Hənhən 18 - Bible en Guidar

Məzani Babilon

¹ Yaŋ nəwəl maslay maɓɓan əmpa dawpirken sə disiŋ. Tay də gagdak diyɗa, gagdak nan akekeɓe'ək dəlvafuŋ pakə.

² Aŋgəslək vaŋvəl dayadaya na: Aɓəslka, aɓəslka, Babilon walaŋgəla-metiŋ naka. Akkpaŋgək təki nassa net tuyeŋɗe, təki nassa net əmpəsɗe mbəreyti, təki nassa net biŋgeɗ mbəreyit dit en nawmə' pakə.

³ Vi walaŋgəla-metiŋ nan apsitik mbazla net herɗe na əkuh a gizbe nan sit ɗiy pakə: məlyeŋge naka dəlvafuŋ akuhwaŋgək a gizbe dəndəni, məmanən vet naka dəlvafuŋ aɗɗaŋgək arya də gagadak na ərəh nan diyɗaŋka.

⁴ Yaŋ nəprəm wəla ɗəf maɓɓan sə disiŋ, yaŋ adawnah na: Məgil səddəv walaŋgəla-metiŋgiska, munokum ɗiy nawa, vi kədawsapaŋ addivit mambrayɗe nan ɓa. Vi konoy nan adawrəhkum ɓa.

⁵ Vi mambrayɗe nan akkalaŋgə kpew hã agapaŋgək a disiŋ, Maŋgəlva aɗɗumetik mambrayɗe nani.

⁶ Məgəɗ sən walaŋgəla nan va agəɗ sukum tamə, məmndan sən an agəɗ sukum haran sula. Addəvət həloŋguk məs aslahan mbazla nani, məslahan sən təl sula addəvta.

⁷ Va adattəman nek addəv gagdak nan gəm addəv ərəh nan diyɗaŋka, məwan əzəmsahã nan də wəska morkoyo nan gbaska, vi tay ənah a makran na: Aka mazaŋga na məlĩ nan va ma'aykə, gagəbay nan kpak ɓa, əmta arəhu na ɗah ɓa.

⁸ Vi vaski tatwãhɗe məzuganən wazzoŋ akan aka ma taka, əmta, gəlabaya, mãya, offo wazəma, vi Daya Maŋgəlva dətawwən akan afən gagdaki.

⁹ Məlyeŋge naka dəlvafuŋ dəkuhwaŋ a gizbe dəndən gəm dəsapaŋ addəv ərəh nan diyɗaŋ pak wahəmaŋ an awlanənək enene na offo dərəm akani.

¹⁰ Waziweŋ faraɗa sən geslne na əzəmsãhã nani, wanəhaŋ na: Əraya! Əraya! Aw walaŋgəla-metiŋgini, Babilon walaŋgəla-metiŋ də gagdaka, addəv ler taka mətawwən akoko.

¹¹ Məmanən vet naka dəlvafuŋ wahəmaŋ, wa'ugənəni, vi ɗəf tay nalbeh zəgeɗ net əmpa ɓa.

¹² Meleŋge, təbəz net deleɗi, gərmeŋge na sləma, averzleɗ na sləma, ngərayã dit lukutɗe pepreŋɗe, gabagaɗe na gaɗmay net tentiwilgeɗi gəm gabagaɗe məzuwiɗeŋgi, dit wəleŋɗe məzaɓet temtemi, dit zəgeɗ na gozlobekne gəm wəleŋɗe na sləma də təbəz pepreŋge, gəm təbəz titire awaniɓa ɗama.

¹³ Gəm honogo gəm sitaɗe nenekɗe, mẽl nappaya, tursan na mirra gəm tursan na gaŋgəlya, mbazla net wəleŋɗe gəm mẽlẽ, gəpa kukuɗo gəm haykəmari, wasliɗe gəm timeŋgiɗi, pilseŋge gəm mawteɗ net pilseŋge, belemɗe gəm ɗiy mərmeti.

¹⁴ Zəgeɗ nok mogget məs kəŋgəl nawrəh nek pak faraɗan də isi. Arya noko dit zəgeɗ na gagdak nok pak azaŋgək sə ma horok pakə, kulene ɗah əmpa ɓa.

¹⁵ Məɗɗaŋ terere məs akkpaŋget məsaryeɗ də əɗɗa terere waziweŋ faraɗa, vi geslne na əzəmsãhã nani. Wahəmaŋ, wanzlaŋ vaŋvəla,

¹⁶ wanahaŋ na: Əraya! Əraya! Walaŋgəla-metiŋ də lukut na ngərayã azan naka, də lukut pepreŋ gəm lukut məzuwiɗ naka. Azaɓanək zən də meleŋge gəm gərmeŋge na sləma dit averzleɗi.

¹⁷ Addəv ler taka kaka'ə aryeɗ nok pak azaŋka. Migilit bəlayɗe, məzəddoŋ təki dənɗaŋ dit məzəŋkorotini ndəɗaŋ pak arəhaŋ na ərəh net də malaka aket iŋkile a pehe əmpa ɓa, waziweŋ faraɗa,

¹⁸ anzlaŋgək vaŋvəla, adan awlenin enene məs dədagilyoŋ sə təki məs walaŋgəla adawzlaŋka. Aɓɗaŋ na: Walaŋgəla-metiŋ maɓɓan awani nawsla dəndən di?

¹⁹ Andoloŋguk hologudum aketi əŋzlaŋ vaŋvəl əhəmaŋgə gəm əska morkoyo ənahaŋ na: Əraya! Əraya! Walaŋgəla-metiŋ məs arya nan gədak dəkkpeŋget məŋkoroŋ bəlayɗe aket iŋkile pak məsaryeɗi. Ler taka kaka'ə zəgeɗ naddəvən pak azaŋka.

²⁰ Disiŋ annek də əray na walaŋgəla-metiŋ nani. Munokum'e ɗiy na Maŋgəlva, maslənɗe gəm məskəleŋɗe vi Maŋgəlva akək wən ammbokum də ətawwən aka walaŋgəla-metiŋ vani.

²¹ Yaŋ maslay gagdak agəm gərəm metiŋgin va buwən nawsəra, azgan a pehe dawnəh na: Babilon walaŋgəla-metiŋgin kasgoki vaska, kawluki ɗah əmpa ɓa.

²² Ɓaɓilmet məzubayaŋ gazamvəl dit məyaŋgəlya dit məffoŋ mohoŋɗe dit muffoŋ pozloro gəm gozloro kaprəmiti ɗah anokda ɓa. Karəhi ɗəf məzaɓ-zəga ɓa, zəga məzaɓən anokda ɓa. Kaprəmi ɗah ɓaɓəlmet məzusəraŋ a walaŋgəla nok ɓa.

²³ Əkeɗeɗe na lalam akasak na anokda ɓa. Kaprəmi ɗah gugoyo net məgəmaŋ gili dit məgəmaŋ zel a walaŋgəla nok ɓa vi məɗɗaŋ terere diyɗaŋ anokda daykiyit məɗɗaŋ terere naka dəlvafuŋ pakə, vi sekene nok nawa tepelke, aluɓinik ɗiy naka dələv pakə,

²⁴ gəm mərəhti mbel net məskəleŋɗe, ɗiy na Maŋgəlva gəm ɗiy en mətaw wəlet məziyit anokda aka dəlvafuŋ.