Hənhən 1 - Bible en Guidar

Ətoŋ addəvən ( 1:1-8 ) Əzaɓ aza ɗəf məŋɗan ɗereweleŋka

¹ Ərba an Maŋgəlva arban sən Yesu Kristu: Apsən vi karban an dədaɗɗa abe sit məɗɗaŋ wəza nani. Kristu arban sənək sən Yohanna məgəɗ wəza nan də əslən maslay nan azani.

² Yohanna van apelik aka an awəl pakə: Əpel na Maŋgəlva yi gesiŋ, Yesu Kristu dəpele.

³ Əzaɓi aza ɗəf məzəŋɗan ɗereweləŋka, gəm məzəprəmən əpel na kəleŋ gəm dərma məs məverin naddəvən, vi pay nan go'oy.

Əsɗa sit gəlaɗe na Maŋgəlva buhul

⁴ Səza Yohanna sit gəleɗe na Maŋgəlva buhul na Asiya: Mbəlembəle gəm zazay dəsan sukum səza Maŋgəlva, ndən məs kakaŋka, məs dəsan lahəŋka gəm məs dədazani, gəm səzet əmpəsɗe buhul məs dəssoŋ aba mazaŋga na məlĩ nani,

⁵ gəm səza Yesu Kristu, miziwe an gesiŋ, məs dəgil daabəŋ səret ɗiy mimtiti, gəm məlĩ net məlyeŋge naka dəlvafuŋ pakə. Aŋgluməka, agilgəmək səddəv mambray nam də əmta nani.

⁶ Akkpaŋgamək ka ɗiy naka dələv na məlĩ nani, ka məsdəlveŋge na Maŋgəlva Afəni, gagdaka gəm əɓap nani hã faɗə. Amin.

⁷ Awla tay əzan aka slaybuwna, ɗiy pak wawlanəni, gəm ɗiy məs dəmpanən zlaŋ wawlanəni. Ɗiy naka dəlvafuŋ pak waskaŋ morkoyo aka wən nani. Vaski wagəɗ vaska.

⁸ Daya Maŋgəlva Məzuɓappak amna: Intə ətəŋga, intə əbaymani. Ɗəf məs kakaŋka, məs lahəŋka gəm məs dədazani.

Əkol ula gəm letərɗe sit gəlaɗe na Maŋgəlva buhul ( 1:9—3:22 ) Yohanna awlak Kristu

⁹ Intə Yohanna, məlmukum gəm makkoyokum addəv əzəmsãhã, addəv əzəm məlyã gəm addəv əsok zə ɗəf addəv əsap də Yesu. Məɗiwi aka mətuwəra məs adawyaŋ na Patmos, vi nədarban wən na Maŋgəlva gəm gegesiŋ məs Yesu arbani.

¹⁰ Pay na Daya, Əmpəs adek akawa, yaŋ nəprəm wəla ɗəf dərɓagaw dayadaya, də ɓaɓəlman va gozloro,

¹¹ ətəlma na: An kədawlaŋka aver addəv ɗerewel, aslən sit gəleɗe na Maŋgəlva buhul: a Efesus, a Samirna, a Pergame, a Tiyatira, a Sardis, a Filadelfiya, də a Lawdikiya.

¹² Yaŋ nəkkpaŋgan haraw vi kawla ɗəf məzupel suwa. Adan nəkkpaŋgə, nuwələk zəgeɗ nawɗi lalam na təbəz na meleŋge buhulu.

¹³ A waleŋgit zəgeɗ nawɗi lalam veti, ɗəf tay adak də lukut azan məsilipi, diynan dadakən də kətu məɗɗan də meleŋge.

¹⁴ Muhur kiyən babar kaɗɗakkaɗɗak va zeŋze awaniɓa va ɓeɓrezlerizze, haran va hərzlum offo,

¹⁵ tələn tay va təbəz pepreŋ məzuwiɗe, məhəsən a movoro. Wəlan əprəm va ɓaɓəlmet iŋkile a pehe.

¹⁶ Ngərzleɗ tahəŋ buhul dəka van dəzəŋ kãwwã, masalam məs man sula agilik səmani. Haran əwiɗ va pay aka tataŋpaya.

¹⁷ Səza nula vaska, nəzbərək ammba tələn afuŋ va məmtuwa. Yaŋ aɗi van dəzəŋ akawa amna: Kəgeslne' ɓa. Intə wətəŋ na zəga, Intə əgrak nani.

¹⁸ Intə ɗəf madarani, nəmtək lahəŋka, ya kakaŋ na madaraw nan hã faɗə. Intə tat də gagdaka aka əmta gəm aka təki nassa net ɗiy mimtiti.

¹⁹ Aver an kədawla kana, an kakaŋka, gəm an dədazzan səbbərən.

²⁰ An dəsan məɗama dəwəl sit ngərzleɗ buhul məs kəwəl aza vaw dəzəŋ kãwwã, də zəgeɗ nawɗi lalam na təbəz na meleŋgeŋ yaŋka, ngərzleɗ buhuləŋki, maslayɗe net gəlaɗe na Maŋgəlva buhuləŋgə; zəgeɗ nawɗi lalam buhuləŋki, gəleɗe na Maŋgəlva buhuləŋgə.