Hənhən 14 - Bible en Guidar

Ula temtemi ( 14:1—15:8 ) Gəlya net ɗiy məs məmeti

¹ Ya nəwəl na: Ndargayãk tat ziwwe aka mossorgo metiŋ na Siyon dit ɗiy gabal səkat də kaklaw poɗo kiyən poɗo dəndə iya nat azeti gəm iya na Afət məverin a mirbizti.

² Yaŋ nəprəm wəla ɗəf sə disiŋ va ɓaɓəlmet peheɗi, va əhãy na buwən gədakə, wəla ɗəf nəprəm van tay va ɓaɓəlma gəlya net məbayaŋ gəzləŋtəndəŋ dawbeyti.

³ Tahəŋ wəyaŋ gəlya meleketen aba mazaŋga na məlyã, gəm abet zəgeɗ memeyẽɗ poɗo də abet ɗiy məsɓeti. Ɗəf tay nawɓap əyagan gəlya van abbirit ɗiy gabal səkat də kaklaw poɗo kiyit poɗo məs məmet səka dəlvafuŋ nak ɓa.

⁴ Net dərnokonən zit dit gil ɓa, vi tahəŋ gbuɓɓo. Tahəŋ əzbat ndargayãk a təki təmbat pakə. Net məkõhgiti səret ɗiyi vi kepsin Maŋgəlva gəm sət ndargayãk va zəga dəsəɓ maddaabəŋ.

⁵ Ɗiy net kawrəhi tepelke amet ɓa, mbərayən tay azet ɓa.

Maslayɗe hoku

⁶ Yaŋ nula maslay maɓɓan dawveŋ a disiŋ faraɗa, tay də alabara nenek an faɗ na Maŋgəlva avani vi kawtəl ma akan sit ɗiy naka dəlvafuŋ pakə: sit ɗiy-ɗar pakə, sən mahəlfa pakə, sən ma awandi pakə gəm sit ɗiy pakə.

⁷ Tay ənah dayadaya na: Məgeslne'sən Maŋgəlva, məgakdakani, vi pay nan nawtaw wən aket ɗiy agapka. Məgagdakan məs dəzəməɗ disiŋ də dəlvafuŋ də pehe dit iŋkile miyma.

⁸ Maslay maɓɓan masula'ən azbanəka yaŋ amna: Aɓəslka, aɓəslka, Babilon walaŋgəla-metiŋgini. Ndən məs dəbet ɗiy pak də əpsit mbazla net herɗe gəm na polkoyo nani.

⁹ Maslay maɓɓan mohoko'it azbanka yaŋ anah dayadaya na: An ɗəf tay əgagdakan zəga mamayã gəm zeŋgileni, an atafək voɗoko məs adaɗɗa sən ɗəf a mirbizin awaniɓa aza van dəzəŋ,

¹⁰ nan pak wasə mbazla na ədagədəv na Maŋgəlva, məs məslahani ɓa, məmbaɗən addəvət huloŋguk na ədagədəva, wazəm sãhã addəv offo gəm addəv busuk abet maslayɗe en salala də abat Ndargayãk na Maŋgəlva.

¹¹ Enene na offo məzuzəmgit sãhã waslaŋ hã a disiŋ hã faɗə. Ɗiy məs dəgagdakanən zəga mamayã də zeŋgileni gəm ɗiy məs dətafən voɗoko na iya nan neki, kapaya də dəfəɗ pak arahaŋ na wəffet ɓa.

¹² Pay na əsok zə ɗəfi azet ɗiy salala məs dədermenin mahenziŋɗe na Maŋgəlva a mekreti də ətaf Yesu.

¹³ Yaŋ nəprəm wəla ɗəf sə disiŋ dawnəh na: Aver na: Əzaɓi təŋ kakaŋ azet ɗiy en dəmtaŋ aka wəza na Daya! Yaŋ Əmpəs anah na: Vaski gesiŋgi, wafeteŋ səka wəza net tatwãhəŋ kana, mogon məs aɗɗaŋgəŋka tay əzbeti.

Mawala gəm əkkalan dəlva

¹⁴ Ya nəwəl na: Slaybuwən babara, aka slaybuwən naka nuwələk ɗəf dəgil va wətət ɗəf ɗewe akani. Mətərkiya na meleŋge tay aka kiyni gəm slogoy məs man hoɓhoɓ avani.

¹⁵ Siske na, maslay maɓɓan agilik səddəv gəla-na-Maŋgəlva aŋgəsl vaŋvəl dayadaya sən ɗəf məs ɗewwe aka slaybuwən naka: Agəm slogoy nok abələ, pay agapək nawbəla, vi dəlvafuŋ asəɓək nawbəla.

¹⁶ Yaŋ ɗəf ɗewwe naka slaybuwən nak atəl slogoy nan aka dəlvafuŋ, zəga naka dəlvafuŋ pak məbəlni.

¹⁷ Yaŋ maslay maɓɓan agil səddəv gəla-na-Maŋgəlva na disiŋ, nan pak tay də slogoy məs man hoɓhoɓu.

¹⁸ Yaŋ maslay maɓɓan agil sə matuya, tay də gagdak aka offo. Atəl anah dayadaya sən ɗəf məs də slogoy məs man hoɓhoɓ avan nak na: Agəm slogoy noko, ataw mokkoy net megezlembirkeɗ naka dəlvafuŋ vi asɓaŋka.

¹⁹ Yaŋ maslay nak atəl slogoy nan aka dəlvafuŋ ataw mokkoyɗe net megezlembirkeɗ naka dəlvafuŋ, yaŋ azget a təki nawɗotti, ndəni wədagədəv na Maŋgəlva.

²⁰ Məŋkinti a təki nawɗotit a mapoho na walaŋgəla-metiŋ. Mbel agulyoŋguk sə təki nawɗotti, anzoŋguk koɗkoɗ hã gap kilometər səkat hoku, kpumkpum net mbel net tay va wərga va ɗəf du'du' hoku.