Hənhən 17 - Bible en Guidar

Əza na Babilon gəm əska wəla aket zəgeɗ memeyẽɗi, məskəleŋɗe muwaŋ wəna gəm Satan ( 17:1—20:10 ) Bərviyak matəŋgəta

¹ Yaŋ taka səret maslay buhul dit hiliŋgiɗ buhul avet nek ade azawa, apel su vaŋka: Ade, wanərban suk va mətawwən akat bərviyak matəŋgəta, ana walaŋgəla-metiŋgin mərkan aket peheɗi.

² Məlyeŋge naka dələv aɗɗaŋgək polkoyo də zit dənta, ɗiy na ka dəlvafuŋ atemeŋgək də mbazla na ɗarɗar nata.

³ Ndəni aku a kapta-muyã addəv əmpəsa. Yaŋ nəwəl guluk ɗewwe aka zəga mamayã pepreŋge, zən pak əpel na əran Maŋgəlva, kiyən buhul gəm mohon kəlawə.

⁴ Lukut pepreŋ witwit azat guluk vat kulo'o, gəm təbay gawla dit zəgeɗ məziwiɗeŋ va meleŋge, dit gərmeŋɗe na sləma gəm də everzle məbaya. Huloŋguk na meleŋge məknahət də mbərayən tat avat kawwa: ana haramba na əkuh a gizbe nata.

⁵ A mirbizta, iya na wən məɗama tay məverin: Babilon metiŋgini, met bərviyeɗi dit məɗɗaŋ ɗarɗar naka dəlvafuŋgu.

⁶ Nulətək guluk nak titemik dit mbel net ɗiy na Maŋgəlva, gəm dit mbel net ɗiy məpelin wən na Yesu. Adan nula, nəggətək sawɓa.

⁷ Ndəni maslay nak anah su na: Vimi kədaggət di? Wanərban suk wən məɗama nat gulukkəŋkə, də wən na zəga mamayã məs kiyən buhul gəm mohon kəlaw təpeŋ akanəŋka.

⁸ Zəga mamayã məs kədawlaŋka, tay lahəŋka, ya kakaŋ na tay ɓa. Wagil sə delŋgeɗeki kaddan əza. Ɗiy naka dəlvafuŋ məs iya net tay məverin addəv ɗerewel na zeŋgile təŋ əɗi na gabba dələv ɓa, waggətaŋgə an awlanənək zəga mamayã naka, vi tay lahəŋka ya tay kakaŋ ɓa, ya wamil əmpa'a.

⁹ Pay nawrəh əsən gəm maɗɗula yi. Kiyən buhuləŋka, ndəni mosorgeɗe buhul a təki guluk təsat tuŋgo. Ndəɗaŋgəŋ məlyeŋge buhule'e,

¹⁰ sle səmmbet abəraŋka, an masləre'it tay əzəm məlyã, an mabuhulet tamə dəɓəl əzzan ɓa. Ya an adeke, pay siɗikke adanziyan aka məlyã.

¹¹ Zəga mamayã məs lahəŋ gəm tay əmpa ɓa naka, ndəni məlĩ madodopoɗeti, tay aret en buhul neki gəm tay əmbat əza.

¹² Mohon kəlaw məs kəwəl naka, ndəɗaŋgəŋ məlyeŋge kəlaw məs dətəŋgən əzəm məlĩ net tagay ɓa, ya zəga na ler taka kaka adawzəmaŋ məlĩ sap də zəga mamayã naka.

¹³ Beymet pak əɗɗum net takay, əsapan əɓap net gəm gagadak net ammba əgəɗ sən wəza sən zəga mamayã naka.

¹⁴ Walpaŋ dət Ndargayãkə, Ndargayãk watəska wəleti. Vi ndəttə Daya aket deyeɗe, gəm Məlĩ aket məlyeŋge, dəndəta, ɗiy nat məs məyeti, məwelti dəɗiyən kiyit akat waskaŋ wəla'e.

¹⁵ Maslay nak anah su əmpa na: Iŋkile məs kəwəl neki adak guluk məkuh a gizbe nak təsata, ndəɗaŋgəŋ ɗiyi, vanday net ɗiyi, ɗiy naka dələv temtem gəm ma temtemi.

¹⁶ Moho kəlaw məs kuwəl neki gəm zəga mamayã nak pak wazeltən guluk məkuh a gizbe nakə. Wandanən zəga nat pakə, wappatən zət mekeleŋ, wazəmən slu zəta, wazlətən də offo.

¹⁷ Vi Maŋgəlvayi dəpsit əɗɗum nan a mekreti vi dəɗɗanəngən əŋgla nani, dəɗɗanəngən də maɗɗulet taka: əɗi əzəm məlĩ net ammba əgəɗ sən wəza sən zəga mamayã nak hã gap əpel na Maŋgəlva dəknahgəni.

¹⁸ Guluk məs kəwəl kəŋkə, ndətə walaŋgəla-metiŋ dəsan məlĩ aket məlyeŋge naka dəlvafuŋ paki.