gegesiŋ gəm də təstəsə. Atawwən akat bərviyak matəŋgət nak məzuraygən dəlvafuŋ pak də əkuh a gizbe nanta, ampələk kiyit mbel net məɗɗaŋ wəza nan akata.

³ Anahaŋgək əmpa na: Məgagdakan Maŋgəlva, enene na wəzla walaŋgəla-metiŋ nak tahəŋ serweɗserweɗ hã faɗə!

⁴ Ɗiy məsɓet kaklaw sula kiyit poɗo dit zəgeɗ memeyẽɗ poɗo nek appu'oŋko, agagdakanənək Maŋgəlva məs dəsan aka mazaŋga na məlyã, yaŋ adawnahaŋ: Amin! Məgagdakan Maŋgəlva!

Əɓel na Ndargayã

⁵ Ndəni wəla ɗəf ade hã səka mazaŋga na məlyã, yaŋ adawnah na: Məgagdakan Maŋgəlva namə, mənokum məɗɗaŋ wəza nan pakə, mənokum məzugeslne'eŋ sənəni, ɗiy gugriɗ dit memeɗeŋɗe pakə.

⁶ Yaŋ nəprəm gugoyo diyɗa va ɓaɓəlma əpel net ɗiy diyɗa, va ɓaɓəlma məlpa gəm va wəhãy na buna. Tay ənahaŋ na: Məgagdakan Maŋgəlva! Vi Daya Maŋgəlva nam məlĩ an daykiyit məlyeŋge pak arbanək əzəm məlĩ nani.

⁷ Mənneken səm zəmə, məbabyak səmə, məgagdakan səmə, vi pay nawɓel nat Ndargayãk agapka. Mədaha nawɓel nan təzaɓanək zəta.

⁸ Məgul səni lukut na ngərayã məzuwiɗ kukuɗo. Vi lukut na ngərayã van wəzaɗe mogget net ɗiy na Maŋgəlva əŋgə.

⁹ Yaŋ maslay anah suwa: Aver na! Əzaɓi azet ɗiy məs məyet aka way na wəzləra nawɓel nat Ndargayãkə! Yaŋ anah əmpa na: Ndəni əpel na Maŋgəlva an də gegesiŋ.

¹⁰ Yaŋ nəkduk ammba tələn kawgagdakani, yaŋ anah su na: Kəɗɗa vas ɓa! Naw pak məgəɗ wəza nan va noko gəm va milmiŋgiɗim məs dərmanən əpel na Yesu. Maŋgəlva yi kədawgagdakani, vi gegesiŋ məs Yesu arbani ndəni əmpəs dəgəɗ kəleŋgə.

Məŋkor pələs aka pələs babara

¹¹ Yaŋ nula disiŋ kollo, pələs babar tay adak ziwwe, ɗəf nakan dawyanən na ɗəf təstəs gəm gesiŋ. Tay ətawwən gəm əlpa va an dəslə.

¹² Haran agilik va hərzləm offo nzilimnzilimi, kulpupɗe na məlĩ diyɗa tahəŋ aka kiyni, iya tay məverin akani, ndən kaka'ə dəsəna.

¹³ Aguluk lukut metiŋ də mbel azan preŋgi. Ndəni adawyaŋ na əpel na Maŋgəlva.

¹⁴ Məzəlpaŋ na disiŋ tay əzbanəni, apeŋgeŋgək aket pilseŋge babarɗe, aguloŋguk lukutɗe babarɗe na ngərayã kukuɗo.

¹⁵ Masalam məs man hoɓhoɓ tay əgilyen sə man kawzet ɗiy-ɗarə. Wazəm məlĩ aket də zleŋge na təbəza, waɗot uwa net wəleŋɗe na mbazla a təki nawɗotti, ndəni wədagədəv na Maŋgəlva məs dəsan məlĩ aka zəga pakə.

¹⁶ Aka lukut nani gəm aka metetileni iya tay məverin na: Məlĩ net məlyeŋge Daya net deyeɗe.

¹⁷ Yaŋ nula maslay ziwwe addəv paya. Aŋgəsl vaŋvəl dayadaya sit biŋgeɗ məzuveŋgeŋ a disiŋ pak na: Mide məkkal aka waynabaya na Maŋgəlva,

¹⁸ vi kawzəm sluwit məlyeŋge, sluwit ɗiy gugriɗe, sluwit ɗiy gagdakɗe, sluwit pilseŋge gəm sluwit ɗiy məpeŋgeŋ aket pilseŋge, sluwit ɗiy pakə, net ɗiy na kiyti gəm net belemɗe, net kirni gəm net ɗiy gugriɗe.

¹⁹ Yaŋ nula zəga mamayã naka dit məlyeŋge naka dəlvafuŋ dit məzəlpaŋ net məkkelit vi kalpa də ɗəf məs dəpeŋ aka pələs nak dit məzəlpaŋ nani.

²⁰ Mərmani zəga mamayã nak a fərsəna, gəm məskəleŋ məwə tepelke məgəɗ sekeneɗ aban məs dəmbəɗet ɗiy dətafən voɗoko na zəga mamayã naka gəm agagdakanən zeŋgileni. Zəga mamayã də məskəleŋ məwə tepelke nek pak məzgeti mederet addəv vov na offo muhurən.

²¹ Masalam məs dədawgilyen səma ɗəf məs dəpeŋ aka pələs nak abeyik məzəlpaŋ net pakə. Biŋgeɗ pak abaŋgək də sluwit sawɓa.